နေပြည်တော်၊ မေ ၂၇ ရက်(ဆင်ဟွာ)

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနအနေဖြင့် ပြည်ပသို့ ဆန်တန်ချိန် ၂ ဒသမ ၅ သန်း တင်ပို့ရန် လျာထားခဲ့ရာ ယခုဘဏ္ဍာနှစ်အတွင်း မတ်လအထိ တင်ပို့ ပြီး ဆန်မှာ တန်ချိန် ၁ ဒသမ ၇ သန်းရှိခဲ့သောကြောင့် ဘဏ္ဍာနှစ်၏ ကျန် ခြောက်လ (ဧပြီ မှ စက်တင်ဘာ) အတွင်း ဆန်တန်ချိန် ရှစ်သိန်းခန့်အထိ တင်ပို့ရန် ခန့်မှန်း တွက်ချက်ထားကြောင်း စီး/ကူး ဝန်ကြီးဌာန ဒုတိယ ဝန်ကြီး ဦးအောင်ထူးက ပြည်ထောင်စု လွှတ်တော် ယနေ့ အစည်းအဝေး တွင် ပြောကြား ခဲ့သည်။ 

ရန်ကုန်၊ မေ ၂၇ ရက် (ဆင်ဟွာ)

ရန်ကုန်တိုင်းဒေသကြီး၊ လှိုင်မြို့မရဲစခန်းမှူး ဒုတိယရဲမှူးသိန်းဆွေမြင့် (ယခု ယာယီရဲမှူး၊ ဟိုပန်မြို့နယ် ရဲတပ်ဖွဲ့မှူး)အား အဂတိလိုက်စားမှုတိုက်ဖျက်ရေးဥပဒေဖြင့် အမှုဖွင့်အရေးယူလိုက်ကြောင်း အဂတိလိုက်စားမှုတိုက်ဖျက်ရေးကော်မရှင်က ယနေ့ ထုတ်ပြန်သော သတင်းအရ သိရသည်။

နေပြည်တော်၊ မေ ၂၆ ရက်(ဆင်ဟွာ)

နိုင်ငံတော် သမ္မတထံက ပေးပို့ထားသော ၂၀၁၉ - ၂၀ ဘဏ္ဍာနှစ် နိုင်ငံတော်၏ လိုငွေအား ဖြည့်ဆည်းရန် အပြည်ပြည် ဆိုင်ရာ ငွေကြေး ရန်ပုံငွေ အဖွဲ့(IMF) ထံမှ ချေးငွေ အမေရိကန်ဒေါ်လာ သန်း ၇၀၀ ရယူရေး နှင့် စပ်လျဉ်းပြီး ပြည်ထောင်စု လွှတ်တော် ယနေ့ အစည်းအဝေးက ကန့်ကွက်သူ မရှိ အတည်ပြုခဲ့သည်။

ရန်ကုန်၊ မေ ၂၆ ရက် (ဆင်ဟွာ)

လျှပ်စစ်နှင့် စွမ်းအင်ဝန်ကြီးဌာနအနေဖြင့် အိမ်သုံးအမျိုးအစား လျှပ်စစ်ဓာတ်အား သုံးစွဲမှု ၁ ယူနစ်မှ ၁၅၀ ယူနစ်ထိ စုစုပေါင်း (၁၅၀) ယူနစ်ကို ငွေကြေးကောက်ခံမှု ကင်းလွတ်ခွင့် (အခမဲ့) ထပ်မံ ပေးမည်ဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာနမှ ထုတ်ပြန်သော သတင်းအရ သိရသည်။

ရန်ကုန်၊ မေ ၂၅ ရက် (ဆင်ဟွာ)

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် ယနေ့ (မေ ၂၅ရက်)မှစတင်ပြီး နိုင်ငံတော် ဘဏ္ဍာဆုံးရှုံးမှုမရှိစေရန်နှင့် တရားမဝင် ကုန်စည်များတင်ပို့မှု ထိရောက်စွာအရေးယူ ဆောင်ရွက်နိုင်ရန် ရည်ရွယ်ပြီး နိုင်ငံခြားအရက်များကို တရားဝင် တင်သွင်းခွင့်ပြုလိုက်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန လက်ထောက်အတွင်းဝန် ဦးခင်မောင်လွင်က ဆင်ဟွာသို့ ပြောကြားသည်။

ရန်ကုန်၊ မေ ၂၅ ရက် (ဆင်ဟွာ)

ရှမ်းပြည်နယ်(တောင်ပိုင်း) လွိုင်လင်မြို့နယ် ဟိုတင့်ကျေးရွာအနီး၌ မေ ၂၄ ရက် မွန်းလွဲ ၂ နာရီဝန်းကျင်ခန့်က ၁၂ ဘီးယာဉ်တစ်စီးပေါ်မှ ICE ၁,၆၁၅ ကီလိုဖမ်းဆီးရမိခဲ့ကြောင်း ပြည်ထဲရေးဝန်ကြီးဌာန၏ ထုတ်ပြန်ချက်အရ သိရသည်။

နေပြည်တော်၊ မေ ၂၅ ရက်(ဆင်ဟွာ)

ရခိုင်ပြည်နယ်ရှိ ပင်လယ်နှင့် နီးပြီး အနိမ့်ပိုင်းရှိ ရပ်ကွက် ကျေးရွာများတွင် ဒေသခံပြည်သူများ မုန်တိုင်း ရန်မှ ရှောင်တိမ်း ခိုလှုံနိုင်ရန် Cyclone  Shelter ၅၇ လုံးကို တည်ဆောက်ပေးထား ကြောင်းနှင့် လိုအပ်သော နေရာများတွင် လာမည့် ဘဏ္ဍာနှစ်၌ ဆက်လက် တည်ဆောက်ပေး မည် ဖြစ်ကြောင်း လူမှု ဝန်ထမ်း၊ ကယ်ဆယ်ရေးနှင့် ပြန်လည် နေရာ ချထားရေး ဝန်ကြီးဌာန ဒုတိယ ဝန်ကြီး ဦးစိုးအောင်က ပြည်သူ့လွှတ်တော် ယနေ့ အစည်းအဝေးတွင် ပြောကြားခဲ့ သည်။ 

ရန်ကုန်၊ မေ ၂၂ ရက် (ဆင်ဟွာ)

၂၀၁၉ခုနှစ်မှစတင်ပြီး အဂတိလိုက်စားမှုဖြင့် တရားစွဲဆိုခံထားရသော တနင်္သာရီတိုင်းဒေသကြီး ဝန်ကြီးချုပ်ဟောင်း ဒေါက်တာလဲ့လဲ့မော်ကို တနင်္သာရီတိုင်းဒေသကြီး တရားရုံးက ယနေ့ မေ ၂၂ ရက်၌ အမှု(၄)မှုအတွက် စုစုပေါင်း ထောင်ဒဏ် နှစ် ၃၀ ချမှတ်လိုက်ကြောင်း တနင်္သာရီတိုင်းဒေသကြီး တရားလွှတ်တော်မှ တရားရေးဦးစီးမှူး ဒေါ်အေးအေးသန်းက ဆင်ဟွာသို့ ပြောကြားသည်။

နေပြည်တော်၊ မေ ၂၁ ရက် (ဆင်ဟွာ)

၂၀၀၈ ဖွဲ့စည်းအုပ်ချုပ်ပုံ အခြေခံဥပဒေ ပြင်ဆင်ချက်များအပေါ်  ပြည်လုံးကျွတ်ဆန္ဒခံယူပွဲ ကျင်းပရေးကို ပြည်ထောင်စု ရွေးကောက်ပွဲ ကော်မရှင်၏ အကြံပြု တင်ပြချက်နှင့် ပြည်ထောင်စု လွှတ်တော်၏ သဘောထားများအရ ခေတ္တ ဆိုင်းငံ့ထားရန် ယနေ့ ပြည်ထောင်စု လွှတ်တော် အစည်းအဝေးက ကြေညာခဲ့သည်။

နေပြည်တော်၊ မေ ၁၉ ရက်(ဆင်ဟွာ)

၂၀၂၀ ပြည့်နှစ် နွေရာသီတွင် လျှပ်စစ်ဓာတ်အား လုံလောက်စေရေး အတွက် လျှပ်စစ်နှင့် စွမ်းအင် ဝန်ကြီးဌာနက တင်ဒါခေါ်ယူ ဆောင်ရွက်ထားသော သဘာ၀ ဓာတ်ငွေ့ရည် (LNG:_ Liquefied Natural Gas) ဓာတ်အားပေး စက်ရုံများအနက် ဓာတ်အား မဂ္ဂါဝပ် ၃၅၀ ထုတ်လွှတ်ပေးနိုင်မည့် သန်လျင် LNG Power Plant စက်ရုံသည် လာမည့် ဇွန်လ၌ မဂ္ဂါဝပ် ၂၀၀ ကို စတင် ထုတ်လွှတ်ပေးသွားမည် ဖြစ်ကြောင်း လျှပ်စစ်နှင့် စွမ်းအင် ဝန်ကြီးဌာန ဒုတိယ ဝန်ကြီး ဦးခင်မောင်ဝင်းက ယနေ့ ပြည်သူ့လွှတ်တော် အစည်းအဝေးတွင် ဖြေကြားခဲ့သည်။