မြန်မာနိုင်ငံတစ်ဝှမ်းရှိ လေဆိပ်များ၌ ပြည်ပခရီးသည်တင်လေယာဉ်များ ဆိုက်ရောက်ခွင့် ၁၄ ရက် ရပ်ဆိုင်းမည်

ရန်ကုန်အပြည်ပြည်ဆိုင်ရာ လေဆိပ်အတွင်း ခရီးသွားများအားတွေ့ရစဉ်(ဆင်ဟွာ) MYANMAR

ရန်ကုန်၊ မတ် ၂၉ ရက် (ဆင်ဟွာ)

မြန်မာနိုင်ငံတစ်ဝှမ်းရှိ အပြည်ပြည်ဆိုင်ရာ လေဆိပ်များ၌ မတ်လ ၃၀ရက် ည ၁၂နာရီမှ စ၍ ဧပြီ ၁၄ ရက် ည ၁၂ နာရီထိ ၁၄ ရက်ကြာ အပြည်ပြည်ဆိုင်ရာ ခရီးသည်တင်လေယာဉ်များ ဆိုက်ရောက်ခွင့် ရပ်ဆိုင်းထားမည်ဖြစ်ကြောင်း လေဆိပ်အား စီမံခန့်ခွဲဝန်ဆောင်မှု ပေးနေသာ Yangon Aerodrome Company Limited (YACL) ၏ ယနေ့ မတ် ၂၉ ရက် ညပိုင်းတွင် ထုတ်ပြန်သော ထုတ်ပြန်ချက်အရ သိရသည်။

မြန်မာနိုင်ငံ ကျန်းမာရေးနှင့် အားကစားဝန်ကြီးဌာနနှင့် လေကြောင်းပို့ဆောင် ရေးညွှန်ကြားမှုဦးစီးဌာနတို့၏ ထုတ်ပြန်ချက်နှင့်အညီ ရန်ကုန်အပြည်ပြည်ဆိုင်ရာ လေဆိပ်နှင့် မြန်မာနိုင်ငံရှိ မည်သည့်လေဆိပ်၌မဆို အပြည်ပြည်ဆိုင်ရာ ခရီးသည်တင်လေယာဉ်များ ဆိုက်ရောက်ခွင့်ကို ရပ်ဆိုင်းမည်ဖြစ်ကြောင်း ထုတ်ပြန်ချက်တွင်ဖော်ပြထားသည်။ 

COVID-19 ရောဂါပြန့်ပွားမှုကာကွယ်ရေးကြိုတင်စီမံချက်အနေဖြင့် မြန်မာနိုင်ငံ ကျန်းမာရေးနှင့် အားကစားဝန်ကြီးဌာနနှင့် လေကြောင်းပို့ဆောင် ရေးညွှန်ကြားမှုဦးစီးဌာနတို့သည် ယခင်က ဆင်းသက်ပျံသန်းခွင့်ပြုထားသော နိုင်ငံတကာ လေကြောင်းခရီးစဉ်များအားလုံးကို ဆိုင်းငံ့လိုက်ကြောင်း သိရသည်။

အဆိုပါ ယာယီဆိုင်းငံ့ချက်သည် ကယ်ဆယ်ရေးလေယာဉ်များ၊ ကုန်တင်လေယာဉ်များ၊ ဆေးဘက်ဆိုင်ရာ ကယ်ဆယ်ရေးလေယာဉ်များနှင့် လေကြောင်းပို့ဆောင်ရေးညွှန်ကြားမှုဦးစီးဌာနမှ အထူးခွင့်ပြုမည့် အထူးလေယာဉ်များအပေါ် သက်ရောက်မှု ရှိမည် မဟုတ်ကြောင်း သိရသည်။

သို့သော်လည်း လေယာဉ်များအနေဖြင့် ညရပ်နားမှုများရှိခဲ့ပါက ထိုလေယာဉ်တွင် လိုက်ပါလာသော လေယာဉ်အမှုထမ်း၊ ဝန်ထမ်းများသည် ကျန်းမာရေးနှင့် အားကစားဝန်ကြီးဌာန၏ သတ်မှတ်ချက်များနှင့် အညီ သီးသန့်စောင့်ကြည်မှုကို လိုက်နာရမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

“ ပြည်တွင်းခရီးစဉ်တွေတော့ ပုံမှန်အတိုင်းရှိနေမှာပါ၊ ပြည်ပလေကြောင်းတွေပဲ ယာယီရပ်နားလိုက်တာပါ” ဟု ရန်ကုန်အပြည်ပြည်ဆိုင်ရာလေဆိပ်မှ တာဝန်ရှိသူတစ်ဦးက ဆိုသည်။

ရန်ကုန်အပြည်ပြည်ဆိုင်ရာ လေဆိပ်သည် အပြည်ပြည်ဆိုင်ရာ လေကြောင်းလိုင်း ၃၇ ခု နှင့် အပြည်ပြည်ဆိုင်ရာ ခရီးစဉ် ၃၈ ခုအား ချိတ်ဆက်ဝန်ဆောင်မှု ပေးလျက်ရှိသည်။  (Xinhua)