အယ်လ်ဂျီးယား ၊ ဖေဖော်ဝါရီ ၁၅ ရက် (ဆင်ဟွာ)

အယ်လ်ဂျီးရီးယား နိုင်ငံ အစိုးရ တပ်ဖွဲ့ တစ်ဖွဲ့သည် ဖေဖော်ဝါရီ ၁၄ ရက်နေ့၌ နိုင်ငံမြောက်ပိုင်း Tebessa ပြည်နယ် တွင် ဗုံးခွဲတိုက်ခိုက်မှု ခံခဲ့ရရ အစိုးရ တပ်ဖွဲ့ဝင် ၅ ဦး ကျဆုံးခဲ့ကြောင်း သိရှိရသည်။

လာဂို့စ်၊ ဖေဖော်ဝါရီ ၁၄ ရက် (ဆင်ဟွာ)

နိုင်ဂျီးရီးယားနိုင်ငံ မြောက်ပိုင်း Bauchi-Kano လမ်းမတွင် ဘတ်စ်ကားတစ်စီး နှင့် ကုန်တင်ကားတစ်စီး ခေါင်းချင်းဆိုင်တိုက်မိခဲ့ရာ ဘတ်စ်ကားပေါ်တွင်လိုက်ပါလာသော ကျောင်းသား ၂၂ဦး နှင့် ကားဒရိုင်ဘာ တစ်ဦး သေဆုံးခဲ့ကြောင်း အာဏာပိုင်များက ဖေဖော်ဝါရီ ၁၃ ရက်တွင်ပြောကြားခဲ့သည်။

ကဘူးလ် ၊ ဖေဖော်ဝါရီ ၁၀ ရက် (ဆင်ဟွာ)

အာဖဂန်နစ္စတန် နိုင်ငံ ကာကွယ်ရေး ဝန်ကြီးဌာန ၏ ဖေဖော်ဝါရီ ၉ ရက်နေ့၌ ထုတ်ပြန်ချက်အရ အာဖဂန်နစ္စတန် နိုင်ငံ အစိုးရ တပ်ဖွဲ့က ပြီးခဲ့သည့် ၂၄ နာရီ ကာလအတွင်း နိုင်ငံတဝန်း ရှိ လက်နက်ကိုင် အဖွဲ့အစည်း များကို ပစ်မှတ်ထား ရှင်းလင်းခဲ့ရာ IS အစွန်းရောက် တပ်ဖွဲ့ဝင် ၂၇ ဦး အပါအဝင် လက်နက်ကိုင် တပ်ဖွဲ့ တပ်ဖွဲ့ဝင်ပေါင်း ၆၆ ဦး ကို ပစ်ခတ်ရှင်းလင်း ခဲ့ကြောင်း သိရှိရသည်။

BAQUBA ၊ အီရတ်၊ ဖေဖော်ဝါရီ ၉ ရက် (ဆင်ဟွာ)

အီရတ်နိုင်ငံ အရှေ့ပိုင်း ဒီယာလာပြည်နယ်ရှိ လူအများအပြားရှိနေသည့် ကော်ဖီဆိုင် တစ်ဆိုင်အား ဖေဖော်ဝါရီလ ၈ ရက်က သေနတ်သမားတစ်စုက ဝင်ရောက်တိုက်ခိုက်ခဲ့ရာ လူ ၇ ဦးသေဆုံးခဲ့ကြောင်း ဒေသဆိုင်ရာ တာဝန်ရှိသူတစ်ဦးက ပြောကြားခဲ့သည်။

ရာမာလာ ၊ ဖေဖော်ဝါရီ ၈ ရက် (ဆင်ဟွာ)

ပါလက်စတိုင်း နိုင်ငံ ကျန်းမာရေး ဝန်ကြီးဌာန က အစ္စရေး နိုင်ငံ လုံခြုံရေး တပ်ဖွဲ့သည် ဖေဖော်ဝါရီ ၇ ရက်၌ Hebron မြို့တွင် ပါလက်စတိုင်း နိုင်ငံသား ၁ ဦးအား ပစ်ခတ် သတ်ဖြတ် ခဲ့ပြီး ဖေဖော်ဝါရီ ၆ ရက်နေ့ ညပိုင်း အချိန်တွင်လည်း Nablus မြို့တွင် ပါလက်စတိုင်း နိုင်ငံသား တစ်ဦးအား ပစ်ခတ် ခဲ့သဖြင့် သေဆုံးခဲ့ကြောင်း ထုတ်ပြန်ကြေညာ ခဲ့သည်။

ဂါဇာ ၊ ဖေဖော်ဝါရီ ၈ ရက်(ဆင်ဟွာ)

အီဂျစ်နိုင်ငံ အာဏာပိုင်များက ဂါဇာကမ်းမြောင်ရှိ Rafah ဝင်ပေါက်ထွက်ပေါက် နှစ်ခုစလုံးကို သုံးရက်တာ ဖွင့်လှစ်ပေးသွားမည်ဖြစ်ကြောင်း ဖေဖော်ဝါရီ ၇ ရက်တွင် ထုတ်ဖော်ကြေညာခဲ့ကြောင်း ကိုင်ရိုမြို့ရှိ ပါလက်စတိုင်းသံရုံး၏ ပြောကြားချက်အရ သိရသည်။

ရာမာလာ ၊ ဖေဖော်ဝါရီ ၇ ရက် (ဆင်ဟွာ)

ပါလက်စတိုင်း နိုင်ငံ အစိုးရ က ဝန်ကြီးအဆင့် ကော်မတီ ဖွဲ့စည်း ကာ အစ္စရေး နှင့် နိုင်ငံရေး ၊ အုပ်ချုပ်ရေး ၊ စီးပွားရေး နှင့် လုံခြုံရေး စသည့် ကဏ္ဍများ အပါအဝင် သံတမန် ဆက်ဆံရေး ဖြတ်တောက်ရန် လုပ်ငန်းစဉ် များအား တာဝန်ယူ ဆောင်ရွက်စေခဲ့ကြောင်း ဖေဖော်ဝါရီ ၆ ရက်နေ့ ၌ ထုတ်ပြန် ကြေညာ ခဲ့သည်။

အန်ကာရာ ၊ ဖေဖော်ဝါရီ ၇ ရက် (ဆင်ဟွာ)

တူရကီ နိုင်ငံ သမ္မတ Recep Tayyip Erdoğan က တူရကီ နိုင်ငံ အစိုးရ တပ်ဖွဲ့ အနေဖြင့် ဆီးရီးယား နိုင်ငံ မြောက်ပိုင်း ဒေသတွင် ဆောင်ရွက်နေသည့် စစ်ရေးဆောင်ရွက်မှု များကို တိုးချဲ့ ဆောင်ရွက်သွားမည် ဖြစ်ပြီး Afrin ဒေသ အရှေ့ပိုင်း Manbij ဒေသ ကို ထိုးစစ်ဆင်သွားမည် ဖြစ်ကြောင်း ဖေဖော်ဝါရီ ၆ ရက်နေ့၌ ပြောကြား ခဲ့သည်။

တီဟီရန်၊ ဖေဖော်ဝါရီ ၆ရက် (ဆင်ဟွာ)

အီရတ်နိုင်ငံ နာဂျတ်ဖ်မြို့တွင် ဖေဖော်ဝါရီ ၅ရက်က ဖြစ်ပွားခဲ့သည့် ဟိုတယ်မီးလောင်မှုကြောင့် အနည်းဆုံး အီရန်နိုင်ငံသား အမျိုးသမီး ၂ဦးသေဆုံးခဲ့ကြောင်း Iran Daily က ဖော်ပြခဲ့သည်။