နေပြည်တော်၊ ဇန်နဝါရီ ၇ ရက်(ဆင်ဟွာ) ရေးသားသူ / စိုးသန်းလင်း

နေပြည်တော်ကောင်စီနယ်မြေရှိ မြို့နယ် ရှစ်မြို့နယ်၏ ၂၀၁၅ ရွေးကောက်ပွဲတွင် အသုံးပြုခဲ့သည့် မဲစာရင်းများ၊ ဆန္ဒမဲလက်မှတ်များ၊ ရွေးကောက်ပွဲဆိုင်ရာ စာရွက်စာတမ်းများနှင့် မဲရုံသုံး အထောက်အကူပစ္စည်းများအား စနစ်တကျ မီးရှို့ ဖျက်ဆီးခြင်းကို သက်ဆိုင်ရာ မြို့နယ် ရွေးကောက်ပွဲ ကော်မရှင် အဖွဲ့ခွဲ အသီးသီးက ယခင်အပတ်မှ စတင် ဆောင်ရွက်ခဲ့ရာ ယခု သီတင်းပတ်တွင် အားလုံး ပြီးစီးမည် ဖြစ်ကြောင်း နေပြည်တော်ကောင်စီနယ်မြေ ရွေးကောက်ပွဲ ကော်မရှင် အဖွဲ့ခွဲ အတွင်းရေးမှူး ဦးအောင်စိုးဝင်းက ဆင်ဟွာသို့ ဖြေကြားခဲ့သည်။

ရန်ကုန်၊ ဇန်နဝါရီ ၆ ရက် (ဆင်ဟွာ) ရေးသားသူ /အိမွန်ကျော်

တတိယအကြိမ် ပြည်သူ့လွှတ်တော်နှင့် အမျိုးသားလွှတ်တော် ပထမပုံမှန်အစည်းအဝေးကို ၂၀၂၁ ခုနှစ် ဖေဖော်ဝါရီ(၁)ရက်၊ မနက်(၁၀)နာရီတွင် စတင်ကျင်းပမည်ဖြစ်ကြောင်း သက်ဆိုင်ရာ လွှတ်တော် အသီးသီး၏ ကြေညာချက်များအရ သိရသည်။

ရန်ကုန် ၊ ဇန်နဝါရီ ၆ ရက်(ဆင်ဟွာ) ရေးသားသူ/ဟေမာန်

ရှမ်းပြည်နယ်၊ မိုင်းရယ်မြို့နယ်မှ မန္တလေးမြို့သို့ ပို့ဆောင်မည့် ငွေကျပ် ၁.၁ ဘီလီယံကျော်တန်ဖိုးရှိ မူးယစ်ဆေးဝါးများကို ရှမ်းပြည်နယ်(တောင်ပိုင်း)၊ ရွာငံမြို့နယ်၌ ဖမ်းဆီးရမိခဲ့ကြောင်း မြန်မာနိုင်ငံ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများအန္တရာယ်တားဆီးကာကွယ်ရေး ဗဟိုအဖွဲ့(CCDAC Myanmar)က ယနေ့ သတင်းထုတ်ပြန်ခဲ့သည်။

 

ရန်ကုန် ၊ ဒီဇင်ဘာ ၄ ရက်(ဆင်ဟွာ) ရေးသားသူ/ဟေမာန်

ရန်ကုန်တိုင်းဒေသကြီး မရမ်းကုန်းမြို့နယ်ရှိ အမျိုးသားပြန်လည်သန်စွမ်းရေးဆေးရုံ၊ ဗဟို ကာကွယ်ဆေး သိုလှောင်ရေးအအေးခန်းအတွင်း ထားရှိသော သိန်း ၄၆၀ ကျော်တန်ဖိုးရှိ သားအိမ်ခေါင်းကင်ဆာ ကာကွယ်ဆေး ၊ အသည်းရောင် အသားဝါ B ကာကွယ်ဆေး နှင့် ပြင်းထန်အဆုတ်ရောင် ကာကွယ်ဆေးများကို ခိုးယူသူ နှင့် ရောင်းချပေးသူများအား ဖော်ထုတ်ဖမ်းဆီးရမိခဲ့ကြောင်း ရန်ကုန်တိုင်းဒေသကြီး ရဲတပ်ဖွဲ့မှ ယနေ့ သတင်းထုတ်ပြန်ခဲ့သည်။

အမျိုးသားပြန်လည်သန်စွမ်းရေးဆေးရုံ၊ ဗဟို ကာကွယ်ဆေး သိုလှောင်ရေးအအေးခန်းအတွင်းထားရှိသော ရေခဲသေတ္တာအမှတ် BC 2 အတွင်းမှ တိုင်းဒေသကြီး/ပြည်နယ်များသို့ ဖြန့်ဖြူးထားခြင်း လုံးဝမရှိသေးသော သားအိမ်ခေါင်းကင်ဆာ ကာကွယ် ဆေးပုလင်းပေါင်း(၁၉၀,၅၅၂)ပုလင်းအနက် (၅,၈၁၀)ပုလင်းနှင့် အသည်းရောင် အသားဝါ B ကာကွယ်ဆေး (၄၈၀)လုံး၊ ပြင်းထန်အဆုတ်ရောင် ကာကွယ်ဆေး(၇၀၀)လုံး စုစုပေါင်းတန်ဖိုး (၄၆,၀၈၁,၇၆၈)ကျပ် ပျောက်ဆုံးနေကြောင်း ပြည်သူ့ကျန်းမာရေးဦးစီးဌာန ဗဟိုကာကွယ်ဆေး အအေးခန်းမှ ဦးစီးအရာရှိက ခိုးယူသွားသူအား စုံစမ်းဖော်ထုတ် အရေးယူပေးပါရန် မရမ်းကုန်းမြို့နယ်၊ ဘုရင့်နောင်နယ်မြေ ရဲစခန်းသို့ အမှုဖွင့်တိုင်တန်းခဲ့ကြောင်း ထုတ်ပြန်မှုတွင် ဖော်ပြထားသည်။

ရန်ကုန်တိုင်းဒေသကြီးရဲတပ်ဖွဲ့မှ အထူးအမှုစစ်အဖွဲ့က ဆေးပစ္စည်းအရောင်းဆိုင်များအား လိုက်လံ စုံစမ်းခဲ့ရာ ပန်းဘဲတန်းမြို့နယ်၊ (၄)ရပ်ကွက်၊ (၂၇/အပေါ်)လမ်း၊ တိုက်(၂၀၂)၊ (ပ)ထပ်နေ တင်အေး (ခ)မိုဟာမတ်အီလီယက်(ခ)တင်လှ ၏ ဆေးဆိုင်တွင် ရောင်းချကြောင်း စုံစမ်းသိရှိရသဖြင့် ၂၀၂၀ ပြည့်နှစ် ဒီဇင်ဘာ ၂၉ ရက်တွင် တင်အေး(ခ)မိုဟာမတ်အီလီယက်(ခ)တင်လှ ၏ ဆေးဆိုင် အား သက်သေများနှင့်အတူ ဝင်ရောက်ရှာဖွေရာ Lot No – T013330 ပါ သားအိမ်ခေါင်းကင်ဆာ ကာကွယ်ဆေး (၆၄၃)လုံး သိမ်းဆည်းရမိခဲ့ကြောင်းထုတ်ပြန်ချက်တွင် ဖော်ပြထားသည်။

တင်အေး(ခ)မိုဟာမတ်အီလီယက်(ခ)တင်လှ အား စစ်မေးရာ သာကေတမြို့နယ်၊ ရှုခင်းသာအိမ်ယာနေ စိုးမြင့်(ခ)စလိုဒါဂျူး က လာရောက်ရောင်းချခြင်း ဖြစ်ကြောင်း ထွက်ဆိုချက်အရ စိုးမြင့်(ခ)စလိုဒါဂျူး အား အမှုဖြင့် ဖမ်းဆီးစစ်ဆေးရာ ဆိပ်ကြီးခနောင်တို မြို့နယ်၊ ပန်းပင်ချောင်ရပ်ကွက်၊ သစ်ခွမြိုင်လမ်း၊ အမှတ်(၅၇)နေ ဝဏ္ဏထွန်း က ရောင်းခိုင်းခြင်းဖြစ်ကြောင်း ထွက်ဆို စစ်ဆေးပေါ်ပေါက်ခဲ့ကြောင်း ၊ ဝဏ္ဏထွန်း ပါ (၃)ဦးအား အမှုဖြင့်ဖမ်းဆီးပြီး တိုက်ဆိုင်စစ်ဆေးရာ ဝဏ္ဏထွန်း က Lot No – T013330 ပါ သားအိမ်ခေါင်းကင်ဆာ ကာကွယ်ဆေး (၅,၈၁၀)လုံး၊ အသည်းရောင် အသားဝါ B ကာကွယ်ဆေး၊ ပြင်းထန်အဆုတ်ရောင် ကာကွယ်ဆေး တို့အား ခိုးယူပြီး စိုးမြင့်(ခ)စလိုဒါဂျူး အား ရောင်းချခိုင်းခြင်း ဖြစ်ကြောင်း ၊ စိုးမြင့်(ခ)စလိုဒါဂျူး က သားအိမ်ခေါင်းကင်ဆာ ကာကွယ်ဆေးများအား ဆေးဝါးရောင်းချသူ တင်အေး(ခ)မိုဟာမတ်အီလီယက်(ခ)တင်လှ၊ သန်းထွန်း(ခ)အီမရမ်း(ခ)စာကလေး၊ အောင်နေဦး နှင့် စလင်း တို့ထံ ရောင်းချခဲ့ကြောင်း စစ်ဆေးပေါ်ပေါက်ခဲ့ကြောင်း ထည့်သွင်းဖော်ပြထားသည်။

အဆိုပါ စစ်ဆေးပေါ်ပေါက်ချက်အရ အမှုမှ ပျောက်ဆုံး သားအိမ်ခေါင်းကင်ဆာ ကာကွယ်ဆေး (၅,၅၁၃)လုံး၊ အသည်းရောင်အသားဝါ B ကာကွယ်ဆေး(၄၈၀)လုံး၊ ပြင်းထန်အဆုတ်ရောင် ကာကွယ်ဆေး (၇၀၀)လုံး အား ပြန်လည်သိမ်းဆည်းရရှိပြီးဖြစ်၍ ပြစ်မှုကျူးလွန်သူ ဝဏ္ဏထွန်း ပါ (၆)ဦးကို ဥပဒေနှင့်အညီ အမြန် တရားစွဲတင်ပို့နိုင်ရေး ဆောင်ရွက်လျက်ရှိကြောင်း ထုတ်ပြန်ခဲ့သည်။ (Xinhua)

 

နေပြည်တော်၊ ဇန်နဝါရီ ၄ ရက် (ဆင်ဟွာ) ရေးသားသူ / စိုးသန်းလင်း

ဒီမိုကရေစီ ဖက်ဒရယ်ပြည်ထောင်စုကို တည်ဆောက်ရာတွင် တိုင်းရင်းသားအားလုံး၏ ခိုင်မာ သော ပြည်ထောင်စုစိတ်ဓာတ်ဖြင့် သွေးစည်း ညီညွတ်စွာ ကြိုးပမ်းကြလျှင် အနာဂတ် ကာလတွင် ငြိမ်းချမ်းသာယာပြီး ခေတ်မီဖွံ့ဖြိုး တိုးတက်သော ဒီမိုကေရေစီဖက်ဒရယ်ပြည်ထောင်စုကြီး ပေါ်ပေါက်လာမည်ဟု ယုံကြည်ကြောင်း နိုင်ငံတော် သမ္မတ၏ (၇၃) ကြိမ်မြောက် လွတ်လပ် ရေးနေ့ အခမ်းအနားသို့ ပေးပို့သော သဝဏ်လွှာတွင် ဖော်ပြထားသည်။

ရန်ကုန်၊ ဇန်နဝါရီ ၁ ရက် (ဆင်ဟွာ) ရေးသားသူ/အိမွန်ကျော်

AA တိုင်းရင်းသားလက်နက်ကိုင်အဖွဲ့ မှ ဖမ်းဆီးထိန်းသိမ်းထားသော လွှတ်တော်ကိုယ်စားလှယ်သုံးဦးနှင့် တပ်မတော်သားသုံးဦး ယနေ့ (ဇန်နဝါရီ ၁ ရက်)တွင် ပြန်လည် လွတ်မြောက်လာကြောင်း တပ်မတော်ကာကွယ်ရေးဦးစီးချုပ်ရုံးထံမှ စုံစမ်းသိရှိရသည်။

ရန်ကုန်၊ ဇန်နဝါရီ ၁ ရက် (ဆင်ဟွာ) ရေးသားသူ/အိမွန်ကျော်

ပြည်သူများအားလုံး တာဝန်ကျေပွန်ရန်အတွက် လုပ်ဆောင်နိုင်လျှင် ၂၀၂၁ ခုနှစ်သာမက နောင်လာမည့်နှစ်များတွင် မြန်မာနိုင်ငံအတွက် စိတ်ချရမည်ဖြစ်ကြောင်း အမျိုးသားပြန်လည်သင့်မြတ်ရေးနှင့် ငြိမ်းချမ်ရေးဗဟိုဌာန ဥက္ကဋ္ဌ၊ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က နိုင်ငံတကာနှစ်သစ်ကူး အထိမ်းအမှတ်မိန့်ခွန်းအတွင်း ထည့်သွင်းပြောကြားခဲ့သည်။

ရန်ကုန်၊ ဇန်နဝါရီ ၁ ရက် (ဆင်ဟွာ) ရေးသားသူ/ အိမွန်ကျော်

နိုင်ငံတော် သမ္မတ၊ ဒုတိယ သမ္မတများနှင့် တပ်မတော်ကာကွယ်ရေးဦးစီးချုပ်စသည့် နိုင်ငံခေါင်းဆောင်များသည် ၂၀၂၁ ခုနှစ် နှစ်သစ်ကူး နှုတ်ခွန်းဆက် အမှာစကားများ ပြောကြားခဲ့သည်။

ရန်ကုန်၊ ဒီဇင်ဘာ ၃၁ ရက် (ဆင်ဟွာ) ရေးသားသူ/ အိမွန်ကျော်

တပ်မတော်အနေဖြင့် အကြမ်းဖက်အဖွဲ့အစည်းများရှိသည့် နေရာများမှအပ ကျန်နယ်မြေများတွင် ၂၀၂၁ ခုနှစ် ဇန်နဝါရီ ၁ ရက်မှ ၃၁ ရက်အထိ စစ်ရေးဆိုင်ရာလှုပ်ရှားမှုများကို ထပ်မံတိုးမြှင့်ရပ်ဆိုင်းပေးမည်ဖြစ်ကြောင်း ယနေ့ တပ်မတော်ကာကွယ်ရေးဦးစီးချုပ်ရုံးက ထုတ်ပြန်သော ပစ်ခတ်တိုက်ခိုက်မှုရပ်စဲရေးနှင့် ထာဝရငြိမ်းချမ်းရေးအတွက် ထုတ်ပြန်ချက်အရ သိရသည်။

ရန်ကုန်၊ ဒီဇင်ဘာ ၃၁ ရက် (ဆင်ဟွာ) ရေးသားသူ/အိမွန်ကျော်

Online လိုင်းမှတစ်ဆင့် နိုင်ငံခြားမှ ငွေများ၊ လက်ဆာင်များ ပေးမည့်ဟုဆိုကာ ငွေကြေးလိမ်လည်သော နိုင်ငံခြားသားများပါဝင်သည့် လူလိမ်ဂိုဏ်း ဖော်ထုတ်ဖမ်းဆီးရမိပြီးနောင်း ၎င်းတို့အဖွဲ့နှင့်ဆက်စပ်သူ ၇ ဦးထပ်မံဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က ယနေ့ ထုတ်ပြန်သော သတင်းအရ သိရသည်။