ရန်ကုန် ၊ ဧပြီ ၆ ရက်(ဆင်ဟွာ)

COVID-19 ကာကွယ်၊ ထိန်းချုပ်၊ ကုသရေး အတွက် ရောဂါစောင့်ကြပ်ကြည့်ရှုရေးလုပ်ငန်းများ၊ ပြည်သူ့ဆေးရုံများတွင် ကုသရေးလုပ်ငန်းများ အပါအဝင် လိုအပ်သည့် ကဏ္ဍများတွင် အားဖြည့်ဆောင်ရွက်ရန်အတွက် မိမိဆန္ဒအလျှောက် စေတနာ့ဝန်ထမ်း ဆရာဝန် (၁,၀၀၀)နှင့် အခြား စေတနာ့ဝန်ထမ်း (၁၀,၀၀၀) ခန့် မြန်မာနိုင်ငံဆရာဝန်အသင်းသို့ စာရင်းပေးထားကြောင်း ကျန်းမာရေး နှင့် အားကစား ဝန်ကြီးဌာန၏ ယနေ့ သတင်း ထုတ်ပြန်မှု အရ သိရသည်။ 

ဘန်ကောက် ၊ ဧပြီ ၆ ရက်(ဆင်ဟွာ)

ထိုင်းနိုင်ငံ၌ ယနေ့ ဧပြီ ၆ ရက်တွင် COVID-19 လူနာသစ် ၅၁ ဦး ထပ်မံ စစ်ဆေးတွေ့ရှိခဲ့ကြောင်း ၊ မတ် ၂၀ နောက်ပိုင်း နေ့စဉ် လူနာသစ်ဦးရေ တိုးပွားမှုနှုန်း အနည်းဆုံး ရက်တစ်ရက် ဖြစ်ကြောင်း ပြည်သူ့ကျန်းမာရေး ဝန်ကြီးဌာနက သတင်းထုတ်ပြန်ခဲ့သည်။  

မနီလာ ၊ ဧပြီ ၆ ရက် (ဆင်ဟွာ)

တရုတ်နိုင်ငံအစိုးရမှ စေလွှတ်သော ကပ်ရောဂါတိုက်ဖျက်ရေး ဆေးဘက်ဆိုင်ရာ ကျွမ်းကျင်ပညာရှင်အဖွဲ့တစ်ဖွဲ့သည် ဧပြီ ၅ ရက်တွင် ဖိလစ်ပိုင်နိုင်ငံ မြို့တော် မနီလာသို့ ရောက်ရှိလာခဲ့ကြောင်း သိရသည်။

ကိုင်ရို ၊ ဧပြီ ၆ ရက်(ဆင်ဟွာ)

အသက် ၆၈ နှစ်အရွယ်ရှိ လစ်ဗျားနိုင်ငံဝန်ကြီးချုပ်ဟောင်း မာမွတ်ဂျီဘရီလ်(Mahmoud Jibril) သည် COVID-19 ရောဂါဖြင့် အီဂျစ်နိုင်ငံ ကိုင်ရိုမြို့၌ ကွယ်လွန်သွားကြောင်း ကိုင်ရိုမြို့ရှိ လစ်ဗျားသတင်းအရင်းအမြစ်တစ်ဦးက ဆင်ဟွာသို့ ဧပြီ ၅ ရက်တွင် ပြောကြားခဲ့သည်။

ဝယ်လ်လင်တန်၊ ဧပြီ ၆ ရက် (ဆင်ဟွာ) 

နယူးဇီလန်နိုင်ငံ၌ ဧပြီ ၆ ရက်တွင် COVID-19 ရောဂါ ထပ်မံကူးစက်ခံရသူ အတည်ပြုလူနာ ၃၉ ဦး နှင့် စောင့်ကြည့်သံသယ လူနာ ၂၈ ဦးရှိခဲ့ရာ ယခုအခါ နိုင်ငံတစ်ဝှမ်းတွင် COVID-19 ရောဂါ ကူးစက်ခံရသူစုစုပေါင်း ၁,၁၀၆ ဦးထိ ရောက်ရှိသွားပြီဖြစ်ကြောင်း သတင်း ထုတ်ပြန်ခဲ့သည်။

ဂျီနီဗာ ၊ဧပြီ ၆ ရက်(ဆင်ဟွာ)

တရုတ်နိုင်ငံ ပြင်ပတွင် COVID-19 ရောဂါ အတည်ပြုလူနာ ၁,၀၅၀,၈၂၈  ဦးထိ ရောက်ရှိသွားပြီဖြစ်ကြောင်း ကမ္ဘာ့ကျန်းမာရေးအဖွဲ့(WHO)၏ ဧပြီ ၅ ရက်တွင် ထုတ်ပြန်သည့် နောက်ဆုံး ကိန်းဂဏန်းများ အရ  သိရသည်။

ဖနွမ်းပင် ၊ ဧပြီ ၆ ရက်(ဆင်ဟွာ)

ကမ္ဘောဒီးယား နိုင်ငံ၌ ပြီးခဲ့သော သုံးရက်ဆက်တိုက် COVID-19 ရောဂါ ကူးစက်ခံရသူ လူနာသစ် မတွေ့ရှိရကြောင်း ၊ လူနာသုံးဦး ပြန်လည်သက်သာလာခြင်းနှင့်အတူ နိုင်ငံအတွင်း သက်သာပျောက်ကင်းသွားသည့် လူနာအရေအတွက်မှာ ၅၃ ဦးထိ ရှိလာခဲ့ကြောင်း ကျန်းမာရေးဝန်ကြီးဌာန၏ ယနေ့  ဧပြီ ၆ ရက် ထုတ်ပြန်မှုအရ သိရသည်။ 

စင်ကာပူ၊ ဧပြီ ၆ ရက်(ဆင်ဟွာ) စင်ကာပူနိုင်ငံတွင်  ဧပြီ ၅ ရက်က အသစ်ထပ်တိုး အတည်ပြုလူနာ ၁၂၀ ဦးရှိခဲ့ရာ ယခုအခါ စုစုပေါင်း အတည်ပြုလူနာ ၁,၃၀၉ ဦးထိ ရောက်ရှိသွားပြီဖြစ်ကြောင်း စင်ကာပူ ကျန်းမာရေးဝန်ကြီးဌာန၏ ယင်းနေ့တွင် ထုတ်ပြန်သည် ကိန်းဂဏန်းများအရ သိရသည်။

ရောမ ၊ ဧပြီ ၆ ရက်(ဆင်ဟွာ)

အီတလီနိုင်ငံတွင် ပြီးခဲ့သော ၂၄ နာရီအတွင်း ကိုရိုနာဗိုင်းရပ်စ်ဖြင့်သေဆုံးသူ ၅၂၅ ဦးရှိခဲ့ရာ မတ်လ ၁၉ ရက် နောက်ပိုင်း တစ်ရက်တာအတွင်း COVID-19 ရောဂါဖြင့် လူသေဆုံးမှု အနည်းဆုံး ရက်တစ်ရက်အဖြစ် မှတ်တမ်းဝင်ခဲ့ကြောင်း ကျန်းမာရေးဌာန တာဝန်ရှိသူများက ဧပြီ ၅ ရက်တွင် ပြောကြားခဲ့သည်။