Videos
၂၁ ရာစုပင်လုံညီလာခံအစည်းအဝေးတွင် ဒေါ်အောင်ဆန်းစုကြည်အပိတ်မိန့်ခွန်းပြော
နေပြည်တော်၊ စက်တင်ဘာ ၃ ရက် (ဆင်ဟွာ)
၂၁ရာစု ပင်လုံညီလာခံသည် ၁၉၄၇ခုနှစ်တွင် ကျင်းပခဲ့သော ၂၀ရာစုပင်လုံကဲ့သို့ နိုင်ငံ၏ သမိုင်းတွင် ဝံ့ကြွားစရာ၊ ဂုဏ်ယူစရာ၊ အားတက်စရာ အခမ်းအနားကြီးတစ်ခု၊ အခင်းအကျင်းကြီးတစ်ခု၊ ဖြစ်စဉ်ကြီးတစ်ခု ဖြစ်နိုင်ရန်အတွက် ဝိုင်းဝန်းကြိုးစားကြရန် နိုင်ငံတော်၏အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က ယနေ့ တိုက်တွန်း ပြောကြားလိုက်သည်။
လက်ရှိကျင်းပသော ၂၁ရာစုပင်လုံညီလာခံသည် ငြိမ်းချမ်းရေးဖြစ်စဉ်၏ အစိတ်အပိုင်းတစ်ခုဖြစ်ပြီး ပြည်သူလူထုသည် ငြိမ်းချမ်းရေးဖြစ်စဉ်၌ မဖြစ်မနေပါဝင်ရမည့် ပုဂ္ဂိုလ်များဖြစ်သည်ကို နားလည်စေချင်ကြောင်း၊ ပြည်သူများအနေဖြင့် ငြိမ်းချမ်းရေးရရန် ဘယ်လိုအခက်အခဲများကို ကျော်လွှားရတယ်ဆိုတာကိုလည်း နားလည်စေချင်ကြောင်း ၎င်းကပြောသည်။
ငြိမ်းချမ်းရေးနှင့် ပတ်သက်ပြီး ပြဿနာများကို ဖြေရှင်းနိုင်သော အရည်အချင်းများကို မွေးထုတ်ပြီး အတူလက်တွဲကာ တစ်ဦးကိုတစ်ဦး ကူညီခြင်း၊ ဖေးမခြင်းနှင့် တစ်ဦးအမြင်ကို တစ်ဦးက လေးစား၊နားထောင်၍ သဘောချင်း မတိုက်ဆိုင်မှုများကို ဘာ့ကြောင့် မတိုက်ဆိုင်သည့် သဘောများ ရှိနေလဲဆိုတာကို စဉ်းစားမည်ဖြစ်ကြောင်း၊ ညီညီညွတ်ညွတ်နှင့် ဆက်ပြီး လိုချင်သော ငြိမ်းချမ်းရေးပန်းတိုင်ကို အရောက်သွားမည်ဖြစ်ကြောင်း ၎င်းက အပိတ်မိန့်ခွန်းတွင် ထည့်သွင်းပြောကြားသည်။
ယနေ့ ကျင်းပသော ၂၁ရာစုပင်လုံညီလာခံသည် လက်ရှိအစိုးရအတွက်မဟုတ်ဘဲ နောင်မျိုးဆက်သစ် များအတွက် ဖြစ်ကြောင်း ၎င်းကပြောသည်။
၂၁ရာစုပင်လုံညီလာခံကို သြဂုတ် ၃၁ရက်နေ့မှ စက်တင်ဘာ ၃ရက်နေ့ထိ ကျင်းပခဲ့သည်။(Xinhua)