အလုံမြို့နယ် အလုံဈေး ရှိ အစားအသောက်များနှင့် ဆေးဆိုင်များအား ရွေ့လျားဓါတ်ခွဲယာဉ်ဖြင့် ရှောင်တခင် ဝင်ရောက်စစ်ဆေး

ရန်ကုန်၊ မတ် ၂၀ ရက် (ဆင်ဟွာ)

ရန်ကုန်တိုင်းဒေသကြီး၊ အလုံမြို့နယ် အလုံဈေး ရှိ အစားအသောက်များနှင့် ဆေးဆိုင်များအား ရွေ့လျားဓါတ်ခွဲယာဉ်ဖြင့် ရှောင်တခင် ဝင်ရောက်စစ်ဆေးခဲ့ကြောင်း ၊ သတ်မှတ်ချက် နှင့်ကိုက်ညီမှုမရှိသည့်ဆေးဆိုင်များကို အရေးယူနိုင်ရန်ဆောင်ရွက်သွားမည်ဖြစ်ပြီး ဈေးသူဈေးသားများကိုလည်းအသိပညာပေးခြင်းများဆောင်ရွက်ခဲ့ကြောင်း အစားအသောက် နှင့်ဆေးဝါးကွပ်ကဲရေးဦးစီးဌာန (ရန်ကုန်) မှ ယနေ့သတင်းထုတ်ပြန်သည်။

မတ်လ ၁၉ ရက်နေ့တွင် အစားအသောက်နှင့်ဆေးဝါးကွပ်ကဲရေးဦးစီးဌာနခွဲ-ရန်ကုန်သည် ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ရန်ကုန်အနောက်ပိုင်းမှတာဝန်ရှိသူများ၊ မြို့နယ်အစားအသောက်နှင့်ဆေးဝါးကြီးကြပ်ကွပ်ကဲရေးကော်မတီမှအဖွဲ့ဝင် များ(မြို့နယ်ပြည်သူ့ကျန်းမာရေးဦးစီးဌာန၊စည်ပင်၊ထွေအုပ်၊ ရဲတပ်ဖွဲ့)တို့ဖြင့် အလုံ မြို့နယ်၊ အလုံဈေးတွင်မုန့်ဖတ်၊ ခေါက်ဆွဲ၊ ပဲပြား၊ ငါးပိ စသည့် အစားအသောက်များတွင် ခွင့်မပြုဓာတုပစ္စည်းများ ထည့်သွင်းအသုံးပြုထားခြင်းရှိ/မရှိ ရွေ့လျားဓါတ်ခွဲယာဉ်ဖြင့် ရှောင်တခင် ဝယ်ယူစစ်ဆေးခဲ့ရာ သတ်မှတ်ချက်နှင့်ကိုက်ညီသည်ဟု စစ်ဆေးတွေ့ရှိရကြောင်း သိရသည်။

စားသုံးဆီနှင့်ငရုတ်သီးမှုန့်နမူနာများအားလည်း ဓါတ်ခွဲစစ်ဆေးရန် ဝယ်ယူခဲ့ကြောင်း၊

ထို့ပြင် ဈေးအနှီးရှိ ဆေးဆိုင်များတွင် ကောင်းမွန်သောဆေးဝါးရောင်းချမှုကျင့်စဉ်(Good Pharmacy Practice)နှင့်အညီ သန့်ရှင်းသပ်ရပ်စွာရောင်းချမှု ရှိ/မရှိ၊ ဆေးဝါးရောင်းချမှုလိုင်စင် ရှိ/မရှိ၊ မြန်မာနိုင်ငံဆေးဝါး မှတ်ပုံတင်အမှတ်မပါသော ဆေးဝါး(လိုင်းဆေး) များရောင်းချခြင်းရှိ/မရှိ၊ သက်တမ်းလွန်ဆေးဝါးများ နှင့် စပ်ဆေးများ ရောင်းချခြင်း ရှိ/မရှိတို့ကို စစ်ဆေးမှုများ ပြုလုပ်ခဲ့ကြောင်း သတင်းထုတ်ပြန်ချက်ထဲတွင် ပါရှိသည်။ (Xinhua)