(၂၁) ကြိမ်မြောက် ASEAN University Games အမျိုးသားနှစ်ယောက်တွဲ ခြင်းလုံးပြိုင်ပွဲတွင် မြန်မာအသင်း ရွှေတံဆိပ်ဆုရရှိ

ရန်ကုန်၊ ဇူလိုင် ၄ ရက် (ဆင်ဟွာ)

အင်ဒိုနီးရှားနိုင်ငံတွင် ကျင်းပလျက်ရှိသော (၂၁) ကြိမ်မြောက် ASEAN University Games အမျိုးသားနှစ်ယောက်တွဲ ခြင်းလုံးပြိုင်ပွဲတွင် မြန်မာအသင်းက ရွှေတံဆိပ်ဆုရရှိခဲ့ကြောင်း ယနေ့ (ဇူလိုင် ၄ ရက်) နိုင်ငံပိုင်မီဒီယာက ထုတ်ပြန်သော သတင်းအရ သိရသည်။

အဆိုပါ ပြိုင်ပွဲတွင် မြန်မာအသင်းနှင့် အင်ဒိုနီးရှား အသင်းတို့ ယှဉ်ပြိုင်ကစားကြရာ မြန်မာအသင်းက အင်ဒိုနီးရှားအသင်းကို အနိုင်ရရှိပြီး ရွှေတံဆိပ်ဆုရရှိခဲ့ကြောင်း မြန်မာနိုင်ငံ ခြင်းလုံးအဖွဲ့ချုပ်ထံမှ သိရသည်။

ထို့ပြင် ဇူလိုင် ၃ ရက်က ယှဉ်ပြိုင်သည့် အမျိုးသားလေးယောက်တွဲ ခြင်းလုံးပြိုင်ပွဲတွင်လည်း မြန်မာအသင်းက ငွေတံဆိပ်ဆုရရှိခဲ့ကြောင်း သိရသည်။

(၂၁) ကြိမ်မြောက် ASEAN University Games ပြိုင်ပွဲကို အင်ဒိုနီးရှားနိုင်ငံ ဆူရာဘာယာနှင့် မာလန်းမြို့နှစ်မြို့တွင် ကျင်းပလျက်ရှိပြီး အားကစားနည်း ၂၁ မျိုးမှ အမျိုးအစားပေါင်း ၂၅၀ မျိုး ထည့်သွင်း ကျင်းပလျက်ရှိကြောင်း သိရသည်။ (Xinhua)