ဗင်နီဇွဲလားနိုင်ငံတော်တရားရုံးချုပ် က အတိုက်အခံခေါင်းဆောင်အား ပြည်ပထွက်ခွာခွင့်ပိတ်ပင်ပြီး ငွေကြေးပိုင်ဆိုင်မှုများကို ထိန်းချုပ်

ကာရာကက်စ်၊ ဇန်နဝါရီ ၃၀ ရက် (ဆင်ဟွာ)

ဗင်နီဇွဲလားနိုင်ငံ နိုင်ငံတော်တရားရုံးချုပ် (TSJ) သည် ကြားဖြတ်သမ္မတအဖြစ် မိမိကိုယ်ကို ကြေညာထားသည့် အတိုက်အခံခေါင်းဆောင် Juan Guaido အား နိုင်ငံမှ ထွက်ခွာခွင့် ပိတ်ပင်လိုက်ပြီး ၎င်း၏ ငွေကြေးပိုင်ဆိုင်မှုများကို ဇန်နဝါရီ ၂၉ ရက်က ထိန်းချုပ်ခဲ့ကြောင်း သိရသည်။

ရှေ့နေချုပ် Tarek William Saab က ၎င်း အနေဖြင့် Guaido အား ကြိုတင်ကာကွယ်သည့် အရေးယူမှုများပြုလုပ်ရန် တရားရုံးချုပ်ထံ တောင်းဆိုခဲ့ကြောင်း ကြေညာခဲ့ပြီးနောက် TSJ ၏ အမိန့် ထွက်ပေါ်လာခြင်းဖြစ်သည်။

ရှေ့နေချုပ် က Guaido အား နိုင်ငံမှ ထွက်ခွာခွင့်၊ ၎င်း၏ ပိုင်ဆိုင်မှုများအား ပေါင်နှံရောင်းချခြင်း နှင့် ဘဏ်အကောင့်များကို ပိတ်ပင်ထိန်းချုပ်မှုများ ပါဝင်သည့် ကြိုတင်ကာကွယ်မှု အရေးယူဆောင်ရွက်ချက်များကို TSJ ထံ တောင်းဆိုခဲ့ကြောင်းပြောကြားခဲ့သည်။

Saab က နိုင်ငံအတွင်း ဇန်နဝါရီ ၂၂ရက် စတင်ဖြစ်ပွားခဲ့သော ပဋိပက္ခများကို တုံ့ပြန်ဆောင်ရွက်သည့် အနေဖြင့် Guaido အား ကနဦးစုံစမ်းစစ်ဆေးမှုများ ဆောင်ရွက်ခြင်းနှင့်အတူ TSJ ထံ ယင်းတောင်းဆိုချက်များကို တောင်းဆိုခဲ့ခြင်းဖြစ်ကြောင်း ရှင်းလင်းပြောကြားခဲ့သည်။ (Xinhua)