တရုတ်သမ္မတရှီက နှစ်ကူးည အစ္စတန်ဘူလ် အကြမ်းဖက်ခံရမှုအတွက် ဝမ်းနည်းကြေကွဲကြောင်း တူရကီသမ္မတထံ သဝဏ်လွှာပေးပို့

ပေကျင်း ၊ ဇန်နဝါရီ ၃ ရက်(ဆင်ဟွာ)

တရုတ်နိုင်ငံသမ္မတရှီကျင့်ဖိန်သည် ပြီးခဲ့သော နှစ်သစ်ကူးညက တူရကီနိုင်ငံ အစ္စတန်ဘူလ်မြို့ရှိ နိုက်ကလပ်တစ်ခုတွင် သေနတ်သမားတစ်ဦး၏ ပစ်ခတ် မှုကြောင့် အနည်းဆုံးလူ ၃၉ ဦးထက်မနည်း သေဆုံးခဲ့ရခြင်း အပေါ် ဝမ်းနည်ကြေကွဲကြောင်း တူရကီနိုင်ငံသမ္မတ Recep Tayyip Erdogan ထံ ဇန်နဝါရီလ ၂ ရက်က သဝဏ်လွှာတစ်စောင်ပေးပို့ခဲ့သည်။

အဆိုပါ ဝမ်းနည်းကြောင်း သဝဏ်လွှာတွင် တရုတ်နိုင်ငံသမ္မတရှီက အကြမ်းဖက်မှုအတွင်းသေဆုံးသွားကြသူများ၊ထိခိုက်ဒဏ်ရာရသူများ၏မိသားစုဝင်များ နှင့် တူရကီနိုင်ငံသမ္မတတို့အတွက် အထူးစာနာထောက်ထားမိပါကြောင်း ဖော်ပြပါရှိသည်။

တရုတ်နိုင်ငံအနေဖြင့် အကြမ်းဖက်မှုကို ပြင်းထန်စွာရှုတ်ချကြောင်း နှင့် အကြမ်ဖက်ဝါဒအားလုံးကို လက်မခံနိုင်ကြောင်း ၊ ထို့ပြင် တရုတ်နိုင်ငံသည် တူရကီနိုင်ငံနှင့်ရော နိုင်ငံတကာအသိုင်းအဝိုင်းနှင့်ပါ လက်တွဲ၍ အကြမ်းဖက်ခြိမ်းခြောက်မှု အန္တရာယ်ကို ပူးပေါင်း တိုက်ဖျက်သွားရန် အသင့်ရှိပါကြောင်း သမ္မတရှီက ဆိုသည်။

ပြီးခဲ့သော ဇန်နဝါရီလ ၁ ရက် နံနက်အစောပိုင်းက တူရကီနိုင်ငံ အစ္စတန်ဘူလ်မြို့ရှိ နိုက်ကလပ်တစ်ခုတွင် နှစ်သစ်ကူးပွဲတော် ဆင်နွှဲရန် လူပေါင်း ရာကျော် စုဝေးရောက်ရှိနေချိန်တွင် သေနတ်သမားတစ်ဦး၏ ပစ်ခတ်မှုကြောင့် အနည်းဆုံး လူ ၃၉ ဦးသေဆုံးပြီး ၆ဝ ကျော်ထိခိုက်ဒဏ်ရာရခဲ့သည်။

အဆိုပါ သေနတ်သမားမှာ ထွက်ပြေးလွတ်မြောက်လျက်ရှိပြီး၊ တိုက်ခိုက်မှုမှာ ၎င်းတို့၏လက်ချက်ဖြစ်ကြောင်း အိုင်အက်စ်အကြမ်းဖက်အဖွဲ့က ထုတ်ဖော်ကြေညာထားသည်ဟု တူရကီ ပြည်တွင်းသတင်းဌာနက သတင်းဖော်ပြခဲ့သည်။ (Xinhua)