Videos
ရွေးကောက်ပွဲ ရလဒ်များအရ အမျိုးသားဒီမိုကရေစီ အဖွဲ့ချုပ်က ဦးဆောင်ပြီး ဥပဒေပြုရေးနဲ့ အုပ်ချုပ်ရေး တာဝန်များကို ထမ်းဆောင်တော့မည် ဖြစ်ကြောင်း နိုင်ငံတော် သမ္မတ ဦးသိန်းစိန်ဆို
ရန်ကုန်၊ ဇန်နဝါရီ ၂၈ ရက် (ဆင်ဟွာ)
ဒီမိုကရေစီ အသွင်ကူးပြောင်းရေးအတွက် အရေးကြီးသည့် အထွေထွေ ရွေးကောက်ပွဲကြီးအား ကျင်းပ ပေးနိုင်ခဲ့ပြီဖြစ်ကြောင်း၊ ရွေးကောက်ပွဲ ရလဒ်များအရ အမျိုးသား ဒီမိုကရေစီ အဖွဲ့ချုပ်က ဦးဆောင်ပြီး ဥပဒေပြုရေးနဲ့ အုပ်ချုပ်ရေး တာဝန်များကို ထမ်းဆောင်တော့မည် ဖြစ်ကြောင်း နိုင်ငံတော်သမ္မတ ဦးသိန်းစိန်က ယနေ့ပြည်ထောင်စု လွှတ်တော်တွင် မိန့်ခွန်း ပြောကြားခဲ့သည်။
သမ္မတဦးသိန်းစိန်သည် အစိုးရသက်တမ်း ၅ နှစ်တာ အတွင်း အစိုးရ၏ ဆောင်ရွက်ခဲ့မှုများကို ယနေ့နံနက်တွင် ပြည်ထောင်စု လွှတ်တော်မှ တစ်ဆင့် ပြည်သူလူထုသို့ မိန့်ခွန်းပြောကြားစဉ် ထည့်သွင်း ပြောကြားခဲ့ခြင်း ဖြစ်သည်။
သမ္မတ ဦးသိန်းစိန်က “ သက်တမ်း အလိုက် ပုံမှန်ကျင်းပတဲ့ ရွေးကောက်ပွဲတွေဟာ ဒီမိုကရေစီစနစ်ရဲ့ အင်္ဂါရပ် တစ်ခုပဲဖြစ်ပါတယ်။ ဒီရွေးကောက်ပွဲများကနေ ပြည်သူများရဲ့ အဆုံးအဖြတ် အတိုင်း နိုင်ငံရေး ပါတီများရဲ့ အနိုင်၊ အရှုံးဆိုတာလည်း ပေါ်ပေါက်နေမှာ ဖြစ်ပါတယ်။ အများစု အနိုင်ရတဲ့ ပါတီများက နိုင်ငံနဲ့ ပြည်သူ အကျိုးစီးပွား အတွက် အကောင်အထည်ဖော် ဆောင်ရွက်သလို အနည်းစု ပါတီများကလည်း အမျိုးသား အကျိုးစီးပွား အခြေခံပေါ်ကနေ ပူးပေါင်းဆောင်ရွက်ခြင်း၊ လိုအပ်ရင် အပြုသဘောဆောင် ဝေဖန် ထောက်ပြခြင်းများ ဆောင်ရွက်ရမှာ ဖြစ်ပါတယ်’’ ဟုပြောသည်။
ယနေ့ မြန်မာနိုင်ငံ၏ ပကတိ အရှိတရားအရ မည်သည့် ပါတီက တာဝန်ယူသည် ဖြစ်စေ တိုင်းပြည်တည် ငြိမ်အေးချမ်းရေးနဲ့ ဖွံ့ဖြိုး တိုးတက်ရေးကို ဆက်လက် အကောင် အထည်ဖော် ဆောင်ရွက်ရမည် ဖြစ်ကြောင်း၊ ၎င်းတာဝန်အား အကောင်အထည် ဖော်နိုင်ရန် အတွက် မိမိ နှင့် အစိုးရအဖွဲ့ဝင်အားလုံးက နောက်အစိုးရနဲ့ ပူးပေါင်းဆောင်ရွက် သွားမှာဖြစ်ကြောင်း သမ္မတ ဦးသိန်းစိန်က ဆိုသည်။
သမ္မတ ဦးသိန်းစိန်က “ မိဘပြည်သူ အားလုံး ကိုယ်စိတ်နှစ်ဖြာ ကျန်းမာ ချမ်းသာကြပါစေ၊ တိုင်းရင်းသား ညီအစ်ကို မောင်နှမအားလုံး ချစ်ချစ်ခင်ခင် စည်းစည်းလုံးလုံးနဲ့ ဥမကွဲ သိုက်မပျက် အေးအတူပူအမျှ ပြည်ထောင်စုကြီးကို တည်ဆောက်နိုင်ပါစေကြောင်း ဆုမွန်ကောင်းတောင်းရင်း အားလုံးကို နှုတ်ဆက်ခဲ့ပါတယ်’’ ဟု နှုတ်ခွန်းဆက်စကားပြောကြားခဲ့သည်။ (Xinhua)