ရှီ နှင့် ကင် ဆွေးနွေးပွဲတွင် အရေးကြီးသော သဘောတူညီမှုများ ရရှိခဲ့

ပေကျင်း၊ ဇန်နဝါရီ ၁ဝ ရက်(ဆင်ဟွာ)

တရုတ်နိုင်ငံကွန်မြူနစ်ပါတီ(CPC)ဗဟိုကော်မတီ အထွေထွေအတွင်းရေးမှူး နှင့် တရုတ်နိုင်ငံသမ္မတ ရှီကျင့်ဖိန်သည် တရုတ်နိုင်ငံ ပေကျင်းမြို့သို့အလည်အပတ်ရောက်ရှိနေသော မြောက်ကိုရီးယားနိုင်ငံ အလုပ်သမားပါတီ(WPK) ဥက္ကဋ္ဌ နှင့် မြောက်ကိုရီးယားနိုင်ငံ၏ နိုင်ငံတော်ရေးရာကော်မရှင်ဥက္ကဋ္ဌ ကင်ဂျုံအမ် အား ဇန်နဝါရီ ၈ ရက်တွင် လက်ခံတွေ့ဆုံဆွေးနွေးခဲ့ကြောင်း သိရသည်။

လှိုက်လှဲမှု နှင့် ချစ်ကြည်ရင်းနှီးမှုဖြင့် နှစ်နိုင်ငံခေါင်းဆောင်တို့သည် တရုတ်-မြောက်ကိုရီးယား နှစ်နိုင်ငံဆက်ဆံရေး နှင့် ဘုံသက်ဆိုင်မှုရှိသော အရေးကိစ္စရပ်များ အပေါ် နက်ရှိုင်းစွာအမြင်ချင်းဖလှယ်ဆွေးနွေးခဲ့ကြပြီး အရေးကြီးသောသဘောတူညီမှုများကို ရရှိခဲ့ကြောင်း သိရသည်။နှစ်ဘက်စလုံးက ခေတ်သစ်တွင် တရုတ်-မြောက်ကိုရီးယားနှစ်နိုင်ငံဆက်ဆံရေးတွင် ဆက်လက်၍ အသစ်သစ်သော ဖွံ့ဖြိုးတိုးတက်မှုများရရှိရေး အတူတကွလက်တွဲကြိုးပမ်းအားထုတ်သွားကြရန် သဘောတူညီခဲ့ကြပြီး ကိုရီးယားကျွန်းဆွယ်အရေးကို ပိုမိုထိရောက်သော နိုင်ငံရေးနည်းလမ်းအရ အဖြေရှာသွားကြရန် ၊ နှစ်နိုင်ငံပြည်သူများအတွက် အကျိုးစီးပွားများပိုမိုဆောင်ကြဉ်းပေးရန် နှင့် ဒေသတွင်းနှင့်ကမ္ဘာ့ဖွံ့ဖြိုးတိုးတက်မှု ၊ အကျိုးဖြစ်ထွန်းမှု ၊ တည်ငြိမ်မှု နှင့် ငြိမ်းချမ်းမှုအတွက် အပြုသဘောဆောင်သောပူးပေါင်းဆောင်ရွက်မှုများ လုပ်ဆောင်သွားရန် သဘာတူညီခဲ့ကြသည်။

သမ္မတရှီက ၂ဝ၁၉ ခုနှစ် နှစ်ဆန်းပိုင်းတွင် ရဲဘော်ဥက္ကဋ္ဌကြီး၏ တရုတ်နိုင်ငံသို့လာရောက်လည်ပတ်မှုသည် တရုတ်-မြောက်ကိုရီးယား နှစ်နိုင်ငံသံတမန်ဆက်ဆံရေးထူထောင်သည့် နှစ် ၇ဝ ပြည့်အခါသမယနှင့်တိုက်ဆိုင်နေကြောင်း ၊ နှစ်နိုင်ငံအစဉ်အလာချစ်ကြည်ရင်းနှီးမှု နှင့် ရဲဘော်ဥက္ကဋ္ဌကြီး၏ တရုတ်ကွန်မြူနစ်ပါတီ(CPC) နှင့် တရုတ်ပြည်သူများအပေါ် ချစ်ကြည်ရင်းနှီးမှုအား အပြည့်အဝ ဖော်ပြသည့် အလွန်အရေးပါသော ခရီးစဉ်ဖြစ်ကြောင်း ထည့်သွင်းပြောကြားခဲ့သည်။

“ တရုတ်ကွန်မြူနစ်ပါတီ ၊ တရုတ်အစိုးရ နဲ့တရုတ်ပြည်သူများကိုယ်စား သိပ်ကို လေးစားတန်ဖိုးထားကြောင်းပြောကြားလိုပါတယ်။ မြောက်ကိုရီးယားအလုပ်သမားပါတီ ၊ မြောက်ကိုရီးယားအစိုးရ နဲ့ပြည်သူများကို လှိုက်လှိုက်လှဲလှဲကြိုဆိုပါတယ်” ဟု ရှီကဆိုသည်။

မြောက်ကိုရီးယားခေါင်းဆောင်ကင်ဂျုံအမ်က ရဲဘော်အထွေထွေအတွင်းရေးမှူး နှင့်အတူ တရုတ်ကွန်မြူနစ်ပါတီ၏ ဦးဆောင်မှုအောက်တွင် တရုတ်ပြည်သူများအနေဖြင့် ခေတ်သစ်တွင် တရုတ်သွင်ပြင်လက္ခဏာနှင့်အတူဆိုရှယ်လစ်စနစ်ဖော်ဆောင်ရာတွင် လတ်ဆတ်သောကြီးကျယ်သည့် အောင်မြင်မှုများကို ဆက်လက်ပိုင်ဆိုင်နိုင်လိမ့်မည်ဖြစ်ကြောင်း နှင့် တရုတ်လူမျိုးတို့၏ အမျိုးသားပြန်လည်ရှင်သန်ရေးအိပ်မက် နှင့် ရာစုနှစ် ၂ခု ရည်မှန်းချက်ပန်းတိုင်ကို အပြည့်အဝ အကောင်အထည်ဖော်နိုင်လိမ့်မည်ဖြစ်ကြောင်း ပြောကြားခဲ့သည်။

မြောက်ကိုရီးယားနိုင်ငံ၏ မဟာဗျူဟာမြောက်မျဉ်းကြောင်းသစ်ကို ဆက်လက်အကောင်အထည်ဖော်ဆောင်ရွက်ရန်မြောက်ကိုရီးယားပြည်သူများ၏ ကြိုးပမ်းအားထုတ်မှုများအတွက် အလုပ်သမားပါတီက ဦးဆောင်မှုပေးလိမ့်မည်ဖြစ်ကြောင်းနှင့် ၎င်းကြိုးပမ်းအားထုတ်မှုအတွက် ကောင်းမွန်သော ပြင်ပ ပတ်ဝန်းကျင်နှင့် ဆက်ဆံရေးတစ်ခုကို ဖန်တီးသွားမည်ဖြစ်ကြောင်း ကင်ကဆိုသည်။တရုတ်သမ္မတရှီကျင့်ဖိန်သည် မြောက်ကိုရီးယားခေါင်းဆောင်ကင်အား တရုတ်နိုင်ငံပေကျင်းမြို့ရှိ မဟာပြည်သူ့ခန်းမ(Great Hall) ၌ လက်ခံတွေ့ဆုံခဲ့ကြောင်း သိရသည်။(Xinhua)

သတင်းအပြည့်အစုံဖတ်ရန်Link- http://www.xinhuanet.com/english/2019-01/10/c_137732260.htm