Environment, Disasters & Accidents
အောင်လံမြို့နယ်တွင် ရထားနှင့် ကား တိုက်မိမှုဖြစ်ပွား
ရန်ကုန်၊ နိုဝင်ဘာ ၁၃ ရက် (ဆင်ဟွာ)
အောင်လံမြို့နယ်၌ ရထားနှင့်ကားတိုက်မိမှုဖြစ်ပွားခဲ့ကြောင်း၊ အဆိုပါ ဖြစ်စဉ်ကြောင့် သေဆုံးသူမရှိကြောင်း ပြည်ထဲရေးဝန်ကြီးဌာန မှ ယနေ့ သတင်းထုတ်ပြန်သည်။
ဖြစ်စဉ်မှာ ၂၀၁၇ခုနှစ်၊ နိုဝင်ဘာလ ၁၂ ရက်နေ့ ၁၅း၀၀ နာရီ အချိန် အောင်လံမြို့နယ် မိုးကောင်းလေး ဘူတာနှင့် အောင်လံဘူတာကြား မိုင်တိုင် (၂၀၂/၆-၇)၌ ဦးသက်ခိုင်(၄၄)နှစ် မောင်းနှင်လာသော 2A/ xxxx ဒိုင်နာယာဉ်နှင့် အမှတ်(၁၀၉)အဆန် နေပြည်တော်-ပြည် RBE ရထားတို့တိုက်မိခဲ့ ပါကြောင်း၊ အဆိုပါတိုက်မိမှုကြောင့် ဒိုင်နာယာဉ်ပေါ်ပါ အမျိုးသား ၄ ဦး နှင့် အမျိုးသမီး ၁ ဦး တို့တွင် ဦးခေါင်းနောက်စေ့၊ ကျောကုန်း၊ ဝဲ/ယာလက်၊ ဒူးခေါင်း၊ တင်ပါးဆုံပွန်းပဲ့ ပေါက်ပြဲ ဒဏ်ရာ (မစိုးရိမ်ရ)ရရှိသဖြင့် အောင်လံပြည်သူ့ဆေးရုံ သို့ ပို့ဆောင်ခဲ့ကြောင်း၊ ၁၆း၅၀ နာရီအချိန် ဦးသက်ခိုင်အား အောင်လံမြို့မရဲစခန်း (ပ)၁၂၁၁/၂၀၁၇ ရထားပို့ဆောင်ရေးလုပ်ငန်း ဥပဒေပုဒ်မ ၈၅ ဖြင့် အမှုဖွင့်စစ်ဆေးလျက်ရှိပါကြောင်း သတင်းထုတ်ပြန်ချက်ထဲတွင်ပါရှိသည်။ (Xinhua)