အာဖရိကသမဂ္ဂစစ်အခြေစိုက်စခန်း ဆိုမာလီယာတွင် တိုက်ခိုက်ခံရသောကြောင့် စစ်သား ၄ ဦး သေဆုံး

နိုင်ရိုဘီ ၊ ဧပြီ ၂ ရက်(ဆင်ဟွာ)

ဆိုမာလီယာနိုင်ငံတောင်ပိုင်းရှိ အာဖရိကသမဂ္ဂစစ်အခြေစိုက်စခန်းတစ်ခုကို အယ်လ်ရှာဘတ် (Al-Shabaab) အစွန်းရောက်အဖွဲ့အစည်းက ဧပြီလ ၁ရက်တွင် ဝင်ရောက် တိုက်ခိုက်ခဲ့ရာ အနည်းဆုံး စစ်သား ၄ ဦး သေဆုံး ပြီး ၄ဦး ဒဏ်ရာရရှိခဲ့ကြောင်း သိရသည်။

ယူဂန်ဒါစစ်သားများစောင့်ကြပ်သည့် အာဖရိကသမဂ္ဂငြိမ်းချမ်းရေးထိန်းသိမ်းမှုတပ်ဖွဲ့၏ စစ်အခြေစိုက်စခန်း တစ်ခုတွင် ဧပြီလ ၁ ရက် မနက်ပိုင်းက အသေခံ ကားဗုံးဖောက်ခွဲမှု နှစ်ခု ဖြစ်ပွားခဲ့ကြောင်း၊ ၎င်းဗုံးဖောက်ခွဲမှု ဖြစ်ပွားပြီးနောက်မကြာမီ လက်နက်ကိုင် ၁၀၀ကျော်က လက်ပစ်ဗုံးများ၊ စက်သေနတ်များဖြင့် စစ်စခန်းကို ဝင်ရောက်စီးနင်းတိုက်ခိုက်ခဲ့ရာ စခန်းအတွင်းရှိ ငြိမ်းချမ်းစစ်သားများကလည်း ချက်ချင်း ပြန်လည်ခုခံ ထိုးစစ် ဆင်ခဲ့ကြောင်း ဆိုမာလီယာစစ်တပ်၏ ပြောရေး ဆိုခွင့်ရှိသူ ဟက်ခ်ဆန်က ဆိုသည်။ယူဂန်ဒါ စစ်တပ်ပြောရေးဆိုခွင့်ရှိသူ ခမီးလ်က ၎င်းတိုက်ခိုက်မှုတွင် ယူဂန်ဒါစစ်သား ၄ ဦး သေဆုံးပြီး အနည်း ဆုံး ၄ ဦး ဒဏ်ရာရရှိခဲ့ကြောင်းနှင့် လက်နက်ကိုင် ၂၀ ကျော်ကို သုတ်သင်ရှင်းလင်းပစ်နိုင်ခဲ့ကြောင်း ပြောကြား ခဲ့သည်။

ဆိုမာလီယာ အယ်လ်ရှာဘတ် (Al-Shabaab) များက ယခုတိုက်ခိုက်မှုမှာ ၎င်းတို့၏လက်ချက်ဖြစ်ကြောင်း၊ တိုက်ခိုက်မှုတွင် လူ ၁၄ ဦး သေဆုံးခဲ့ကြောင်း ကြေညာထားသည်။

ဆိုမာလီယာ အယ်လ်ရှာဘတ် (Al-Shabaab) သည် အယ်လ်ကိုင်ဒါး (Al-Qaeda)နှင့် ဆက်စပ်နေသည့် အစွန်းရောက်အဖွဲ့ဖြစ်ပြီး ယခုနှစ်ပိုင်းများတွင် ဆိုမာလီယာနှင့်၎င်းအနီးတဝိုက်ရှိနိုင်ငံများကို အကြမ်းဖက် တိုက်ခိုက်မှုများလုပ်ဆောင်နေသည်။ ဆိုမာလီအခြေစိုက် အာဖရိကသမဂ္ဂငြိမ်းချမ်းရေးထိန်းသိမ်းမှုတပ်ဖွဲ့သည် ၎င်းတို့တိုက်ခိုက်ရာ ပစ်မှတ်တစ်ခု ဖြစ်သည်။

အဆိုပါ ငြိမ်းချမ်းရေးထိန်းသိမ်းမှုတပ်ဖွဲ့မှာ ဆိုမာလီယာ၏ငြိမ်းချမ်းရေးကို ထိန်းသိမ်းရန်နှင့် ဆိုမာလီယာပြည်သူ လူထုအား လူသားချင်းစာနာထောက်ထားသော ကူညီမှုများပေးရန် အာဖရိကသမဂ္ဂက ၂၀၀၇ ခုနှစ်တွင် ဆိုမာလီယာသို့ စေလွှတ်ထားသော အထူးအဖွဲ့ဖြစ်ကြောင်း သိရှိရသည်။ (Xinhua)