တရုတ်နိုင်ငံ၏ Chang’e-5 အာကာသယာဉ် နမူနာပစ္စည်းများ စုဆောင်းရန် လမျက်နှာပြင်ပေါ်သို့ ဆင်းသက်

ပေကျင်း၊ ဒီဇင်ဘာ ၂ ရက် (ဆင်ဟွာ) ဘာသာပြန် – ခေါန်ရိန်

တရုတ်နိုင်ငံ၏ Chang’e-5 အာကာသယာဉ်သည် လမျက်နှာပြင် အနီးဆုံးဘက်ခြမ်းသို့ ဒီဇင်ဘာ ၁ ရက် ညပိုင်းတွင် အောင်မြင်စွာ ဆင်းသက်နိုင်ခဲ့ပြီး ဓာတ်ပုံများကို ပြန်လည်ပေးပို့နိုင်ခဲ့ကြောင်း တရုတ် အမျိုးသား အာကာသစီမံခန့်ခွဲမှုဦးစီးဌာန (CNSA) က ကြေညာခဲ့သည်။

အဆိုပါ အာကာသယာဉ်သည် ည ၁၁:၁၁ နာရီတွင် အနောက်လောင်ဂျီကျု ၅၁.၈ ဒီဂရီနှင့် မြောက်လတ္တီကျု ၄၃.၁ ဒီဂရီအနီး ပြန်လည်ရွေးချယ်ထားသော ယာဉ်ဆင်းသက်မည့်နေရာ၌ ဆင်းသက်ခဲ့ခြင်းဖြစ်ကြောင်း CNSA က ပြောကြားခဲ့သည်။တရုတ်နိုင်ငံက ဂြိုဟ်ပတ်လမ်းကြောင်းသွားယာဉ် (orbiter) ၊ လပေါ်ဆင်းသက်ယာဉ် (lander) ၊ (ascender) နှင့် နမူနာပစ္စည်းများပြန်လည်သယ်ယူခန်း (returner) တို့ကို ပေါင်းစည်းထားသော Chang’e-5 အာကာသယာဉ်အား နိုဝင်ဘာ ၂၄ ရက်တွင် လွှတ်တင်ခဲ့ခြင်းဖြစ်သည်။

 Chang’e-5 အာကာသယာဉ် လမျက်နှာပြင်ပေါ်သို့ ဆင်းသက်နေသည်ကို တရုတ်နိုင်ငံ ပေကျင်းမြို့ရှိ ပေကျင်း အာကာသထိန်းချုပ်ရေးစင်တာ (BACC) မှ ဒီဇင်ဘာ ၁ ရက်တွင် ဓာတ်ပုံရိုက်ယူထားစဉ် (ဆင်ဟွာ)

 Chang’e-5 အာကာသယာဉ် လမျက်နှာပြင်ပေါ်သို့ ဆင်းသက်နေသည်ကို တရုတ်နိုင်ငံ ပေကျင်းမြို့ရှိ ပေကျင်း အာကာသထိန်းချုပ်ရေးစင်တာ (BACC) မှ ဒီဇင်ဘာ ၁ ရက်တွင် ဓာတ်ပုံရိုက်ယူထားစဉ် (ဆင်ဟွာ)

ဒီဇင်ဘာ ၁ ရက် ည ၁၀:၅၇ နာရီတွင် Chang’e-5 ၏ lander-ascender ပေါင်းစပ်ယာဉ်သည် လကမ္ဘာမျက်နှာပြင်အထက် ၁၅ ကီလိုမီတာခန့်မှ အင်ဂျင်စက်နှိုးခြင်းနှင့်အတူ ဆင်းသက်ခြင်းလုပ်ငန်းကို စတင်လုပ်ဆောင်ခဲ့သည်။အဆိုပါ အာကာသယာဉ်သည် ဆင်းသက်စဉ်အတွင်း လကမ္ဘာမျက်နှာပြင်သို့ ချိန်ညှိကာ ချဉ်းကပ်သွားခဲ့သည်။ အလိုအလျောက် ရှာဖွေခြင်းနှင့် အတားအဆီးများကို အမျိုးအစားခွဲခြားပြီးနောက် ယင်းအာကာသယာဉ်သည် လ၏အနီးဝန်းကျင်ရှိ သမုဒ္ဒရာမုန်တိုင်းများဟု လူသိများသော Oceanus Procellarum ရှိ Mons Rumker ၏ မြောက်ဘက်ပေါ်၌ နေရာရွေးချယ်ကာ ဆင်းသက်ခဲ့သည်။

 Chang’e-5 အာကာသယာဉ် လမျက်နှာပြင်ပေါ်သို့ ဆင်းသက်နေသည်ကို တရုတ်နိုင်ငံ ပေကျင်းမြို့ရှိ ပေကျင်း အာကာသထိန်းချုပ်ရေးစင်တာ (BACC) မှ ဒီဇင်ဘာ ၁ ရက်တွင် ဓာတ်ပုံရိုက်ယူထားစဉ် (ဆင်ဟွာ)

ယာဉ်ဆင်းသက်ခြင်းလုပ်ငန်းစဉ်အတွင်း လပေါ်ဆင်းသက်ယာဉ်ပေါ်တွင်ပါရှိသော ကင်မရာများသည် ယာဉ်ဆင်းသက်ဧရိယာ ဓာတ်ပုံများကို ရိုက်ယူခဲ့ကြောင်း CNSA က ဆိုသည်။ မြေပြင်ထိန်းချုပ်မှုအရ လပေါ်ဆင်းသက်ယာဉ်သည် အခြေအနေကို စစ်ဆေးခြင်းများနှင့် ဆောင်ရွက်ခြင်းလုပ်ငန်းများစွာ လုပ်ဆောင်ခဲ့ပြီး လမျက်နှာပြင်ပေါ်တွင် ၄၈ နာရီခန့်ကြာ အလုပ်လုပ်နိုင်ရန် ပြင်ဆင်ခြင်းများ ဆောင်ရွက်ခဲ့ကြောင်း သိရသည်။

Chang’e-5 အာကာသယာဉ် လမျက်နှာပြင်ပေါ်သို့ ဆင်းသက်ပြီးနောက် ယာဉ်ပေါ်တွင်ပါရှိသော ကင်မရာဖြင့် ရိုက်ကူးထားသော ဓာတ်ပုံကို တွေ့ရစဉ် (ဓာတ်ပုံ – CNSA/Handout via Xinhua)

အလေးချိန် ၂ ကီလိုဂရမ်ခန့်ရှိသော နမူနာများကို စုဆောင်း၍ သိုလှောင်ခန်းအတွင်း လုံခြုံစွာသိမ်းဆည်းနိုင်မည်ဟု မျှော်မှန်းထားသည်။ ထို့နောက် ascender သည် ထွက်ခွာလာမည်ဖြစ်ပြီး ဂြိုဟ်ပတ်လမ်းကြောင်းတွင် orbiter-returner ပေါင်းစပ်ယာဉ်နှင့် ချိတ်ဆက်မည်ဖြစ်သည်။ စုဆောင်းရယူထားသော နမူနာများကို returner ထံသို့ လွှဲပြောင်းပြီးနောက်တွင် ascender မှာ orbiter-returner မှ ခွဲထွက်သွားမည် ဖြစ်သည်။

ထို့နောက် ဂြိုဟ်ပတ်လမ်းကြောင်းသွားယာဉ်သည် ကမ္ဘာမြေသို့ returner ကို ပြန်လည်သယ်ဆောင်လာမည်ဟု ခန့်မှန်းထားသည်။ Returner သည် ကမ္ဘာ့လေထုအတွင်းသို့ ပြန်လည်ဝင်ရောက်လာပြီးနောက် တရုတ်နိုင်ငံ မြောက်ပိုင်း အတွင်းမွန်ဂိုးလီးယား ကိုယ်ပိုင်အုပ်ချုပ်ခွင့်ရဒေရှိ Siziwang Banner စီရင်စုတွင် ဆင်းသက်မည်ဟု စီစဉ်ထားကြောင်း သိရသည်။ (Xinhua)