တပ်မတော်(လေ)မှ လေ့ကျင့်ပျံသန်းရေး G-4 ဂျက်လေယာဉ်မှူး ၂ ဦး သေဆုံးမှု အတည်ပြု

ရန်ကုန် ၊ အောက်တိုဘာ ၂၂ ရက်(ဆင်ဟွာ)

တပ်မတော်(လေ)မှ လေ့ကျင့်ပျံသန်းရေး G-4 ဂျက်လေယာဉ်မှ လေယာဉ်မှူး ၂ ဦးသည် လေယာဉ်ပျက်ကျပြီးနောက် နေရာတွင်ပင် သေဆုံးသွားခဲ့ကြောင်း တပ်မတော် ကာကွယ်ရေး ဦးစီးချုပ်ရုံးမှ ယနေ့ အောက်တိုဘာ ၂၂ ရက်တွင် သတင်းထုတ်ပြန်ခဲ့သည်။

လေယာဉ် ရှာဖွေရေးအဖွဲ့နှင့် ဆေးမှူးတို့၏ အတည်ပြုချက်အရ ထိုလေယာဉ်မှူး ၂ ဦး သေဆုံးကြောင်း အတည်ပြုခဲ့ခြင်း ဖြစ်သည်။

လေယာဉ်ပျက်ကျသည့်နေရာအား ရှာဖွေရေးလုပ်ငန်းများ ဆက်လက်ဆောင်ရွက်ရာ အောက်တိုဘာ ၂၀ ရက်တွင် ၎င်းနေရာအနီး၌ လေယာဉ်မှူး ဗိုလ်မှူး ကောင်းထိုက် ဝတ်ဆင်သော လက်ပတ်နာရီ D-Ziner အစိတ်အပိုင်းများ၊ လေသူရဲဖိနပ်တစ်ဖက်၊ တွဲဖက်လေယာဉ်မှူး ဗိုလ်ကြီး သော်ဇင်စိုး ဝတ်ဆင်သော Seiko အမှတ်အသားတံဆိပ်ပါ လက်ပတ်နာရီအစိတ်အပိုင်းများနှင့် မီးလောင်ပျက်စီးနေသည့် ခန္ဓာကိုယ် အရိုးအစိတ်အပိုင်းတစ်ချို့ ၊ လေသူရဲထိုင်ခုံ ၁ ခုစီနှင့် တွဲလျက်ရှိသော လေထီး၊ တောတွင်းသက်ကယ်ကူ ပစ္စည်းစုံအိတ် (Survival Kit) ၂ စုံစီတို့အား ရှာဖွေတွေ့ရှိခဲ့ကြောင်း ထုတ်ပြန်ချက်တွင် ဖော်ပြထားသည်။

လေယာဉ်ပျက်ကျသည့်အကြောင်းအရင်းအား စုံစမ်းစစ်ဆေးရေးအဖွဲ့များဖြင့် ဆက်လက်ဖော်ထုတ်ဆောင်ရွက်လျက်ရှိကြောင်း လည်း ထည့်သွင်း ထုတ်ပြန်ခဲ့သည်။

တပ်မတော်(လေ)မှ လေ့ကျင့်ပျံသန်းရေး G-4 ဂျက်လေယာဉ်သည် စက်တင်ဘာ ၅ ရက် နံနက်ပိုင်းတွင် ပုသိမ်-ဟင်္သာတ-ဂွ-ပုသိမ်လမ်းကြောင်းအတိုင်း လေ့ကျင့်ပျံသန်းစဉ် ပျောက်ဆုံးသွားခဲ့သဖြင့် ယင်းနေ့နံနက်ပိုင်းမှ စတင်၍ မြေပြင်တပ်များနှင့် တပ်မတော်(လေ)မှ လေယာဉ်များ၊ ရဟတ်ယာဉ်များက ရှာဖွေရေးလုပ်ငန်းများ ဆောင်ရွက်ခဲ့ရာ အောက်တိုဘာ ၁၈ ရက်တွင် လေယာဉ်အပိုင်းအစများအား ဂွမြို့၏ တောင်ဘက် ၁၂ မိုင်ခန့်အကွာရှိ တောင် ၂ လုံးအကြား လျှိုမြှောင်အတွင်း၌ ပြန်လည်တွေ့ရှိခဲ့သည်။(Xinhua)