Politics, Law & Military
မြန်မာ-ဘင်္ဂလားဒေ့ရှ် နှစ်ဖက်ညှိနှိုင်း၍ လှည့်ကင်းများဆောင်ရွက်
ရန်ကုန်၊ မတ် ၃၀ ရက် (ဆင်ဟွာ)
မြန်မာနိုင်ငံ နယ်ခြားစောင့်ရဲတပ်ဖွဲ့မှ လုံခြုံရေး တပ်ဖွဲ့ဝင် ၁၅ ဦးနှင့် ဘင်္ဂလားဒေ့ရှ် နယ်ခြားစောင့် ရဲတပ်ဖွဲ့မှ လုံခြုံရေးတပ်ဖွဲ့ဝင် ၁၅ ဦးတို့သည် မတ်လ ၂၇ ရက် နံနက် ၈ နာရီမှ မွန်းလွဲ ၁ နာရီ ၄၀ မိနစ်အထိ မိမိတို့နိုင်ငံအသီးသီးအတွင်းရှိ နယ်စပ်ခြံစည်းရိုးလမ်းအတိုင်း နယ်ခြားမှတ်တိုင် ၄၁ မှ ၄၂ အထိ နှစ်နိုင်ငံနှစ်ဘက်ညှိနှိုင်း၍ လှည့်ကင်းဆောင်ရွက်ခဲ့ကြောင်း သတင်းထုတ်ပြန်ရေး ကော်မတီမှ ထုတ်ပြန်သော သတင်းအရ သိရသည်။
ထို့အတူ မြန်မာနိုင်ငံနယ်ခြားစောင့်ရဲတပ်ဖွဲ့မှ လုံခြုံရေးတပ်ဖွဲ့ဝင် ၁၀ ဦးနှင့် ဘင်္ဂလားဒေ့ရှ် နယ်ခြားစောင့်ရဲတပ်ဖွဲ့မှ လုံခြုံရေးတပ်ဖွဲ့ဝင် ၁၂ ဦးတို့သည် မတ်လ ၂၇ ရက် နံနက် ၉ နာရီ မိနစ် ၄၀ တွင် နှစ်နိုင်ငံပူးပေါင်း၍ ရေယာဉ် ၄ စီးဖြင့် နတ်မြစ်တစ်လျှောက် ညှိနှိုင်းလှည့်ကင်း ဆောင်ရွက်ခဲ့သည်။
နှစ်နိုင်ငံ လုံခြုံရေးတပ်ဖွဲ့ဝင်များသည် ကုန်းမြေနယ်နမိတ်တွင် နှစ်ဖက်ညှိနှိုင်းချက်အရ Coordinated Patrol ကို ၂၀၁၈ ခုနှစ် ဖေဖော်ဝါရီ ၄ ရက်မှ ၂၆ ရက်ထိ နယ်ခြားမှတ်တိုင် ၄၂ မှ ၅၅ ထိ (၁၄)ကြိမ်၊ မတ်လ ၁၁ ရက်မှ ၂၇ ရက်ထိ နယ်ခြားမှတ်တိုင် ၃၁ မှ ၄၂ ထိ (၇) ကြိမ်၊ စုစုပေါင်း (၂၁) ကြိမ် နှင့် ရေကြောင်း ကင်းလှည့်ခြင်းကိုလည်း နတ်မြစ်ကြောင်းအတိုင်း မတ်လ ၅ ရက်၊ မတ်လ ၂၀ ရက် နှင့် မတ်လ ၂၇ ရက်တို့တွင် နှစ်နိုင်ငံညှိနှိုင်း၍ ဆောင်ရွက်နိုင်ခဲ့သည်။
နှစ်ဖက်ညှိနှိုင်း၍ ကင်းလှည့်ခြင်း Coordinated Patrol ကို နယ်ခြား မှတ်တိုင်အမှတ် ၄၅ အထိ ဆက်လက်ဆောင်ရွက်သွားမည်ဖြစ်ကြောင်း သိရှိရသည်။(Xinhua)