ရခိုင်ပြည်နယ် မောင်တောမြို့နယ်၌ စိတ်ကြွရူးသွပ်ဆေးပြား ၂,၇၆၆,၀၀၀ ပြား ဖမ်းဆီးရမိ

ရန်ကုန်၊ သြဂုတ် ၁၈ ရက် (ဆင်ဟွာ)

ရခိုင်ပြည်နယ် မောင်တောမြို့နယ် ရွှေဇားကျေးရွာအုပ်စု၊ ရွှေဇားတံတားအနီး၌ သြဂုတ်လ ၁၇ ရက် ၇နာရီ ၁၀မိနစ်အချိန်တွင် စိတ်ကြွရူးသွပ်ဆေးပြား ၂,၇၆၆,၀၀၀ ပြား ဖမ်းဆီးရမိခဲ့ကြောင်းပြန်ကြားရေးဝန်ကြီးဌာန မှ ယနေ့သတင်းထုတ်ပြန်သည်။

ဖြစ်စဉ်မှာ မောင်တောမြို့နယ် နယ်မြေအတွင်း MDY 4N/— တေပါယာဉ်ဖြင့် မူးယစ်ဆေးဝါးများ သယ်ယူပို့ဆောင်နေကြောင်း သတင်းအရ မူးယစ်ဆေးဝါးများသယ်ဆောင်လာသောယာဉ်အား လိုက်လံစုံစမ်းရာ အဆိုပါယာဉ်အား မောင်တောမြို့၊ ရွှေဇားကျေးရွာအုပ်စု၊ ရွှေဇားတံတားအနီးတွေ့ရှိ ရသဖြင့် မောင်တောခရိုင်ရဲတပ်ဖွဲ့မှူး ဒုတိယရဲမှူးကြီး ထွန်းမြင့်ထွန်းမှ အနီးကပ်ကြီးကြပ်၍ မောင်တောမြို့နယ်ရဲတပ်ဖွဲ့မှူး ရဲမှူးသန့်ဇော်ဦးနှင့်တပ်ဖွဲ့ဝင်များ၊ ရဲအုပ်အောင်သူရနှင့်တပ်ဖွဲ့ဝင်များ ရွှေဇားရဲကင်းစခန်းမှတပ်ဖွဲ့ဝင်များတို့သည် သက်သေများနှင့်အတူ ယာဉ်အမှတ် MDY 4N/—တေပါယာဉ်အားစစ်ဆေးရာ ယာဉ်မောင်းမှာ ရွှေဇားရွာအတွင်းသို့ ထွက်ပြေး တိမ်းရှောင်သွားပြီး ယာဉ်အားစစ်ဆေးခဲ့ကြကြောင်းသိရသည်။

ယာဉ်နောက်ဘက် ဆာလာအိတ်များအတွင်း တစ်ဖက်နိုင်ငံသို့ပို့မည့် ချင်း (ဂျင်း) များဖြင့်ရောနှောထည့်ထားသော မြင်းချေး ရောင်စက္ကူဖြင့်ထုပ်ထား သောတစ်ထုပ်လျှင် WY/R စာတမ်းပါ ပန်းရောင်စိတ်ကြွရူးသွပ်ဆေးပြား (၅၀,၀၀၀)ပြားစီပါ အထုပ် (၅၅)ထုပ်နှင့် ဆေးပြား(၁၆,၀၀၀)ပါ အထုပ်တစ်ထုပ် စုစုပေါင်းဆေးပြား (၂,၇၆၆,၀၀၀) ပြား ရှာဖွေသိမ်းဆည်းရမိခဲ့ပြီး မောင်တောမြို့မ စခန်းမှူး ဒုရဲမှူး ကျော်မျိုးထက်နှင့် တပ်ဖွဲ့ဝင်များမှ တရားခံများအား လိုက်လံရှာဖွေ ပိတ်ဆို့ဖမ်းဆီးလျက်ရှိကြောင်း သတင်းထုတ်ပြန်ချက်ထဲတွင်ပါရှိသည်။

အဆိုပါ ယာဉ်အမှတ် MDY 4N/— တေပါယာဉ်မှ ထွက်ပြေးတိမ်းရှောင်သွားသူများမှာ မောင်တောမြို့၊ မြို့မတောင်ရပ်ကွက်တွင်နေထိုင်ကြသူ ယာဉ်မောင်း အဘူကော်နှင့် ယာဉ်နောက် လိုက် အာဇီ ဖြစ်ကြောင်းစုံစမ်းသိရှိရသဖြင့် အဘူကော်နှင့် အာဇီတို့နှစ်ဦးအားဖမ်းဆီးရမိနိုင်ရေး ဆောင်ရွက်လျက်ရှိကြောင်း ပြန်ကြားရေးဝန်ကြီးဌာန မှ သတင်းထုတ်ပြန်ခဲ့သည်။ (Xinhua)