Social
ယာဉ်သွားလာမှု များပြားသော လမ်းကြောများ၌ အချိန်အလိုက် မီးပွိုင့်များကို ချိန်ညှိရန် စီစဉ်
ရန်ကုန်၊ ဖေဖော်ဝါရီ ၁၅ ရက် (ဆင်ဟွာ)
ရန်ကုန်တိုင်းဒေသကြီးအတွင်းရှိ ယာဉ်သွားလာမှု များပြားသော လမ်းကြောများရှိ မီးပွိုင့်များ၌ ယာဉ်သွားလာမှု များပြားသည့်အချိန်ကို ချိန်ညှိ၍ လမ်းကြောင်း ရှင်းလင်းစေရေး ထိန်းချုပ်ရန် စီစဉ်လျက်ရှိကြောင်း ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ထံမှ သိရသည်။
ယာဉ်ကြောပိတ်ဆို့မှုကို ဖြေလျှော့ရန် အဆိုပါ အစီအစဉ်ကို စီစဉ်ခြင်းဖြစ်ပြီး နံနက် ၅ နာရီမှ ည ၇ နာရီခွဲ၊ ည ၁၂ နာရီမှ နံနက် ၅ နာရီ၊ ည ၇ နာရီခွဲမှ ည ၁၂ နာရီ စသည်ဖြင့် အချိန်များ ပိုင်းခြား၍ မီးအစိမ်းပေးမှုကို ယာဉ်သွားလာမှု များပြားသော လမ်းကြောများနှင့် လမ်းဆုံမီးပွိုင့်များတွင် ဦးစားပေး လုပ်ဆောင်ရန် ရန်ကုန်မြို့တော် စည်ပင် သာယာရေး ကော်မတီ အင်ဂျင်နီယာဌာန (လမ်း၊တံတား) နှင့် ပူးပေါင်း စီစဉ်ထားကြောင်း သိရသည်။
ယင်း အချိန်များ သတ်မှတ်၍ မီးအစိမ်းပေးမှုကို အဆိုပါ မီးပွိုင့်များ၌ နံနက် ၅ နာရီမှ ည ၇ နာရီခွဲအတွင်း အနောက်မှ အရှေ့သို့သွားသော လမ်းကြောအတွက် ၉၃ စက္ကန့်၊ အရှေ့မှအနောက်သို့ သွားသော လမ်းကြောအတွက် ၂၃ စက္ကန့်၊ တောင်နှင့် မြောက် (တည့်) လမ်းကြောအတွက် ၂၈ စက္ကန့်၊ တောင်နှင့်မြောက် (ဘယ်ကွေ့) လမ်းကြောအတွက် ၁၃ စက္ကန့်ဖြင့် ချိန်ညှိနေပြီး ည ၁၂ နာရီမှ နံနက် ၅ နာရီအတွင်း အနောက်မှအရှေ့သို့သွားသော လမ်းကြော အတွက် ၈၃ စက္ကန့်၊ အရှေ့မှအနောက်သို့ သွားသော လမ်းကြောအတွက် ၁၈ စက္ကန့်၊ ည ၇ နာရီခွဲမှ ည ၁၂ နာရီအတွင်း တောင် နှင့်မြောက်(တည့်) လမ်းကြောအတွက် ၂၃ စက္ကန့်၊ တောင်နှင့်မြောက် (ဘယ်ကွေ့) လမ်းကြောအတွက် ၁ဝ စက္ကန့် စသည်ဖြင့် ချိန်ညှိနေကြောင်း ပြန်ကြားရေးဝန်ကြီးဌာနက ထုတ်ပြန်သော သတင်းအရ သိရသည်။(Xinhua)