“တရုတ်မှတ်တမ်းရုပ်ရှင်ပွဲတော်” အော့ဖ်လိုင်းတင်ဆက်ပြသမှုအစီအစဉ်များအား ရန်ကုန်တရုတ်ယဉ်ကျေးမှုစင်တာတွင် ဆက်လက်ကျင်းပလျက်ရှိ

ရန်ကုန်၊ ဩဂုတ် ၂၄ ရက် (ဆင်ဟွာ)

“တရုတ်မှတ်တမ်းရုပ်ရှင်ပွဲတော်” အော့ဖ်လိုင်း (offline) တင်ဆက်ပြသမှုအစီအစဉ်၏ တတိယမြောက်ပွဲစဉ်ကို ရန်ကုန် တရုတ်ယဉ်ကျေးမှုစင်တာတွင် ဩဂုတ်လ ၂၁ ရက်က ကျင်းပခဲ့ကြောင်း သိရသည်။

အဆိုပါအခမ်းအနားကို ရန်ကုန် တရုတ်ယဉ်ကျေးမှုစင်တာ တာဝန်ခံ Ms. Xu Ling ၊ မြန်မာနိုင်ငံ မြင့်တက်ပညာရေးအသင်း၏ ဥက္ကဋ္ဌ Mr. Chen Ziting (ဦးလှအောင်) ၊ ရန်ကုန်မြင့်တက် တရုတ်ဘာသာစကားသင်တန်းကျောင်းမှ ဒုတိယကျောင်းအုပ်ကြီး Ms. Yang Zuheng နှင့် ကျောင်းသား/ကျောင်းသူ စုစုပေါင်း ၄၀ ကျော် တက်ရောက်ခဲ့ကြကြောင်း သိရသည်။

အခမ်းအနားပွဲမစတင်မီအချိန်တွင် စင်တာ၏ ဘက်စုံသုံးခန်းမ (Multi-functional Hall) နှင့် ပြပွဲခန်းမတို့၌ ပြည်ပရှိ တရုတ်ယဉ်ကျေးမှုစင်တာများအကြောင်း မိတ်ဆက်ဗီဒီယို “China Cultural Center, Bridging China and the World” ၊ တရုတ်နိုင်ငံ ယူနန်ပြည်နယ်နှင့် ဖူကျန့်ပြည်နယ်များ၏ စွဲမက်ဖွယ် သဘာဝရှုမျှော်ခင်းများ၊ လူမှုယဉ်ကျေးမှုပုံစံနှင့် ရိုးရာဓလေ့များကို သက်ဝင်စွာ ရိုက်ကူးထားသည့် ယူနန်ခရီးသွားမိတ်ဆက် “Colorful Yunnan of China, Tourism Paradise of the World” ၊ ဖူကျန့်ခရီးသွားမိတ်ဆက် “Come to Where Fortune Smiles, Fujian Province” စသည့် ဗီဒီယိုများကို တင်ဆက်ပြသခဲ့ကြောင်း သိရသည်။

“တရုတ်မှတ်တမ်းရုပ်ရှင်ပွဲတော်”တွင် ဧည့်ပရိသတ်များက “China Untapped：Changsha” နှင့် “Fujian Puppetry” စသည့် ခရီးသွားလာရေးနှင့် ယဉ်ကျေးမှုအနုပညာကဏ္ဍများကို ပြောင်မြောက်စွာ ရိုက်ကူးထားသော မှတ်တမ်းရုပ်ရှင် ၂ ကားကို ကြည့်ရှုခဲ့ကြကြောင်း သိရသည်။ ယင်းမှတ်တမ်းရုပ်ရှင်များမှတစ်ဆင့် မြို့တစ်မြို့၊ ယဉ်ကျေးမှုအသွင်တစ်ခုဖြစ်သော တရုတ်နိုင်ငံရှိ မြို့များ၏စွဲမက်ဖွယ် တောတောင်ရေမြေ ရှုခင်းအလှများနှင့်အဆောက်အဦဗိသုကာလက်ရာများ၊ ဒြပ်မဲ့ယဉ်ကျေးမှုအတတ်ပညာများနှင့် ရိုးရာယဉ်ကျေးမှုဓလေ့များ၊ သမိုင်းအနက်အဓိပ္ပါယ်များအား လေ့လာခွင့်ရရှိခဲ့ကြကြောင်း သိရသည်။

ထို့အပြင် အဆိုပါမှတ်တမ်းရုပ်ရှင်ကြောင့် မြန်မာကျောင်းသားကျောင်းသူများအနေဖြင့် မြန်မာ-တရုတ် နှစ်နိုင်ငံရိုးရာယဉ်ကျေးမှုများ၏ တူညီမှု၊ ကွဲပြားခြားနားမှုများအပေါ် ပို၍ စိတ်ဝင်စားလာခဲ့ပြီး နှစ်နိုင်ငံယဉ်ကျေးမှု၏နီးစပ်မှုများအား သိရှိရကာ နှစ်ဘက်ယဉ်ကျေးမှုအပေါ် နားလည်မှုများ ပို၍ တိုးပွားစေခဲ့ကြောင်း သိရသည်။

ယင်းအခမ်းအနားအတွင်း စိတ်ဝင်စားဖွယ်ကောင်း၍ တရုတ်ယဉ်ကျေးမှုအား ပိုမိုသိရှိနားလည်စေသော “ရုပ်ပုံများထဲမှ စကားပုံများ” နှင့် “သရုပ်ဖော်မယ်၊ ခန့်မှန်းမယ်” စသည့်အစီအစဉ်များ၌ အဖြေမှန်ဖြေဆိုနိုင်သူများအား အမှတ်တရ ဆုလက်ဆောင်ချီးမြှင့်သည့် ဦးသူဖြေစနစ်ဖြင့် အမေးအဖြေကဏ္ဍများ ပြုလုပ်ခဲ့သလို “မြန်မာ-တရုတ် သံတမန်ဆက်ဆံရေး ထူထောင်ခြင်း” အထိမ်းအမှတ် ဓာတ်ပုံပြပွဲသို့လည်း သွားရောက်ကြည့်ရှုလေ့လာခဲ့ကြကြောင်း သိရသည်။

ရန်ကုန်တရုတ်ယဉ်ကျေးမှုစင်တာ၏ တာဝန်ခံ Ms. Xu Ling က “ရန်ကုန်တရုတ်ယဉ်ကျေးမှုစင်တာက ကျင်းပတဲ့ မှတ်တမ်းရုပ်ရှင် တင်ဆက်ပြသမှုအစီအစဉ်ဟာဆိုရင် တရုတ်နိုင်ငံ ယဉ်ကျေးမှုနှင့်ခရီးသွားလာရေးဝန်ကြီးဌာနနဲ့ China Media Group (CMG) တို့ အတူတကွ ပူးပေါင်းကျင်းပတဲ့ ပထမအကြိမ် တစ်ကမ္ဘာလုံးဆိုင်ရာ “တရုတ်မှတ်တမ်းရုပ်ရှင်ပွဲတော်” ရဲ့ တစ်စိတ်တစ်ပိုင်း ဖြစ်ပါတယ်။ ရည်ရွယ်ချက်ကတော့ ရုပ်ရှင်ကြည့်ရှုခြင်းမှတစ်ဆင့် မိတ်ဆွေဖွဲ့ခြင်း၊ ပူးပေါင်းဆောင်ရွက်ခြင်းမှတစ်ဆင့် ဖလှယ်ဆက်ဆံမှုတိုးမြှင့်ခြင်းများ လုပ်ဆောင်နိုင်ရန်အတွက် ဖြစ်ပါတယ်။ ယခုတစ်ခေါက်မှာ ရန်ကုန်မြင့်တက် တရုတ်ဘာသာစကားသင်တန်းကျောင်းမှ ဆရာ/ဆရာမ၊ ကျောင်းသူ/ကျောင်းသားတွေကို ဖိတ်ကြားရခြင်းကတော့ မြန်မာကျောင်းသားလူငယ်တွေကို တရုတ်နိုင်ငံအကြောင်း ဘက်ပေါင်းစုံ၊ ကဏ္ဍပေါင်းစုံကနေ သိရှိနားလည်စေဖို့အတွက် ပေါင်းကူးတံတားအဖြစ် ဖန်တီးပေးခြင်းဖြစ်ပြီး မြန်မာ-တရုတ် ယဉ်ကျေးမှု အပြန်အလှန် လေ့လာသင်ယူ မျှဝေဖလှယ်နိုင်ရန်နဲ့ နှစ်နိုင်ငံပြည်သူများ အချင်းချင်း နှလုံးသားချင်း ပိုမိုနီးစပ်စေရန်အတွက် ကြိုးပမ်းခြင်း ဖြစ်ပါတယ်” ဟု ပြောကြားခဲ့ပါသည်။

မြန်မာနိုင်ငံ မြင့်တက်ပညာရေးအသင်း၏ ဥက္ကဋ္ဌ Mr. Chen Ziting (ဦးလှအောင်) က “မြန်မာနိုင်ငံနဲ့ တရုတ်နိုင်ငံက နယ်နိမိတ်ချင်း ထိစပ်နေပြီး စာပေယဉ်ကျေးမှုတွေ အပြန်အလှန် ဆက်စပ်နေပါတယ်။ နှစ်နိုင်ငံပြည်သူ အချင်းချင်းလည်း ရင်းနှီးကြပါတယ်။ ဟိုးအရင်ကတည်းက မြန်မာနိုင်ငံနဲ့ တရုတ်နိုင်ငံဟာ ရင်းနှီးတဲ့ဆက်ဆံရေးကို စဉ်ဆက်မပြတ် ထိန်းသိမ်းခဲ့ကြပါတယ်။ ပေါက်ဖော်သံယောဇဉ်ဟာလည်း နှစ်ပေါင်းထောင်ချီ ကြာမြင့်တဲ့အထိတိုင် ဆက်လက် ခိုင်မြဲနေဆဲ ဖြစ်ပါတယ်။ “မြန်မာ-တရုတ် သံတမန်ဆက်ဆံရေး ထူထောင်ခြင်း” အထိမ်းအမှတ် ဓာတ်ပုံပြပွဲကို လေ့လာရတာ ကျွန်တော် အရမ်းပီတိဖြစ်မိပါတယ် ” ဟု ပြောကြားခဲ့သည်။

ရန်ကုန်မြင့်တက် တရုတ်ဘာသာစကားသင်တန်းကျောင်းမှ ဒုတိယကျောင်းအုပ်ကြီး Ms. Yang Zuheng က “ဒီနေ့က ကပ်ရောဂါဖြစ်ပွားပြီးနောက်ပိုင်း ကျောင်းရဲ့ ပထမဆုံးကျောင်းပြင်ပလှုပ်ရှားမှု ဖြစ်ပါတယ်။ ရန်ကုန်တရုတ်ယဉ်ကျေးမှုစင်တာက ကလေးတွေအတွက် ဗဟုသုတနဲ့ ပျော်ရွှင်မှုတွေ ဖန်တီးပေးတယ်။ ကလေးတွေကို ကျောင်းသင်ရိုးစာအုပ်ပြင်ပက တရုတ်နိုင်ငံအကြောင်း မိတ်ဆက်ပေးပြီး တရုတ်ယဉ်ကျေးမှုနဲ့ ထိတွေ့ခွင့်ပိုရအောင် လုပ်ဆောင်ပေးတဲ့အတွက် ရန်ကုန်တရုတ်ယဉ်ကျေးမှုစင်တာကို အထူးပဲ ကျေးဇူးတင်ရှိပါတယ်။ မှတ်တမ်းရုပ်ရှင်ကြည့်ပြီး တရုတ်ယဉ်ကျေးမှုတွေကို အနီးကပ်လေ့လာခွင့်ရတဲ့ တစ်ချိန်တည်းမှာပဲ အပြန်အလှန် လှုပ်ရှားမှုအစီအစဉ်တွေက ကလေးတွေရဲ့ အတွေးအမြင်တွေကို လှုံ့ဆော်ပေးပြီး တရုတ်ယဉ်ကျေးမှုအပေါ် စိတ်ဝင်စားမှု ပိုတိုးပွားစေပါတယ်” ဟု ပြောကြားခဲ့သည်။

ကျောင်းသား မောင်ဝဏ္ဏဘုန်းက “ကျွန်တော် ‘Fujian Puppetry’ ကို ကြိုက်ပါတယ်။ အပြန်အလှန် လှုပ်ရှားမှုဂိမ်းအစီအစဉ်က အရမ်းစိတ်ဝင်စားဖို့ ကောင်းပါတယ်။ ကျွန်တော် မေးခွန်းအများကြီး ဖြေနိုင်ခဲ့လို့ အရမ်းပျော်ပါတယ်။ ဒီနေ့ အရမ်းကို ပျော်ရွှင်ရပါတယ်။ ရန်ကုန်တရုတ်ယဉ်ကျေးမှုစင်တာရဲ့ နောက်ပိုင်းလှုပ်ရှားမှုပွဲတွေမှာ ထပ်ပြီးပါဝင်ခွင့်ရဖို့ မျှော်လင့်ပါတယ်” ဟု ပြောကြားခဲ့သည်။

အစီအစဉ်အပြီးတွင် ရန်ကုန်မြင့်တက် တရုတ်ဘာသာစကားသင်တန်းကျောင်းမှ ဆရာ/ဆရာမများနှင့် ကျောင်းသူ/ကျောင်းသားများက တရုတ်မှတ်တမ်းရုပ်ရှင် တင်ဆက်ပြသမှုအစီအစဉ်၌ အဓိပ္ပာယ်ရှိ၍ စိတ်ဝင်စားဖွယ်ကောင်းပြီး ဤကဲ့သို့သော အစီအစဉ်မျိုးကို မကြာခဏ ကျင်းပပေးနိုင်ရန် မျှော်လင့်သည်ဟု အသီးသီး မှတ်ချက်ပြုပြောကြားခဲ့ကြောင်း သိရသည်။ （Xinhua）

#China #Culture #ChinaCulturalCenter #Yangon #Xinhua #Xinhuamyanmar #တရုတ် #ယဉ်ကျေးမှု #ရန်ကုန်တရုတ်ယဉ်ကျေးမှုစင်တာ #ဆင်ဟွာ