တရုတ်-မြန်မာ နှစ်နိုင်ငံ ကုန်သွယ်ရေး နှင့် ရင်းနှီးမြှုပ်နှံမှု လုပ်ငန်းများ ပိုမို တိုးမြှင့်အောင် ဆောင်ရွက်နိုင်မည်ဟု ယုံကြည်ကြောင်း UMFCCI ဥက္ကဋ္ဌ ပြောကြား

ရန်ကုန် ၊ မတ် ၁၉ ရက် (ဆင်ဟွာ)

မြန်မာနိုင်ငံကုန်သည်စက်မှုအသင်းချုပ်(UMFCCI) ဥက္ကဋ္ဌ ဦးဇော်မင်းဝင်း က တရုတ်-မြန်မာ နှစ်နိုင်ငံ ကုန်သွယ်ရေး နှင့် ရင်းနှီးမြှုပ်နှံမှု လုပ်ငန်းများ ယခင်ထက် ပိုမို တိုးမြှင့်အောင် ဆောင်ရွက်နိုင်မည် ဟု ယုံကြည်ကြောင်း မတ်လ ၁၉ ရက်နေ့ နံနက်ပိုင်းတွင် ရန်ကုန်မြို့ရှိ Sule Shangrila Hotel တွင် ကျင်းပ ပြုလုပ်ခဲ့သော “ဖူကျန့်(တရုတ်)ရက်သတ္တပတ် ဖွင့်ပွဲ နှင့် စီးပွားရေး ၊ ကူးသန်းရောင်းဝယ်ရေး နှင့် ခရီးသွား လုပ်ငန်း ဆိုင်ရာ မြှင့်တင်ခြင်း နှင့် ချိတ်ဆက်ဆောင်ရွက်ခြင်း” အခမ်းအနားတွင် ပြောကြား ခဲ့ခြင်း ဖြစ်သည်။

ဦးဇော်မင်းဝင် မှ အခမ်းအနား အဖွင့်အမှာစကား ပြောကြားရာတွင် ယခုကဲ့သို့သော အခမ်းအနား ကို မြန်မာ နိုင်ငံ တွင် လာရောက်ကျင်းပပြုလုပ်ခြင်းသည် နှစ်နိုင်ငံ စီးပွားရေး နှင့် ယဉ်ကျေးမှု ပူးပေါင်းဆောင်ရွက်ရေး တိုးမြှင့်ရေး ၊ တရုတ် နိုင်ငံ ဖူကျန့်ပြည်နယ် နှင့် မြန်မာ နိုင်ငံ အကြား ဆက်ဆံရေး ခိုင်မာစေရေး အတွက် အလွန်အကျိုးရှိကြောင်း ၊ မြန်မာ နိုင်ငံ တွင်ရင်းနှီးမြှုပ်နှံမှု ပြုလုပ်ခြင်းမှာလည်း တရုတ် နိုင်ငံ မှ အများဆုံး ဖြစ်ကြောင်း ၊ ယခုကျင်းပသည့် အခမ်းအနား သည် နှစ်နိုင်ငံ အကြား ရှိခဲ့ပြီးသော မိတ်ဖက်ဆက်ဆံရေး ၊ နှစ်ဖက်အကျိုးဖြစ်ထွန်းစေသည့် အပြန်အလှန် ကုန်သွယ်ရေး နှင့် ရင်းနှီးမြှုပ်နှံမှု လုပ်ငန်းများကို ယခင်ထက် ပိုမို တိုးမြှင့်အောင် ဆောင်ရွက်ပေးနိုင်လိမ့်မည်ဟု ယုံကြည်ကြောင်း ပြောကြား ခဲ့သည်။

“ဖူကျန့်(တရုတ်)ရက်သတ္တပတ် ဖွင့်ပွဲ နှင့် စီးပွားရေး ၊ ကူးသန်းရောင်းဝယ်ရေး နှင့် ခရီးသွား လုပ်ငန်း ဆိုင်ရာ မြှင့်တင်ခြင်း နှင့် ချိတ်ဆက်ဆောင်ရွက်ခြင်း” အခမ်းအနား မစတင်မီ ရန်ကုန်မြို့တော်ဝန် ဒေါက်တာ ဦးမောင်မောင်စိုး သည် ဖူကျန့်ပြည်နယ် ပြည်သူ့အစိုးရ ပြည်ပဆက်ဆံရေး ဌာန မှ ဒုတိယ ဌာနမှူး လီဟုန် နှင့် ကိုယ်စားလှယ် အဖွဲ့တို့အား လက်ခံတွေ့ဆုံ ခဲ့ပြီး နှစ်နိုင်ငံ ပူးပေါင်းဆောင်ရွက်ရေး နှင့် ပတ်သက်သည့် ကိစ္စရပ် များကို ဆွေးနွေး ခဲ့ကြသည်။

ရန်ကုန်မြို့တော်ဝန် ဒေါက်တာ ဦးမောင်မောင်စိုး က ဖူကျန့်ပြည်နယ် ပြည်သူ့အစိုးရ ပြည်ပဆက်ဆံရေး ဌာန မှ ဒုတိယ ဌာနမှူး လီဟုန် နှင့် ကိုယ်စားလှယ် အဖွဲ့တို့အား လက်ခံတွေ့ဆုံစဉ်(ဆင်ဟွာ)

ဖူကျန့်ပြည်နယ် ပြည်သူ့အစိုးရ ပြည်ပဆက်ဆံရေး ဌာန မှ ဒုတိယ ဌာနမှူး လီဟုန် မှ အဖွင့်အမှာစကား ပြောကြားစဉ်(ဆင်ဟွာ)

ဖူကျန့်ပြည်နယ် ပြည်သူ့အစိုးရ ပြည်ပဆက်ဆံရေး ဌာန မှ ဒုတိယ ဌာနမှူး လီဟုန် မှ အဖွင့်အမှာစကား ပြောကြားစဉ်(ဆင်ဟွာ)

ရန်ကုန်မြို့တော်ဝန် ဒေါက်တာ ဦးမောင်မောင်စိုး မှ အဖွင့်အမှာစကား ပြောကြားစဉ်(ဆင်ဟွာ)

“ဖူကျန့်(တရုတ်)ရက်သတ္တပတ် ဖွင့်ပွဲ နှင့် စီးပွားရေး ၊ ကူးသန်းရောင်းဝယ်ရေး နှင့် ခရီးသွား လုပ်ငန်း ဆိုင်ရာ မြှင့်တင်ခြင်း နှင့် ချိတ်ဆက်ဆောင်ရွက်ခြင်း” အခမ်းအနား မြင်ကွင်း

“ဖူကျန့်(တရုတ်)ရက်သတ္တပတ် ဖွင့်ပွဲ နှင့် စီးပွားရေး ၊ ကူးသန်းရောင်းဝယ်ရေး နှင့် ခရီးသွား လုပ်ငန်း ဆိုင်ရာ မြှင့်တင်ခြင်း နှင့် ချိတ်ဆက်ဆောင်ရွက်ခြင်း” အခမ်းအနား မြင်ကွင်း

ဖူကျန့်ပြည်နယ် ပြည်သူ့အစိုးရ ပြည်ပဆက်ဆံရေး ဌာန မှ ဒုတိယ ဌာနမှူး လီဟုန် က အဖွင့်အမှာစကား ပြောကြားရာတွင် ယခုကဲ့သို့သော အခမ်းအနား ကျင်းပခြင်းဖြင့် တရုတ်-မြန်မာ နှစ်နိုင်ငံ ပူးပေါင်းဆောင်ရွက်မှု ကိုတိုးမြှင့်ပြီး နှစ်နိုင်ငံ မိတ်ဆွေချစ်ကြည်ပူးပေါင်းဆက်ဆံရေး ကို ပိုမိုခိုင်မာစေလိုကြောင်း ၊ တရုတ် နိုင်ငံ မှ ဖော်ဆောင်နေသည့် ခေတ်သစ်ပိုးလမ်းမကြီး အစီအစဉ် သည်လည်း ဖူကျန့် ပြည်နယ် နှင့် မြန်မာ နိုင်ငံ အကြား ပူးပေါင်းဆောင်ရွက်သည့် အခန်းကဏ္ဍ ကို ပိုမို ကျယ်ပြန့်လာစေခဲ့ကြောင်း ၊ ၂၀၁၆ ခုနှစ်တွင် ဖူကျန့်ပြည်နယ် နှင့် မြန်မာ နိုင်ငံ အကြား ကုန်သွယ်မှု စုစုပေါင်း တန်ဖိုးသည် အမေရိကန် ဒေါ်လာ သန်း၃၀၀ ရှိခဲ့ကြောင်း ၊ ယခု အခမ်းအနား ကျင်းပရခြင်း၏ ရည်ရွယ်ချက်မှာ တရုတ် နိုင်ငံ ဖူကျန့်ပြည်နယ် နှင့် မြန်မာ နိုင်ငံ အကြား ကုန်သွယ်ရေး ၊ စီးပွားရေး နှင့် ခရီးသွားလာရေး စသည့် ကဏ္ဍများတွင် ပူးပေါင်းဆောင်ရွက်မှုများ ပိုမို တိုးမြှင့်နိုင်စေရန် အတွက် ဖြစ်ကြောင်း ပြောကြား ခဲ့သည်။

ရန်ကုန်မြို့တော်ဝန် ဒေါက်တာ ဦးမောင်မောင်စိုး မှ အခမ်းအနား အဖွင့်အမှာစကား ပြောကြားရာတွင် လက်ရှိ မြန်မာ နိုင်ငံ အစိုးရ သည် နိုင်ငံတော် စီးပွားရေး ဖွံ့ဖြိုးတိုးတက်အောင် အင်တိုက်အားတိုက်ဆောင်ရွက်လျက်ရှိရာတွင် ပြည်တွင်းပြည်ပ မှ လုပ်ငန်းရှင်များ ၏ ပူးပေါင်းပါဝင်ဆောင်ရွက်မှုသည် အရေးပါသည့် အခန်းကဏ္ဍ တစ်ရပ်အနေဖြင့် ပါဝင်လျက်ရှိကြောင်း ၊ ယခု ကဲ့သို့သော ပူးပေါင်းဆောင်ရွက်မှု တိုးမြှင့်စေသည့် ပွဲများသည် နိုင်ငံခြား ရင်းနှီးမြှုပ်နှံမှုများ ဝင်ရောက်စေရန် ၊ နိုင်ငံခြား ကုမ္ပဏီများ နှင့် ပြည်တွင်း ကုမ္ပဏီများ ချိတ်ဆက်ပူးပေါင်း ဆောင်ရွက်နိုင်စေရန် အတွက် အခွင့်အလမ်းများ ဖန်တီးပေးသည့် ပွဲဖြစ်ကြောင်း ၊ ထို့ကြောင့် ရရှိလာသည့် အခွင့်အရေးကို အရယူပြီး လက်တွေ့ လုပ်ငန်းပူးပေါင်း အကောင်အထည် ဖော်နိုင်ကြသည့် အထိ ဆောင်ရွက်သွားရန် တိုက်တွန်းကြောင်း ပြောကြား ခဲ့သည်။

ယခု ကျင်းပ ပြုလုပ်ခဲ့သော အခမ်းအနား သည် ဖူကျန့်ပြည်နယ် ပြည်သူ့အစိုးရ ပြည်ပဆက်ဆံရေး ဌာန ၊ နန်ဖိန် မြို့ ပြည်သူ့အစိုးရ ဌာန နှင့် ကျင့်ကျန်းမြို့ ပြည်သူ့အစိုးရ ဌာန တို့မှ အဓိက ဦးစီးဆောင်ရွက်ခဲ့ခြင်းဖြစ်ပြီး မြန်မာနိုင်ငံဆိုင်ရာ တရုတ် နိုင်ငံ သံရုံး ၏ ကူညီထောက်ပံ့မှု နှင့် ရွှေသံလွှင် ကုမ္ပဏီ ၏ တွဲဖက်လုပ်ကိုင်ဆောင်ရွက်မှု တို့ဖြင့် ပြုလုပ် ခဲ့ခြင်းဖြစ်ကြောင်း သိရှိရသည်။

အခမ်းအနားသို့ မြန်မာ နိုင်ငံ ဆိုင်ရာ တရုတ် နိုင်ငံ သံရုံး ပြန်ကြားရေးနှင့် ပြည်သူ့ဆက်ဆံရေး သံမှူး ရန်ဆုံကျိန်း ၊ ဖူကျန့်ပြည်နယ် ပြည်သူ့အစိုးရ ပြည်ပဆက်ဆံရေး ဌာန မှ ဒုတိယ ဌာနမှူး လီဟုန် ၊ နန်ဖိန် မြို့ ဒုတိယ မြို့တော်ဝန် လော်အိမ်းဖိန် ၊ ကျင့်ကျန်း မြို့ ဒုတိယ မြို့တော်ဝန် ကျွန်းထျန်ဟိုင် ၊ ရန်ကုန် မြို့တော်ဝန် ဒေါက်တာ ဦးမောင်မောင်စိုး ၊ ရန်ကုန်တိုင်း ဒေသကြီး အစိုးရ အဖွဲ့မှဝန်ကြီး ဦးဇော်အေးမောင် ၊ မြန်မာနိုင်ငံ ကုန်သည်စက်မှုအသင်းချုပ် ဥက္ကဋ္ဌ ဦးဇော်မင်းဝင်း ၊ မြန်မာ-တရုတ် ချစ်ကြည်ရေး အသင်း ဒုတိယ ဥက္ကဋ္ဌ ဦးစိုးဝင်း ၊ မြန်မာ-တရုတ် ပူးပေါင်းဖလှယ်ရေးအသင်း ဥက္ကဋ္ဌ ဦးသစ္စာ နှင့် နှစ်နိုင်ငံ ကဏ္ဍအသီးသီး မှ စီးပွားလုပ်ငန်း ဆိုင်ရာ ကိုယ်စားလှယ်များ စုစုပေါင်း ၁၉၀ ဦးခန့် အခမ်းအနားကို တက်ရောက် ခဲ့ကြသည်။

အခမ်းအနားကို ကြွရောက်လာကြသည့် ဧည့်သည်တော်များ မှ အခမ်းအနားကို ဖွဲကြိုးဖြတ် ဖွင့်လှစ်ပေး ခဲ့ကြပြီး တရုတ် နိုင်ငံ စီးပွားရေး လုပ်ငန်း မှ ကိုယ်စားလှယ် အသီးသီး တို့က လုပ်ငန်းဆိုင်ရာ ရှင်းလင်းတင်ပြမှုများ ပြုလုပ်ခဲ့ကြကာ နှစ်နိုင်ငံ ကဏ္ဍ အသီးသီး မှ စီးပွားရေး လုပ်ငန်းရှင်များက အချင်းချင်း ဆွေးနွေးမှု များပြုလုပ် ခဲ့ကြကြောင်း သိရှိခဲ့ရသည်။(Xinhua)