China National Petroleum Corporation (CNPC) ၏ “E-Light” ယဉ်ကျေးမှုဖြတ်ကျော် ဖလှယ်ရေး ကမ္ဘာလုံးဆိုင်ရာ ပွဲဦးထွက် လှုပ်ရှားမှု မြန်မာနိုင်ငံ၌ စတင်

ရန်ကုန်၊ ဒီဇင်ဘာ ၁၆ ရက်

မြန်မာနိုင်ငံ မဒေးကျွန်းရွာသား ဦးဖျောလင်းဆော့သည် ဒီဇင်ဘာ ၁၂ ရက် ညနေ ၅ နာရီတိတိတွင် စောစောစီးစီး ပြင်ဆင်ပြီးစီးကာ တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်း၏ မဒေးကျွန်း ကျောက်ဖြူ စီမံခန့်ခွဲရေးရုံးသို့ တန်းတန်းမတ်မတ် သွားရောက်ခဲ့သည်။ ၎င်းနှင့်အတူ မိသားစုဝင်များ၊ ကျွန်းပေါ်ရှိ ဒေသခံ ၅၀ ကျော်တို့လည်း လိုက်ပါခဲ့ကြသည်။ တစ်နာရီအကြာတွင် ၎င်းတို့ စောင့်မျှော်နေသော “မြစ်တစ်စင်း၏ ခံစားမှု၊ ကမ်းနှစ်ဖက်မှ ရုပ်ရှင်များ” ရုပ်ရှင်ပြသပွဲသီတင်းပတ်ကို တရားဝင် ဖွင့်လှစ်လိုက်သည်။ဒီဇင်ဘာ ၁၁ ရက်မှ ၁၂ ရက်အထိ China National Petroleum Corporation (CNPC) ၏ “E-Light” ယဉ်ကျေးမှုဖြတ်ကျော် ဖလှယ်ရေး ကမ္ဘာလုံးဆိုင်ရာ ပွဲဦးထွက် လှုပ်ရှားမှုကို မြန်မာနိုင်ငံ၌ စတင်ခဲ့သည်။ ယခုနှစ်သည် တရုတ်-မြန်မာ သံတမန်ဆက်ဆံရေး ထူထောင်ခြင်း ၇၅ နှစ်ပြည့်နှစ်ပတ်လည် ဖြစ်သကဲ့သို့ တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်း စီမံကိန်း စတင်တည်ဆောက်ခဲ့သည်မှာ ၁၅ နှစ်ပြည့်မြောက်သည့် နှစ်လည်းဖြစ်သည်။ အဆိုပါ လှုပ်ရှားမှုကို CNPC Group Corporate Culture Department မှ စီမံကြီးကြပ်ပြီး China Oil & Gas Pipeline Company (CNPC International Pipeline Company) နှင့် ပူးပေါင်းဆောင်ရွက်ကာ ရန်ကုန်၊ မန္တလေးနှင့် မဒေးကျွန်းတို့တွင် ရုပ်ရှင်ပြသပွဲသီတင်းပတ်၊ Open Day၊ ဓာတ်ပုံပြပွဲနှင့် ဆွေးနွေးပွဲများ ပါဝင်သည့် ယဉ်ကျေးမှုဖြတ်ကျော် ဖလှယ်ရေး အစီအစဉ်များကို တစ်ပြိုင်နက် ကျင်းပခဲ့သည်။

ယဉ်ကျေးမှု ဖလှယ်မှုနှင့် အပြန်အလှန် သင်ယူမှုကို မြှင့်တင်ရန်နှင့် ပြည်သူအချင်းချင်း စိတ်ချင်းနီးစပ်မှုကို တိုးမြှင့်ရန်အတွက် CNPC သည် နှစ်ပေါင်းများစွာ လုပ်ဆောင်ခဲ့သည့် လုပ်ငန်းများအပေါ် အခြေခံ၍ အရင်းအမြစ်များကို ထပ်မံပေါင်းစပ်ပြီး ယဉ်ကျေးမှုဖြတ်ကျော် ဖလှယ်ရေး အထူးအမှတ်တံဆိပ်ဖြစ်သော “E-Light” (စွမ်းအင်အလင်းရောင်၊ ကမ္ဘာမြေကို တောက်ပစေ) ကို တီထွင်ဖန်တီးခဲ့ကာ CNPC ၏ ပြည်ပအမှတ်တံဆိပ်ပုံရိပ်တည်ဆောက်ခြင်းနှင့် ယဉ်ကျေးမှု ဖလှယ်ရေးလုပ်ငန်းများကို စနစ်တကျ ဖြန့်ကြက် ဆောင်ရွက်လျက်ရှိသည်။

ဒီဇင်ဘာ ၁၁ ရက် ညနေပိုင်းတွင် CNPC သည် ရန်ကုန်၌ “E-Light” ကော်ပိုရိတ်ယဉ်ကျေးမှု မိတ်ဆက်ပွဲကို ကျင်းပခဲ့ပြီး CNPC ၏ ၇၅ နှစ်ကြာ ဖွံ့ဖြိုးတိုးတက်မှု ခရီးစဉ်ကို အပြည့်အဝ မိတ်ဆက်ပေးခဲ့သည်။ ထို့အပြင် “တရုတ်-မြန်မာ သံတမန်ဆက်ဆံရေး ၇၅ နှစ်ပြည့် အထိမ်းအမှတ် – တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်း စီမံကိန်း တည်ဆောက်မှု ၁၅ နှစ်ပြည့်” ဓာတ်ပုံပြပွဲနှင့် “ယဉ်ကျေးမှုပေါင်းစပ်မှုကို တွန်းအားပေးခြင်း၊ ပေါက်ဖော်ချစ်ကြည်ရေး ဆက်လက်ရေးထိုးခြင်း” မီဒီယာ ဆွေးနွေးပွဲတို့ကိုလည်း ကျင်းပခဲ့သည်။ SKYNET ရုပ်မြင်သံကြားလိုင်း၊ Daily Eleven သတင်းစာ၊ စံတော်ချိန်သတင်းစာ အပါအဝင် မြန်မာမီဒီယာအများအပြား၊ မြန်မာနိုင်ငံ မဟာဗျူဟာနှင့် နိုင်ငံတကာရေးရာ လေ့လာရေးဗဟိုဌာန (MISIS)၊ မြန်မာနိုင်ငံရှိ တရုတ်ဗဟိုမီဒီယာများ၊ China Foundation for Rural Development (CFRD) မှ တာဝန်ရှိသူများ ပါဝင်တက်ရောက်ခဲ့ကြသည်။

စံတော်ချိန်သတင်းစာ အယ်ဒီတာချုပ် ဦးလွင်မင်းဦးက တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်း စီမံကိန်းက ဒေသခံလူ့အဖွဲ့အစည်းအပေါ် လူမှုအကျိုးပြု လှူဒါန်းမှုများအတွက် ကျေးဇူးတင်ရှိကြောင်း ပြောကြားခဲ့ပြီး နှစ်နိုင်ငံ ပေါက်ဖော်ချစ်ကြည်ရေးကို အခြေခံ၍ အမျိုးမျိုးသော လှုပ်ရှားမှုများကို ရေရှည်တည်တံ့စွာ ဆက်လက် ဆောင်ရွက်သွားရန် မျှော်လင့်ကြောင်း ပြောကြားခဲ့သည်။

ဒီဇင်ဘာ ၁၂ ရက် ညနေပိုင်းတွင် မန္တလေးနှင့် မဒေးကျွန်းတို့၌ “မြစ်တစ်စင်း၏ ခံစားမှု၊ ကမ်းနှစ်ဖက်မှ ရုပ်ရှင်များ” ရုပ်ရှင်ပြသပွဲသီတင်းပတ်ကို တစ်ပြိုင်နက် ကျင်းပခဲ့ရာ ပရိသတ် ၃၀၀ နီးပါးသည် မြန်မာဘာသာဖြင့် ဖော်ပြထားသည့် 《လှပသော တရုတ်နိုင်ငံ》နှင့် 《တစ်ကိုယ်တော် လပေါ်သွားခြင်း》 ရုပ်ရှင်များ၏ ရုပ်သံလောကအတွင်းမှတစ်ဆင့် တရုတ်နိုင်ငံနှင့် ပိုမိုနီးစပ်လာကာ ပျော်ရွှင်ဖွယ်ရာ အချိန်များကို ခံစားခဲ့ကြသည်။ ရုပ်ရှင်မကြည့်မီ ဒေသခံတက္ကသိုလ်များမှ ဆရာ/ဆရာမများနှင့် မြန်မာဝန်ထမ်းမိသားစုဝင်များသည် မန္တလေးရှိ ရုံး၌ တည်ရှိသော ပိုးလမ်းမ စာအုပ်တိုက်၊ ထိန်းချုပ်ရေးစင်တာနှင့် ကော်ပိုရိတ်ယဉ်ကျေးမှု ပြခန်းတို့ကို လည်ပတ်ကြည့်ရှုခဲ့ကြပြီး တရုတ်ယဉ်ကျေးမှုနှင့် CNPC အကြောင်းကို ပိုမိုနက်ရှိုင်းစွာ နားလည်သဘောပေါက်ခဲ့ကြသည်။

မြန်မာဆရာမ ဒေါ်ဒွေးဖူချင်က ဤလှုပ်ရှားမှုကြောင့် မိမိစိတ်ထဲရှိ တရုတ်နိုင်ငံသည် ပိုမိုတိကျပြတ်သားပြီး လက်တွေ့ကျလာကြောင်း၊ နောင်တွင် ကျောင်းသားများကို ခေါ်ဆောင်လာလိုပြီး ၎င်းတို့အား တရုတ်ယဉ်ကျေးမှု၏ ဆွဲဆောင်မှုကို နိုင်ငံခြားသို့ မသွားဘဲ ခံစားစေချင်ကြောင်း ပြောကြားခဲ့သည်။ မဒေးကျွန်းတွင် ဒေသခံရွာသားများနှင့် ကျောက်ဖြူ စီမံခန့်ခွဲရေးရုံး ဝန်ထမ်းများသည် ရုပ်ရှင်ကို အတူတကွ ကြည့်ရှုခဲ့ကြသည်။ ရွာသား ဦးအောင်ကျော်ဆွေက စိတ်လှုပ်ရှားစွာဖြင့် “ဒီနှစ်တွေအတွင်း CNPC က ကျွန်တော်တို့အတွက် ရေလှောင်ကန်တွေ ဆောက်ပေးတယ်၊ လမ်းတွေ ပြင်ပေးတယ်၊ မီးသွယ်ပေးတယ်၊ ကျွန်တော်တို့ရဲ့ ဘဝတွေကို ပိုပြီး အဆင်ပြေစေတယ်။ ဒီနေ့မှာလည်း ဒီလိုကောင်းမွန်တဲ့ ရုပ်ရှင်တွေက ကျွန်တော်တို့ကို ပျော်ရွှင်မှုတွေ ယူဆောင်လာပေးတယ်” ဟု ပြောကြားခဲ့သည်။

မြန်မာ ရွှေဖီးနစ်သတင်းစာ၊ စံတော်ချိန်သတင်းစာ အပါအဝင် မီဒီယာ ၁၀ ခုကျော်က အဆိုပါ လှုပ်ရှားမှုများကို သတင်းဖော်ပြခဲ့သည်။ မြန်မာနိုင်ငံ မီဒီယာကောင်စီ ဒုတိယဥက္ကဋ္ဌ ဦးခင်မောင်ဇော်က “တရုတ်-မြန်မာ နှစ်နိုင်ငံ ပြည်သူတွေအကြား ပူးပေါင်းဆောင်ရွက်မှုနဲ့ ချစ်ကြည်ရေးကို နက်ရှိုင်းအောင် လုပ်ဆောင်ဖို့အတွက် မြန်မာနိုင်ငံမှာ ရင်းနှီးမြှုပ်နှံထားတဲ့ တရုတ်ကုမ္ပဏီတွေရဲ့ အားပေးထောက်ခံမှုက အများကြီးလိုအပ်ပါတယ်” ဟု သုံးသပ်ပြောကြားခဲ့သည်။ တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်း၏ အထွေထွေမန်နေဂျာ ဝမ်ချန်း (Wang Qiang) က “E-light” အမှတ်တံဆိပ် တည်ဆောက်ရေး လှုပ်ရှားမှုသည် CNPC ၏ ဇာတ်လမ်းကို ကောင်းမွန်စွာ ပြောပြနိုင်မည့် နည်းလမ်းနှင့် လမ်းကြောင်းကို ပေးအပ်ထားကြောင်း ပြောကြားခဲ့သည်။

“ကျွန်ုပ်တို့သည် လက်တွေ့အခြေအနေနှင့် ပေါင်းစပ်ပြီး မှန်ကန်သော အနေအထားကို ရှာဖွေကာ၊ ‘နေ့စဉ်ဘဝနှင့် ပိုမိုနီးစပ်သော’ နည်းလမ်းကို အသုံးပြု၍ ပိုမို ပွင့်လင်းပြီး ရိုးသားသော သဘောထားဖြင့် မြန်မာပြည်သူများ၏ ယုံကြည်စိတ်ချရသော ရေရှည်မိတ်ဖက် ဖြစ်လာစေရန် ကြိုးပမ်းသွားမည်ဖြစ်သည်” ဟု ၎င်းက ပြောကြားခဲ့သည်။