အာဖဂန် ရွေးကောက်ပွဲ မဲပေးခြင်း ဒုတိယမြောက်နေ့တွင် လမ်းဘေးဗုံးပေါက်ကွဲမှုကြောင့် လူ ၁၁ ဦး သေဆုံး

ဂျလာလာဘတ်၊ အာဖဂန်နစ္စတန်၊ အောက်တိုဘာ ၂၁ ရက် (ဆင်ဟွာ)

အာဖဂန်နစ္စတန်နိုင်ငံတွင် လွှတ်တော်ရွေးကောက်ပွဲ ဒုတိယနေ့အဖြစ် ပြည်နယ် ၃၄ ခုအနက် ၁၄ ခုတွင် အောက်တိုဘာလ ၂၁ ရက်တွင် မဲပေးမှုဆက်လက်ကျင်းပခဲ့စဉ် နိုင်ငံအရှေ့ပိုင်း Nagharhar ပြည်နယ်တွင် လမ်းဘေးဗုံးတစ်လုံးပေါက်ကွဲမှုကြောင့် အရပ်သား ၁၁ ဦး သေဆုံးခဲံကြောင်း ပြည်နယ်ဆိုင်ရာ တာဝန်ရှိသူ Attaullah Khogiani က ပြောကြားခဲ့သည်။

Kandahar နှင့် Ghazni ပြည်နယ်များတွင်မူ လုံခြုံရေးအကြောင်းပြချက်များကြောင့် ရွေးကောက်ပွဲကို ရွှေ့ဆိုင်းထားခဲ့သည်။“Achin ခရိုင်မှာ ဒီနေ့ ဒေသစံတော်ချိန် မနက် ၁၁း၀၀ နာရီလောက်က အရပ်သားတစ်ဦးရဲ့ကားမှာ စစ်သွေးကြွတွေက မိုင်းထောင်ထားခဲ့တာ။ အမျိုးသမီးတစ်ဦးနဲ့ ကလေးခြောက်ဦးအပါအဝင် အရပ်သား ၁၁ ဦး သေဆုံးသွားတယ်” ဟု Khogiani က ဆင်ဟွာသို့ ပြောခဲ့သည်။

ရွေးကောက်ပွဲ မဲပေးခြင်းကို နှောင့်ယှက်မည်ဟု တာလီဘန်စစ်သွေးကြွများက ကြွေးကြော်ထားပြီး အောက်တိုဘာလ ၂၀ ရက် ရွေးကောက်ပွဲ ပထမနေ့တွင် တိုက်ခိုက်မှု ၁၆၈ ခု လုပ်ဆောင်ခဲ့ကာ လူသေဆုံးမှုများရှိခဲ့ကြောင်း၊ Nangarhar လမ်းဘေးဗုံးဖောက်ခွဲမှုနှင့်ပတ်သက်၍ မှတ်ချက်ပြုပြောကြားခဲ့ခြင်း မရှိသေးကြောင်း သိရသည်။ (Xinhua)