ဆီးရီးယားဓာတုလက်နက်ကိစ္စကို ဖြစ်နိုင်ခြေရှိသော သက်သေပြချက် လေ့လာရန် အမေရိကန် နှင့် ရုရှားတို့သဘောတူ

မော်စကို ၊ ဧပြီ ၂၂ ရက် (ဆင်ဟွာ)

ဆီးရီးယားနိုင်ငံ Idlib ပြည်နယ်၌ ဓာတုလက်နက်ဖြင့်တိုက်ခိုက်ခဲ့သည့် ကိစ္စရပ်ကို ဖြစ်နိုင်ခြေရှိသော သက်သေပြချက် လေ့လာရန် ရုရှား နှင့် အမေရိကန် နိုင်ငံတို့သည် ဧပြီလ ၂၁ ရက်က သဘောတူညီခဲ့ကြကြောင်း ရုရှားနိုင်ငံ နိုင်ငံခြားရေးဝန်ကြီးဌာန က ဆိုသည်။

ရုရှားနိုင်ငံခြားရေးဝန်ကြီး Lavrov နှင့် အမေရိကန်နိုင်ငံ နိုင်ငံခြားရေးဝန်ကြီး တီလာဆန် တို့သည် တယ်လီဖုန်းဖြင့် ဆွေးနွေးမှုပြုလုပ်ခဲ့ပြီး အဆိုပါ သဘောတူညီချက်ကို ရရှိခဲ့ခြင်းဖြစ်ကြောင်း ရုရှားနိုင်ငံခြားရေးဝန်ကြီးဌာန၏ ထုတ်ပြန်ချက်ထဲတွင် ဖော်ပြထားသည်။

ထိုသို့ ဖုန်းဖြင့် ဆွေးနွေးစဉ် ဆီးရီးယားနိုင်ငံ Shayrat လေတပ်အခြေစိုက်စခန်းမှ ဓာတုလက်နက်များ ထွက်ပေါ်ခဲ့ခြင်း နှင့် ဓာတုလက်နက်တားဆီးရေးအဖွဲ့(OPCW) ၏ တားမြစ်ချက်ကို ဖောက်ဖျက်ပြီး ဆီးရီးယားအစိုးရက ဆာရင်ဓာတ်ငွေ့များအသုံးပြုခဲ့သည်ဆိုသည့် ကိစ္စရပ်ကို စုံစမ်းစစ်ဆေးရန် အမေရိကန်အစိုးရ၏တောင်းဆိုချက်ကို ရုရှားအစိုးရက ငြင်းဆန်ခဲ့သည်ဆိုသော ပြောဆိုချက်အပေါ် ဝမ်းနည်းရကြောင်း ရုရှားနိုင်ငံခြားရေးဝန်ကြီးက ပြန်လည်ပြောကြားခဲ့သည်ဟု ထုတ်ပြန်ချက်ထဲတွင် ပါရှိသည်။

“ OPCW ရဲ့ စည်းမျဉ်းစည်းကမ်းတွေအတိုင်း စုံစမ်းစစ်ဆေးရာမှာ ဖြစ်နိုင်တဲ့နည်းလမ်းတွေနဲ့လေ့လာသွားဖို့ကို သဘောတူညီခဲ့ကြပါတယ်” ဟု ရုရှားနိုင်ငံခြားရေးဝန်ကြီးဌာန၏ ထုတ်ပြန်ချက်ထဲတွင် ရေးသားထားသည်။

ရုရှားနှင့် အမေရိကန် နိုင်ငံခြားရေးဝန်ကြီး နှစ်ဦး၏ ဖုန်းဖြင့် ဆွေးနွေးခဲ့စဉ်အတွင်း နှစ်ဖက်ဆက်ဆံရေးအကြားရှိနေသောအတားအဆီးများကို ဖယ်ရှားရန် နိုင်ငံခြားရေးဝန်ကြီးဌာန ဒုတိယဝန်ကြီးအဆင့် ပါဝင်သည့် ပူးတွဲလုပ်ငန်းအဖွဲ့တစ်ခုကို စောလျင်စွာ ဖွဲ့စည်းသွားရန်လည်း သဘောတူညီခဲ့ကြကြောင်း ထုတ်ပြန်ချက်ထဲတွင် ပါရှိသည်။ (Xinhua)