ရုရှားသမ္မတ သည် တူရကီသမ္မတ နှင့် ဂျပန်ဝန်ကြီးချုပ်တို့နှင့် တွေ့ဆုံမည်ဖြစ်ကြောင်း ပြောရေးဆိုခွင့်ရှိသူ ပြောကြား

မော်စကို၊ သြဂုတ် ၅ ရက် (ဆင်ဟွာ)

ရုရှားနိုင်ငံသမ္မတ ဗလာဒီမာ ပူတင် (Vladimir Putin) သည် တူရကီနိုင်ငံသမ္မတ Recep Tayyip Erdogan နှင့် ဂျပန်နိုင်ငံ ဝန်ကြီးချုပ် ရှင်ဇိုအာဘေး (Shinzo Abe) တို့အား သြဂုတ်လ နှင့် စက်တင်ဘာလ အစောပိုင်း၌ အသီးသီး တွေ့ဆုံသွားမည် ဖြစ်ကြောင်း ရုရှားအစိုးရ ပြောရေးဆိုခွင့်ရှိသူ က သြဂုတ်လ ၄ ရက်တွင်ပြောကြားခဲ့သည်။

ပူတင် နှင့် Erdogan တို့သည် သြဂုတ် ၉ ရက်တွင် ရုရှားနိုင်ငံ စိန့်ပီတာစ်ဘတ်မြို့၌ နှစ်နိုင်ငံ ဆက်ဆံရေး ပြန်လည် တည်ဆောက်သွားရန် အတွက် ဆွေးနွေးသွားမည်ဖြစ်ကြောင်း ပြောရေးဆိုခွင့်ရှိသူ Dmitry Peskov က သတင်းထောက်များအားပြောကြားခဲ့သည်။
Peskov က ရုရှားနှင့် တူရကီ နှစ်နိုင်ငံ ဆက်ဆံရေးအား မည်သည့်ပုံစံမျိုးဖြင့် အမြန်ဆုံး ပြန်လည် တည်ဆောက်သွားရန် အတွက် နှစ်ဘက် အမြင်ချင်း ဖလှယ်ကာ ဆွေးနွေးသွားမည်ဖြစ်ကြောင်း ပြောကြားခဲ့သည်။
တူရကီနိုင်ငံ သမ္မတ Erdogan သည် ၂၀၁၅ခုနှစ် နိုဝင်ဘာလ က ရုရှား ဂျက်လေယာဉ်တစ်စီးအား ပစ်ချခဲ့မှု အပေါ် ရုရှားနိုင်ငံသမ္မတပူတင် ထံသို့ တောင်းပန်စာ ရေးသားပေးပို့ပြီး ဇွန်လနှောင်းပိုင်းတွင် ၇လကြာ နှစ်နိုင်ငံတင်းမာမှုများ ပြီးဆုံးခဲ့ကြောင်းသိရသည်။ ထို့နောက် နှစ်နိုင်ငံချစ်ကြည်ရေး ပြန်လည်တည်ဆောက်ရေး အတွက် ရုရှားနိုင်ငံ၏ အခြေအနေများကို ဖြည့်ဆည်းပေးခဲ့ကြောင်း သိရသည်။
ပူတင်သည် စက်တင်ဘာလ ၂ ရက်နှင့် ၃ရက်နေ့များတွင် ရုရှားနိုင်ငံ Valdivostok မြို့၌ ကျင်းပမည့် အရှေ့စီးပွားရေးဖိုရမ်သို့ တက်ရောက်မည်ဖြစ်ပြီး ဖိုရမ်ပြင်ပ၌ ဂျပန်ဝန်ကြီးချုပ်အာဘေး နှင့် တောင်ကိုရီးယားနိုင်ငံ သမ္မတ ပတ်ဂွမ်ဟေး တို့အားတွေ့ဆုံသွားမည်ဖြစ်ကြောင်း Peskov က ပြောကြားခဲ့သည်။ (Xinhua)