သက်ငယ်မုဒိန်းမှုဖြင့် အမေရိကန်အမျိုးသားတစ်ဦးကို ထောင်ဒဏ် နှစ် ၃၃ဝ ချမှတ်

လောစ့်အိန်ဂျလိစ် ၊ အောက်တိုဘာ ၂၆ ရက်(ဆင်ဟွာ)

အမေရိကန်နိုင်ငံ ကယ်လီဖိုးနီးယားပြည်နယ် မှ အသက် ၇၅ နှစ်အရွယ် အမျိုးသားတစ်ဦးကို သက်ငယ်မုဒိန်းမှုဖြင့် ထောင်ဒဏ် နှစ်ပေါင်း ၃၃ဝ ချမှတ်လိုက်ကြောင်း Tulare ခရိုင် အစိုးရရှေ့နေရုံးက အောက်တိုဘာ ၂၅ ရက်တွင် ပြောကြားခဲ့သည်။

အစိုးရရှေ့နေရုံး၏ သတင်းထုတ်ပြန်ချက်အရ လောစ့်အိန်ဂျလိစ်မြို့မှ မြောက်ဖက် ၃၄ဝ ကီလိုမီတာအကွာတွင်တည်ရှိသော ဗီဆလီယာ(Visalia) ၌ နေထိုင်သည့် Alex Lopez ဆိုသူသည် အသက် ၁၄ နှစ်အောက် အရွယ် ကလေးငယ်တစ်ဦးအား အဓမ္မပြုကျင့်ခြင်းအပါအဝင် စွဲချက်ပေါင်း ၂၂ မှုကို စစ်ဆေးပေါ်ပေါက်ခဲ့သည်ဟု ဖော်ပြထားသည်။

Lopez က ၁၉၉၃ ခုနှစ် ဇူလိုင်လ မှ ၂ဝဝ၉ ခုနှစ် မေလအထိ ၁၆ နှစ်နီးပါးကာလအတွင်း အသက် ၁ဝ နှစ်(သို့မဟုတ်) ၁ဝ နှစ်အောက် အရွယ်ရှိ အမျိုးသမီးငယ် ၄ ဦး နှင့် အမျိုးသားတစ်ဦးကို လိင်ပိုင်းဆိုင်ရာ ကျူးလွန်ခဲ့ကြောင်း ဝန်ခံထွက်ဆိုခဲ့သည်။

“ အဓမ္မကျူးလွန်ခံရတဲ့ မိသားစုဝင်တွေကိုယ်စား ပြစ်မှုကျူးလွန်တဲ့ တရားခံကို တရားစီရင်နိုင်ခဲ့တဲ့အတွက် ဝမ်းမြောက် ဂုဏ်ယူမိပါတယ်” ဟု ခရိုင်ရှေ့နေချုပ် Tim Ward က သတင်းထုတ်ပြန်ချက်တွင် ပြောကြားခဲ့သည်။ “ လူမှုအသိုင်းအဝိုင်းတစ်ခုမှာ ကလေးသူငယ်တွေပေါ် ကျူးလွန်တဲ့ ပြစ်မှုထက် ပိုကြီးတဲ့ အမှုတွေ မရှိပါဘူး” ဟု ၎င်းက ဆိုသည်။

အမေရိကန်နိုင်ငံ ကျန်းမာရေး နှင့် လူမှုကူညီရေးဌာန၏ ထုတ်ပြန်ချက်အရ ၂ဝဝ၅ ခုနှစ်တွင် ကလေးသူငယ်လိင်ပိုင်းဆိုင်ရာ စော်ကားမှု တိုင်တန်းချက်ပေါင်း ၈၃,၆ဝဝ မှုကို ဌာနအနေဖြင့် လက်ခံရရှိခဲ့ကြောင်း ဖော်ပြခဲ့သည်။(Xinhua)