Media
မြန်မာနိုင်ငံတွင် အင်အားပြင်းငလျင်လှုပ်ခတ်မှုကြောင့် မန္တလေးတိုင်းဒေသကြီးတွင် လူ ၂,၀၀၀ကျော် သေဆုံး
ရန်ကုန်၊ ဧပြီ ၄ ရက် (ဆင်ဟွာ)
မြန်မာနိုင်ငံတွင် အင်အားပြင်းငလျင်လှုပ်ခတ်မှုကြောင့် မန္တလေးတိုင်းဒေသကြီးတွင် လူ ၂,၀၅၃ ဦး သေဆုံးခဲ့ကြောင်း နိုင်ငံပိုင်မီဒီယာများက ယနေ့ (ဧပြီ ၄ ရက်) ထုတ်ပြန်ခဲ့သော သတင်းအရ သိရသည်။
အဆိုပါ ငလျင်လှုပ်ခတ်မှုကြောင့် မန္တလေးတိုင်းဒေသကြီးတွင် ဧပြီ ၃ ရက်အထိ သေဆုံးသူ ၂,၀၅၃ ဦး၊ ဒဏ်ရာရရှိသူ ၂,၆၉၁ ဦးနှင့် ပျောက်ဆုံးသူ ၂၁၀ ဦးရှိ ကြောင်း သိရသည်။
ယင်းငလျင်ဒဏ်ကြောင့် နေပြည်တော်တွင် သေဆုံးသူ ၅၁၁ ဦး၊ ဒဏ်ရာရသူ ၈၄၂ ဦးရှိပြီး လူ ၉ ဦး ပျောက်ဆုံးနေကြောင်း၊ စစ်ကိုင်းတိုင်းဒေသကြီးတွင်မူ သေဆုံးသူ ၄၇၁ ဦးနှင့် ဒဏ်ရာရသူ ၆၈၈ ဦးရှိကာ ပျောက်ဆုံးသူ ၂ ဦးရှိကြောင်း သိရသည်။
မြန်မာနိုင်ငံတွင် ပြီးခဲ့သည့် မတ်လ ၂၈ ရက် နေ့လယ်ပိုင်းက ပြင်းအား ရစ်ခ်တာစကေး ၇ ဒသမ ၇ အဆင့်ရှိ ငလျင် လှုပ်ခတ်မှုကြောင့် တိုင်းဒေသကြီးနှင့် ပြည်နယ် ခြောက်ခုဖြစ်သည့် နေပြည်တော်၊ စစ်ကိုင်း၊ ပဲခူး၊ မကွေး၊ မန္တလေးနှင့် ရှမ်းပြည်နယ်တို့တွင် ထိခိုက်ပျက်စီးမှုများ ရှိခဲ့ကြောင်း သိရသည်။
ယင်း ငလျင်လှုပ်ခတ်မှုကြောင့် ဧပြီ ၃ ရက် ညပိုင်းအထိ တိုင်းဒေသကြီးနှင့် ပြည်နယ် ၆ ခုတွင် လူ ၃,၁၄၅ ဦး သေဆုံးခဲ့ပြီး ၄,၅၈၉ ဦး ဒဏ်ရာရရှိကာ လူ ၂၂၁ ဦး ပျောက်ဆုံးနေဆဲဖြစ်ကြောင်း ထုတ်ပြန်ချက်အရ သိရသည်။ (Xinhua)
#ငလျင် #အင်အားပြင်း #မန္တလေးတိုင်းဒေသကြီး #နေပြည်တော် #မြန်မာနိုင်ငံ #MyanmarEarthquake #၂၀၂၅မြန်မာနိုင်ငံငလျင်