၂၀၁၆-၂၀၁၇ ဘဏ္ဍာနှစ်အတွင်း နိုင်ငံခြားရင်းနှီးမြှုပ်နှံမှု ၆ဘီလီယံကျော်ရှိ

ရန်ကုန်၊ မတ် ၁၄ ရက် (ဆင်ဟွာ)

၂၀၁၆-၂၀၁၇ ဘဏ္ဍာနှစ်အတွင်း နိုင်ငံခြားရင်းနှီးမြှုပ်နှံမှုကို ၆ဘီလီယံ ခန့်မှန်းထားပြီး ရင်းနှီးမြှုပ်နှံမှုပမာဏ သည် မျှော်မှန်းချက်ဖြစ်သည့် ၆ဘီလီယံထက် ကျော်လွန်ခဲ့ပြီဖြစ်ကြောင်း မြန်မာနိုင်ငံရင်းနှီးမြှုပ်နှံမှုကော်မရှင် (M.I.C) မှ အတွင်းရေးမှုး ဦးအောင်နိုင်ဦးက မီဒီယာများ နှင့် တွေ့ဆုံစဉ်ပြောကြားခဲ့သည်။

၂၀၁၆-၂၀၁၇ ဘဏ္ဍာနှစ်အတွင်း နိုင်ငံခြားရင်းနှီးမြှုပ်နှံမှုဥပဒေအရ ၂၀၁၇ ခုနှစ် မတ်လ ပထမပတ်အထိ နိုင်ငံခြားရင်းနှီးမြှုပ်နှံမှုလုပ်ငန်း ၁၃၅ ခု၊ ရင်းနှီးမြှုပ်နှံမှုပမာဏအမေရိကန်ဒေါ်လာ ၅၀၅၁.၂၆သန်း ရှိကြောင်း ၊ ရင်းနှီးမြှုပ်နှံမှုတိုးမြှင့်ခြင်းအပါအဝင် စုစုပေါင်းရင်းနှီးမြှုပ်နှံမှုပမာဏ အမေရိကန်ဒေါ်လာ ၆၆၁၃.၈၃၇ သန်းရှိကြောင်း၊ အထူးစီးပွားရေးဇုန်ဥပဒေအရ သီလဝါအထူးစီးပွားရေးဇုန်တွင် ရင်းနှီးမြှုပ်နှံမှုပမာဏ အမေရိကန်ဒေါ်လာ ၂၆၂.၅၈၈သန်း ခွင့်ပြုခဲ့သည့်အတွက် စုစုပေါင်း ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ၆၈၇၄.၄၂၅ သန်းရှိခဲ့ခြင်းဖြစ်ကြောင်း သိရသည်။

၂၀၁၆-၂၀၁၇ ဘဏ္ဍာနှစ်အတွင်း မြန်မာနိုင်ငံသားရင်းနှီးမြှုပ်နှံမှု ဥပဒေအရ ခွင့်ပြုပေးခဲ့မှုမှာ ၂၀၁၇ ခုနှစ် မတ်လ ပထမပတ်အထိ မြန်မာနိုင်ငံသားရင်းနှီးမြှုပ်နှံမှုလုပ်ငန်း ၄၉ခု၊ အမေရိကန်ဒေါ်လာ ၇၆၄.၅၆၀ သန်း အပါအဝင် ကျပ်၁,၄၅၅,၃၃၉.၆၈၂ သန်းဖြစ်ကြောင်း၊ရင်းနှီးမြှုပ်နှံမှု တိုးမြှင့်ခြင်းအပါအဝင် စုစုပေါင်းရင်းနှီးမြှုပ်နှံမှု ပမာဏ ကျပ် ၁,၅၇၂,၈၈၂.၁၀၃ သန်း ရင်းနှီးမြှုပ်နှံခဲ့ခြင်းဖြစ်ကြောင်း သိရသည်။ (Xinhua)