ကိုလံဘီယာနိုင်ငံ ဒုတိယ သမ္မတ COVID-19 ကူးစက်ခံရ

ဘိုဂိုတာ၊ အောက်တိုဘာ ၂၄ ရက် (ဆင်ဟွာ)

ကိုလံဘီယာနိုင်ငံ ဒုတိယ သမ္မတ Marta Lucia Ramirez က ၎င်းတွင် နိုဗယ်ကိုရိုနာ ဗိုင်းရပ်စ် (COVID-19) ကူးစက်နေကြောင်းနှင့် နေအိမ်တွင် ၁၅ ရက်ကြာ သီးခြားနေထိုင်သွားမည်ဖြစ်ကြောင်း အောက်တိုဘာ ၂၃ ရက်တွင် ပြောကြားခဲ့သည်။

“Manizales မြို့မှာ အုပ်ချုပ်ရေးမှူးများ ထိပ်သီးအစည်းအဝေးအတွက် ခရီးသွားဖို့ စီစဉ်တဲ့အတွက် မနေ့က COVID-19 စစ်ဆေးမှု ခံယူခဲ့ပါတယ်။ ရလဒ်ကတော့ ရောဂါပိုးတွေ့ရှိတဲ့အကြောင်း ကိုလံဘီယာနိုင်ငံသားတွေကို အသိပေးတာဖြစ်ပါတယ်။ ဘုရားကျေးဇူးတော်ကြောင့် ကျွန်မ နေကောင်းလျက်ရှိပြီး တစ်ယောက်တည်း သီးသန့်နေထိုင်ရေးကို လိုက်နာသွားမှာပါ”ဟု ဒုတိယသမ္မတက တွစ်တာတွင် ရေးသားခဲ့သည်။

ကျန်းမာရေးဝန်ကြီးဌာန၏ လမ်းညွှန်မှုများကို လေးစားလိုက်နာခြင်းဖြင့် ဒုတိယသမ္မတနှင့်ထိတွေ့ခဲ့သော ကူးစက်နိုင်ခြေရှိသူများကို ရှာဖွေရန် ခြေရာခံရေးလုပ်ငန်းစဉ် စတင်လုပ်ဆောင်နေပြီဖြစ်ကြောင်း ဒုတိယသမ္မတရုံးက ကြေညာချက်တစ်ခုတွင် ပြောကြားထားသည်။

“ကိုလံဘီယာနိုင်ငံသားအားလုံးအနေနဲ့ ဇီဝလုံခြုံရေးဆောင်ရွက်ချက်တွေကို ဆက်လက်လိုက်နာဖို့နဲ့ဘေးကင်းရေးတုံ့ပြန်ဆောင်ရွက်ချက်များကို ဆက်လက်လုပ်ဆောင်ကြဖို့ ထပ်လောင်းပြောကြားထားပါတယ်” ဟု ကြေညာချက်တွင် ဖော်ပြထားသည်။

ကိုလံဘီယာနိုင်ငံတွင် အောက်တိုဘာ ၂၂ ရက်ညအထိ COVID-19 ကူးစက်ခံရသူ ၉၉၀,၂၇၀ ဦး ရှိပြီး သေဆုံးသူ ၂၉,၆၃၆ ဦးရှိကြောင်း ကျန်းမာရေးနှင့်လူမှုကာကွယ်ရေးဝန်ကြီးဌာနက သတင်းထုတ်ပြန်ခဲ့သည်။ (Xinhua)