Environment, Disasters & Accidents
ပုသိမ်-ချောင်းသာလမ်းတွင် ကားမီးလောင်ပြီး ကလေးငယ် ၂ဦးအပါအဝင် လူ ၇ ဦးသေဆုံး
ရန်ကုန်၊ မတ် ၁၉ ရက် (ဆင်ဟွာ)
ဧရာဝတီတိုင်းဒေသကြီး ပုသိမ်-ချောင်းသာ ကားလမ်းပေါ်တွင် မတ်လ ၁၉ ရက် မွန်းလွဲပိုင်းက ယာဥ်တိုက်မှုဖြစ်ပြီး အိမ်စီးကားတစီး မီးလောင်ကာ ကလေးငယ် ၂ဦး အပါအဝင် လူ ၇ ဦးသေဆုံးခဲ့ကြောင်း ဧရာဝတီတိုင်းဒေသကြီးရဲတပ်ဖွဲ့ထံမှ စုံစမ်းသိရှိရသည်။“ကားမီးလောင်တဲ့ လူတွေရဲ့ မိသားစုဝင်တွေနဲ့ လွန်ခဲ့တဲ့ ၁နာရီကျော်လောက်က အဆက်အသွယ်ရပါပြီ၊ တိုက်မိတဲ့ တစ်ဘက်ယာဉ်က ပွန်းပဲ့ရုံပဲ ဒဏ်ရာရခဲ့တယ်၊ အဲဒီခရီးသည်ယာဉ်ပေါ်ကလူတွေလည်း မီးလောင်နေတာ မြင်တော့ ဆင်းပြီး တံခါးဖွင့်တယ် ဖွင့်မရခဲ့ဘူးပြောတယ်” ဟု ဧရာဝတီတိုင်းဒေသကြီးရဲတပ်ဖွဲ့မှ တာဝန်ကျ အရာရှိတစ်ဦးက ဆိုသည်။
ပုသိမ်-ချောင်းသာလမ်းတွင် ကားမီးလောင်ပြီး လူသေဆုံးမှုအား ကယ်ဆယ်ရေးဆောင်ရွက်စဉ် (ဓာတ်ပုံ-စေတနာရှင်ဘက်စုံပရဟိတလူငယ်အသင်း)
ကံထူးအောင် မှန်လုံကားနှင့် ပရိုဘောက်အိမ်စီးကားတို့ တိုက်မိကာ ပရိုဘောက်ကား မီးလောင်ပြီး ယင်းကားပေါ်ပါ အမျိုးသား ၂ ဦး၊ အမျိုးသမီး ၃ ဦးနှင့် ကလေးငယ်(မိန်းကလေး) ၂ ဦးတို့လည်း ကားအတွင်း မီးလောင်၍ သေဆုံးသွားခဲ့ကြောင်း ၎င်းက ပြောသည်။
ပုသိမ်-ချောင်းသာလမ်းတွင် ကားမီးလောင်ပြီး လူသေဆုံးမှုအား ကယ်ဆယ်ရေးဆောင်ရွက်စဉ် (ဓာတ်ပုံ-စေတနာရှင်ဘက်စုံပရဟိတလူငယ်အသင်း)
” ယာဉ်တိုက်မိပြီး ပရိုဘောက် ကားခေါင်းခန်း မီးထတောက်တာ၊ အဲဒီနားကလူတွေကယ်ဖို့ ကြိုးစားတယ်၊ တံခါးကဖွင့်မရတာရယ်၊ အဲဒီနားမှာ ရေရှားတာရယ်နဲ့ ကားထဲ မီးလောင်တာ ကြည့်နေရသလိုဖြစ်သွားတယ်” ဟု ကယ်ဆယ်ရေးသွားရောက်ကူညီဆောင်ရွက်ရာတွင် ပါဝင်သူ စေတနာရှင်ဘက်စုံပရဟိတလူငယ်အသင်းမှ တာဝန်ရှိသူတစ်ဦးက ဆင်ဟွာသို့ ပြောသည်။ အဆိုပါ ယာဉ်တိုက်မှုဖြစ်ပြီး မီးလောင်သေဆုံးခဲ့သည့် ရုပ်အလောင်းများအား ပုသိမ်မြို့ပေါ်ရှိ လူမှုကူညီရေး အသင်းများက ပုသိမ်ဆေးရုံသို့ ပို့ဆောင်ပေးခဲ့ကြောင်း သိရသည်။ (Xinhua)