နှစ်သစ်ကူးသင်္ကြန်ရေကစားပွဲတော်- မြန်မာနိုင်ငံ ပြည်သူများက ၎င်းတို့၏ သင်္ကြန်ပွဲ အတွေ့အကြုံများကို ဝေမျှ 

ရန်ကုန်၊ ဧပြီ ၁၅ ရက် (ဆင်ဟွာ) 

မြန်မာနိုင်ငံတစ်ဝန်းလုံးက သင်္ကြန်ပွဲတော် ဒုတိယနေ့ဖြစ်သော ဧပြီ ၁၄ ရက်တွင် ရိုးရာ သင်္ကြန်ရေကစားပွဲတော်ကို ဆက်လက်ဆင်နွှဲလျက်ရှိပြီး  မိသားစုနှင့် ပြန်လည်ဆုံစည်းကာ ရိုးရာဓလေ့ပွဲများကို ဆင်နွှဲလျက်ရှိသည်။ 

တစ်ယောက်ကိုတစ်ယောက် ရေပက်ကစားခြင်းသည် သင်္ကြန်၏ အဓိကအစိတ်အပိုင်းတစ်ခုဖြစ်ပြီး နှစ်ဟောင်းကုန်ဆုံးကာ နှစ်အသစ်တစ်ဖန်ပြန်လည်စတင်ခြင်းနှင့် သန့်စင်ခြင်းတို့ကို ကိုယ်စားပြုကြောင်း သိရသည်။ ပျော်ပွဲရွှင်ပွဲများအပြင် မြန်မာ့ရိုးရာသင်္ကြန်ကာလတွင် ကောင်းမှုကုသိုလ်များကိုလည်း အလေးအနက်ထား ဆောင်ရွက်ကြကြောင်း သိရသည်။

“သင်္ကြန်ပွဲမှာဆိုရင်  စတုဒိသာကျွေးတာတွေ၊ သက်ကြီးရွယ်အိုတွေကို ကန်တော့တာတွေ၊ အဘိုးအဘွားတွေကို  ခေါင်းလျှော်ပေးတာတို့၊ ခြေသည်း၊ လက်သည်းညှပ်တာတို့ကို လုပ်ပေးပါတယ်။ တိရစ္ဆာန်တွေကို ဘေးမဲ့လွှတ်တာတွေကိုလည်း လုပ်ကြပါတယ်။ ပြီးတော့ ကျွန်တော်တို့ သင်္ကြန်ပွဲတော်မှာ ဖျော်ဖြေတဲ့ လှုပ်ရှားမှုတွေကနေ ရိုးရာအကများကို ထိန်းသိမ်းတာတွေလည်း ပါဝင်ပါတယ်” ဟု သာသနာရေးနှင့် ယဉ်ကျေးမှုဝန်ကြီးဌာနမှ  ညွှန်ကြားရေးမှူး ဦးအာကာကျော်က ဆင်ဟွာသို့ ဧပြီ ၁၄ ရက်တွင် ပြောသည်။

သင်္ကြန်သည် မြန်မာရိုးရာ နှစ်သစ်ကူးအခါသမယဖြစ်ပြီး တစ်နိုင်ငံလုံးရှိ တိုင်းရင်းသားလူမျိုးပေါင်းစုံ၊ ဘာသာပေါင်းစုံမှ ပြည်သူများက အဖိုးထိုက်တန်လှသည့် အစဉ်အလာကို စုစုစည်းစည်း ဆင်နွှဲခြင်းဖြစ်ကြောင်း ၎င်းက ဆိုသည်။ ယင်းပွဲတော်ကို ပုဂံခေတ်ကတည်းက ကျင်းပလာခဲ့ပြီး မျိုးဆက်တစ်ဆက်မှ နောက်တစ်ဆက်သို့ လက်ဆင့်ကမ်းလာခဲ့ကြခြင်းဖြစ်ကြောင်း ၎င်းက ဖြည့်စွက်ပြောကြားခဲ့သည်။ “မြန်မာပြည်သူအားလုံး နှစ်သစ်ကို ငြိမ်းချမ်းစွာ ကြိုဆိုနိုင်ကြပါစေ၊ သင်္ကြန်ရေနဲ့ အညစ်အကြေးတွေကိုဆေးကြောခဲ့ပြီး နှစ်သစ်ကို စိတ်ရွှင်လန်းစွာနဲ့ ကြိုဆိုနိုင်ကြပါစေ” ဟု ၎င်းက ဆုတောင်းစကားပြောကြားခဲ့သည်။ 

ပွဲတော်ကာလအတွင်း လူအများအပြားသည် ရေသဘင်မဏ္ဍပ်များသို့ သွားရောက်လည်ပတ်ခြင်းနှင့် ရန်ကုန်မြို့တွင် ကျင်းပလျက်ရှိသော “လမ်းလျှောက် သင်္ကြန်” တွင် ပါဝင်ဆင်နွှဲခြင်း စသည့် ၎င်းတို့၏ အတွေ့အကြုံများကို ဝေမျှခဲ့ကြသည်။ အသက် ၂၁ နှစ်အရွယ် မသင်းသီရိပိုင်က ၎င်းအနေဖြင့် အခြားသူများနှင့်အတူ ရေပက်ကစားခြင်းကို ကြိုက်နှစ်သက်ပြီး ငယ်စဉ်ကတည်းက သင်္ကြန်ပွဲတော်ကို နှစ်သက်စွာဆင်နွှဲခဲ့ကြောင်း ပြောကြားခဲ့သည်။ “ကျွန်မတို့ တစ်ယောက်နဲ့တစ်ယောက် မသိရင်တောင် တစ်ယောက်ကို တစ်ယောက်ရေပက်နိုင်ပါတယ်” ဟု ၎င်းကပြောသည်။သင်္ကြန်ပွဲတော်သည် မြန်မာနှစ်သစ်ကူးအခါသမယဖြစ်သောကြောင့် ၎င်းအနေဖြင့် နှစ်စဉ်ပါဝင်ဆင်နွှဲကြောင်း ပြောကြားခဲ့သည်။

သင်္ကြန်ပွဲတော်ကို ယူနက်စကို၏ ယဉ်ကျေးမှုအမွေအနှစ်စာရင်းတွင် ထည့်သွင်းထားသောကြောင့် ရိုးရာဓလေ့ကို ထိန်းသိမ်းရန် အရေးကြီးကြောင်းလည်း ၎င်းက မှတ်ချက်ပြုပြောကြားခဲ့သည်။ အသက် ၃၆ နှစ်အရွယ် ဦးအောင်မျိုးက ၎င်း၏မိသားစုနှင့်အတူ သင်္ကြန်ပွဲတော်သို့ လာရောက်ခဲ့ပြီး ပျော်ရွှင်ခဲ့ရကြောင်း ပြောကြားခဲ့သည်။ “ကျွန်တော်တို့ သင်္ကြန်ကို အပြည့်အဝ မခံစားနိုင်တာကြာပြီ၊ ဒါကြောင့် အခု အရမ်းပျော်နေပါတယ်” ဟု ၎င်းက ပြောသည်။ “မြန်မာနိုင်ငံမှာ ကျွန်တော်တို့က ပွဲတော်ကို တဲသင်္ကြန်မဏ္ဍပ်တွေကို သွားတာ၊ သနပ်ခါးပင်ရဲ့ အခေါက်ကနေ လုပ်ထားတဲ့ အဝါရောင်အဆင်းရှိတဲ့ သနပ်ခါးအနှစ်ကို လိမ်းတာ၊ ပရဟိတပွဲတွေမှာ စားသောက်တာတွေအပြင် လမ်းလျှောက်သင်္ကြန်တွေကိုလည်း မြို့နယ်တိုင်းမှာ ကျင်းပတဲ့အတွက် လမ်းလျှောက်ရတာပျော်ဖို့ ကောင်းတယ်” ဟု ၎င်းက ဖြည့်စွက်ပြောကြားသည်။ 

အသက် ၂၃ နှစ်အရွယ် မယမင်းသူက “ကျွန်မတို့ရဲ့ သင်္ကြန်ရဲ့ ထူးခြားချက်ကတော့ ပွဲတော်မတိုင်ခင် ပွင့်လန်းနေတဲ့ ပိတောက်ပန်းတွေနဲ့ ရိုးရာအကဖြစ်တဲ့ ယိမ်းအကကို မဏ္ဍပ်တွေမှာ ဖျော်ဖြေတင်ဆက်တာပါပဲ” ဟု ပြောသည်။သင်္ကြန်ပွဲတော် ဆက်လက်ကျင်းပနေခြင်းနှင့်အတူ မြန်မာတစ်နိုင်ငံလုံးရှိ ပြည်သူများက ပျော်ရွှင်မှု၊ ရိုးရာဓလေ့ဆက်ခံမှုနှင့် စည်းလုံးညီညွတ်မှုစိတ်ဓာတ်တို့ဖြင့် နှစ်သစ်ကို ကြိုဆိုလျက်ရှိပေသည်။ (Xinhua)

မြန်မာနိုင်ငံ ရန်ကုန်မြို့တွင် ကျင်းပလျက်ရှိသည့် လမ်းလျှောက်သင်္ကြန်တွင် လမ်းလျှောက်လည်ပတ်နေကြသူများကို ၂၀၂၆ ခုနှစ်၊ ဧပြီ ၁၄ ရက်က တွေ့ရစဉ် (ဆင်ဟွာ)

မြန်မာနိုင်ငံ ရန်ကုန်မြို့တွင် ကျင်းပလျက်ရှိသည့် သင်္ကြန်ပွဲတော်တွင် ပါဝင်ဆင်နွှဲနေကြသူများကို ၂၀၂၆ ခုနှစ်၊ ဧပြီ ၁၄ ရက်က တွေ့ရစဉ် (ဆင်ဟွာ)