Environment, Disasters & Accidents
မြောက်ဥက္ကလာပမြို့နယ်တွင် ကားနှင့် ဆိုင်ကယ်တိုက်မှုဖြစ်ပွားပြီး လူ ၄ ဦးသေဆုံး
ရန်ကုန်၊ ဖေဖော်ဝါရီ ၂၅ ရက် (ဆင်ဟွာ)
ရန်ကုန်တိုင်းဒေသကြီး မြောက်ဥက္ကလာပမြို့နယ်၊ ရွှေပေါက္ကံမြို့သစ်၊ပုဂံလမ်းမကြီးပေါ်ရှိ EPC ရုံးရှေ့တွင် ဖေဖော်ဝါရီ ၂၄ ရက်ည ၉နာရီဝန်းကျင်က ကားနှင့် ဆိုင်ကယ်တိုက်မှုဖြစ်ပွားပြီး ဆိုင်ကယ်ပေါ်ပါ လူ ၄ ဦးသေဆုံးခဲ့ကြောင်း ယာဉ်ထိန်းရဲတပ်ဖွဲ့ထံမှ စုံစမ်းသိရှိရသည်။
” ၃ယောက်က အခင်းဖြစ်နေရာမှာတင် သေဆုံးတယ်။ ၆နှစ်အရွယ် ကလေးမလေးကတော့ ဆေးရုံရောက်ပြီး ဆေးကုသရင်း သေဆုံးသွားတယ်” ဟု ယာဉ်ထိန်းရဲတပ်ဖွဲ့မှ အရာရှိတစ်ဦးက ပြောသည်။
အမျိုးသား ၂ ဦးနှင့်အမျိုးသမီး ၂ ဦး စုစုပေါင်း မိသားစု (၄)စီးနင်းလိုက်ပါလာသည့် ဆိုင်ကယ်နှင့် လမ်းပြောင်းပြန်မောင်းလာသည့် ယာဉ်တစ်စီးတို့ တိုက်မိပြီး ဆိုင်ကယ်မှာ လွှင့်ထွက်ကာ စစ်ဆေးရေးဂိတ်အနီးရှိ ဓာတ်တိုင်အား ဝင်တိုက်မိခဲ့ကြောင်း ၎င်းကဆိုသည်။
ယင်းဖြစ်စဥ်ကြောင့် ဆိုင်ကယ်ပေါ်တွင် မောင်းနှင်လိုက်ပါလာသည့် ရွှေပေါက္ကံမြို့သစ် ၂၂ ရပ်ကွက်တွင်နေထိုင်သောမိသားစုများ သေဆုံးခဲ့ကြောင်း၊ အဆိုပါ ဆိုင်ကယ်ကို တိုက်သည့် ကားသမားကိုလည်း ဖမ်းဆီးရမိထားကြောင်း သိရသည်။ (Xinhua)