ARSA အစွန်းရောက်အကြမ်းဖက်သမားများ တိုက်ခိုက်မှုကြောင့် သုံးလအတွင်း ၈၆ဦးသေဆုံး

ရန်ကုန်၊ နိုဝင်ဘာ ၁၁ ရက် (ဆင်ဟွာ)

ရခိုင်ပြည်နယ်အတွင်း ARSA အစွန်းရောက်အကြမ်းဖက်သမားများ အကြမ်းဖက် တိုက်ခိုက်မှုကြောင့် သုံးလအတွင်း ၈၆ဦးသေဆုံးခဲ့ကြောင်း သတင်းထုတ်ပြန်ရေးကော်မတီက ထုတ်ပြန်သော သတင်းအရ သိရသည်။

ARSA အစွန်းရောက်အကြမ်းဖက်သမားများ၏ အကြမ်းဖက်တိုက်ခိုက်မှုကြောင့် သြဂုတ်လ ၂၅ ရက်နေ့မှ နိုဝင်ဘာ ၁၀ ရက်နေ့အထိ အစိုးရ ဝန်ထမ်း ၂ ဦး၊ ရခိုင်တိုင်းရင်းသား ၅ ဦး၊ မြိုတိုင်းရင်းသား ၇ ဦး၊ ဒိုင်းနက်တိုင်းရင်းသား ၇ ဦး ၊ ဟိန္ဒူ ဘာသာဝင် ၅၂ ဦး သေဆုံးခဲ့ရပြီး တပ်မတော်သား ၂ ဦး၊ ရဲတပ်ဖွဲ့ဝင် ၁၁ ဦးတို့ အသက်စွန့်လွှတ်ခဲ့ရကြောင်း သိရသည်။

ယင်းတိုက်ခိုက်မှုကြောင့် အပြစ်မဲ့ပြည်သူ ရခိုင်တိုင်းရင်းသား ၂ ဦး၊ မြိုတိုင်းရင်းသား ၅ ဦး၊ ဒိုင်းနက်တိုင်းရင်းသား ၅ ဦး ၊ဟိန္ဒူဘာသာဝင် ၂ ဦး ၊ တပ်မတော်သား ၅ ဦး နှင့် ရဲတပ်ဖွဲ့ဝင် ၁၀ ဦးတို့ ထိခိုက်ဒဏ်ရာရရှိခဲ့ကြောင်း သိရသည်။အကြမ်းဖက်တိုက်ခိုက်မှုဖြစ်စဉ်အတွင်း အပြစ်မဲ့ပြည်သူ ရခိုင်တိုင်းရင်းသား ၂ ဦး၊ မြိုတိုင်းရင်းသား ၃ ဦး၊ ဟိန္ဒူဘာသာဝင် ၁၇၆ ဦးနှင့် တပ်မတော်သား ၁ ဦး တို့ ပျောက်ဆုံးလျက်ရှိကြောင်း သိရသည်။

မောင်တောဒေသအတွင်း သြဂုတ် ၂၅ ရက် အကြမ်းဖက်တိုက်ခိုက်မှုဖြစ်စဉ် ဖြစ်ပွားပြီးချိန်မှစ၍ နိုဝင်ဘာ ၁၀ ရက်နေ့အထိ မသင်္ကာသဖြင့် ဖမ်းဆီးထိန်းသိမ်းထားသူ ၉၈ ဦး ရှိခဲ့ရာ ပြစ်မှုကျူးလွန် ကြောင်း စစ်ဆေးပေါ်ပေါက်ခြင်းမရှိ၍ အမှုမှ အပြီးလွှတ်ပေးခဲ့သူ ၂ ဦး ၊ ရောဂါဖြင့် သေဆုံးသူ ၂ ဦး၊ တရားရုံးတွင် အမှုရင်ဆိုင်ဆဲ ၆၇ ဦး ၊ ရဲစစ်ဆေးဆဲ ၂၇ ဦး ရှိကြောင်း သိရသည်။(Xinhua)