ဆီးရီးယား၌ စစ်သားများသေဆုံးမှု မရှိကြောင်း ရုရှား ငြင်းဆို

မော်စကို ၊ ဖေဖော်ဝါရီ ၆ ရက် (ဆင်ဟွာ)

ဆီးရီးယားနိုင်ငံ၌ ရုရှားစစ်သားများ သေဆုံးမှုရှိနေကြောင်း သတင်းဖော်ပြချက်များ ထွက်လာပြီးနောက် ၊ ယင်းဖော်ပြချက်မှာ မဟုတ်မမှန်ကြောင်း နှင့် ဆီးရီးယားရောက် ရုရှားစစ်သားများအနေဖြင့် ကောင်းမွန်စွာ တာဝန်ထမ်းဆောင်လျက်ရှိကြောင်း ရုရှားနိုင်ငံ ကာကွယ်ရေးဝန်ကြီးဌာနက ဖေဖော်ဝါရီလ ၅ ရက်တွင် ထုတ်ဖော်ပြောကြားလိုက်သည်။

“ ဆီးရီးယားကို ရောက်နေတဲ့ ရုရှားစစ်သားအားလုံး ဘေးကင်းစွာ ရှိနေကြပြီး သူတို့ရဲ့ တာဝန်ဝတ္တရားတွေကို အပြည့်အဝ ထမ်းဆောင်နေကြပါတယ်” ဟု ရုရှားစစ်တပ် ပြောခွင့်ရပုဂ္ဂိုလ် ဗိုလ်ချုပ် Igor Konashenkov ၏ ပြောကြားချက်ကို ကိုးကား၍ RIA Novosti သတင်းဌာနက သတင်းဖော်ပြခဲ့သည်။

ဆီးရီးယားနိုင်ငံ Latakia မြို့အနီး၌ ရုရှားစစ်ကားတစ်စီး ဗုံးပေါက်ကွဲမှုကြောင့် ရုရှားစစ်သား ၅ ယောက် ကျဆုံးသွားကြောင်း ကာတာနိုင်ငံအခြေစိုက် Al Jazeera သတင်းဌာနက ဖေဖော်ဝါရီလ ၄ ရက်တွင် သတင်းဖော်ပြခဲ့သည်။ အဆိုပါ အယ်ဂျာဇီးသတင်းဌာန၏ သတင်းဖော်ပြချက်မှာ “ မှားယွင်းသော သတင်းအချက်အလက်” နှင့် “ လုပ်ကြံသတင်းဖြန့်ဝေမှု” ဟူ၍ Konashenkov က တုံ့ပြန် ပြောကြားခဲ့သည်။

ရုရှားနိုင်ငံသည် ဆီးရီးယား ပဋိပက္ခအတွင်း ၂ဝ၁၅ ခုနှစ် စက်တင်ဘာလမှ စတင်ကာ စစ်ရေးအရ ကြားဝင် ဆောင်ရွက်မှုများ ပြုလုပ်ခဲ့သည်။ ၂ဝ၁၆ ခုနှစ် မတ်လတွင် ရုရှားနိုင်ငံသမ္မတ ဗလာတီမာပူတင်က ဆီးရီးယားနိုင်ငံသို့ရောက်ရှိနေသော ရုရှားစစ်သား အများစုကို နေရပ်တိုင်းပြည်သို့ပြန်လာကြရန် အမိန့်ပေးခဲ့ကြောင်း သိရသည်။ (Xinhua)