တရုတ်နိုင်ငံ၌ ယူဂန္ဓာကျောင်းသား ၆၉ ဦးလာရောက်ပညာသင်ကြားမည်

ကမ်ပါလာ၊ သြဂုတ် ၂၈ ရက်(ဆင်ဟွာ)

တရုတ်နိုင်ငံပညာတော်သင်ဆု ဆွတ်ခူးရရှိသော ယူဂန္ဓာနိုင်ငံမှ ကျောင်းသား ၆၉ ဦးသည် ဘာသာရပ်အမျိုးမျိုးတွင် စာသင်နှစ်ကို တက်ရောက်ရန်အတွက် တရုတ်နိုင်ငံသို့မကြာမီ ထွက်ခွာလာကြမည်ဖြစ်ကြောင်း သိရသည်။

ပညာတော်သင်သွားရောက်ကြမည့် ကျောင်းသားများအား တွေ့ဆုံနှုတ်ဆက်ပွဲတွင် ယူဂန္ဓာနိုင်ငံဆိုင်ရာတရုတ်နိုင်ငံသံအမတ်ကြီး Zheng Zhuqiang က တရုတ်နိုင်ငံတွင် ပညာသင်ကြားရန် ယူဂန္ဓာလူငယ်မောင်မယ်များကို တရုတ်နိုင်ငံက ကြိုဆိုကြောင်း ထည့်သွင်းပြောကြားခဲ့သည်။

“ မောင်တို့မယ်တို့ဟာ ယူဂန္ဓာနိုင်ငံ ဖွံ့ဖြိုးတိုးတက်မှုအတွက် မောင်းနှင်အားတစ်ခုဖြစ်လာလိမ့်မယ်လို့ကျွန်တော်တို့ယုံကြည်ပါတယ်။ ပြီးတော့ တရုတ်-ယူဂန္ဓာ ချစ်ကြည်ရင်းနှီးမှုအတွက် စေတနာ့ဝန်ထမ်းသံတမန်တွေ ဖြစ်လာမှာပါ” ဟု Zheng က ဆိုသည်။

၎င်းက နှစ်စဉ် တရုတ်နိုင်ငံ၌ ယူန္ဓာနိုင်ငံသား ၅ဝဝ နီးပါးကို ကာလတိုသင်တန်းများ ပို့ချပေးနေကြောင်း ပြောကြားခဲ့သည်။

ယူဂန္ဓာနိုင်ငံ အဆင့်မြင့်ပညာရေးဝန်ကြီးဌာန ဝန်ကြီး John Muyingo က တရုတ်နိုင်ငံမှ လေ့လာဆည်းပူးခဲ့သော ပညာရပ်များဖြင့် ယူဂန္ဓာကျောင်းသားများသည် ယူဂန္ဓာနိုင်ငံ၏ ဖွံ့ဖြိုးတိုးတက်မှုအတွက် လျင်လျင်မြန်မြန်လမ်းသစ်ဖောက်ရာတွင် အသုံးဝင်နိုင်လိမ့်မည်ဖြစ်ကြောင်း ပြောကြားခဲ့သည်။

“ နိုင်ငံကို ဖွံ့ဖြိုးတိုးတက်အောင်လုပ်ဖို့မောင်တို့မယ်တို့ရဲ့ ကျွမ်းကျင်မှုဟာ ကျွန်တော်တို့အတွက် အထူးလိုအပ်ပါတယ်” ဟု Muyingo က ဆိုသည်။

ယူဂန္ဓာကျောင်းသားများအတွက် ပညာတော်သင် အစီအစဉ်ကို တရုတ်နိုင်ငံ အနေဖြင့် ဆက်လက်ဆောင်ရွက်ပေး ပါရန်လည်း ၎င်းက တိုက်တွန်းပြောကြားခဲ့သည်။

ပညာတော်သင်ကျောင်းသားများကိုယ်စား Collin Twebaze ကကျေးဇူးတင်စကားပြောကြားရာတွင် ယူဂန္ဓာနိုင်ငံ၏ဖွံ့ဖြိုးတိုးတက်အတွက် တရုတ်နိုင်ငံအနေဖြင့် အပြုသဘောဆောင်သောအခန်းကဏ္ဍမှ ဆက်လက် ပါဝင် ဆောင်ရွက်ပေးရန် မျှော်လင့်ကြောင်း ထည့်သွင်းပြောကြားခဲ့သည်။(Xinhua)