တိုင်ဖွန်း မုန်တိုင်းများကြောင့် ဗီယက်နမ်တွင် ဆုံးရှုံးမှုတန်ဖိုး ဒေါ်လာ သန်း ၃ဝဝ ရှိ

ဟနွိုင် ၊ သြဂုတ် ၉ ရက်(ဆင်ဟွာ)

ဗီယက်နမ်နိုင်ငံတွင် ၂ဝ၁၆ ခုနှစ်အတွင်း တိုင်ဖွန်းမုန်တိုင်းဒဏ် နှစ်ကြိမ်ခံစားခဲ့ရပြီးနောက် ပျက်စီးဆုံးရှုံးမှုတန်ဖိုးမှာ ဗီယက်နမ် ဒေါင် ၆.၇ ထရီလီယံ (အမေရိကန်ဒေါ်လာ သန်း ၃ဝဝ) ထိရှိခဲ့ကြောင်း ဗီယက်နမ်နိုင်ငံ လယ်ယာစိုက်ပျိုးရေး နှင့် ကျေးလက်ဖွံ့ဖြိုးရေးဝန်ကြီးဌာန(MARD) ၏ သြဂုတ် ၉ ရက်ထုတ်ပြန်ချက်တွင် ဖော်ပြထားသည်။

ဗီယက်နမ်တွင် ဇူလိုင်လ နှောင်းပိုင်းက တိုက်ခတ်ခဲ့သည့် မီရီနေ နှင့် သြဂုတ်လအစောပိုင်းက တိုက်ခတ်ခဲ့သည့် နီဒါ တိုင်ဖွန်းမုန်တိုင်းနှစ်ခုကြောင့် အနည်းဆုံး လူ ၂ဝ ဦးသေဆုံး/ပျောက်ဆုံးခဲ့ပြီး အခြား ၈၂ ဦးထိခိုက်ဒဏ်ရာရခဲ့ကြောင်း ဝန်ကြီးဌာန၏ ပြောကြားချက်ကို ကိုးကား၍ ဗီယက်နမ် နိုင်ငံပိုင်သတင်းဌာနက ရေးသားခဲ့သည်။
မီရီနာ တိုင်ဖွန်းမုန်တိုင်းဒဏ်ကြောင့် စိုက်ပျိုးမြေ ဟက်တာ ၂၅၆,ဝဝဝ နီးပါး ရေလွှမ်းမိုးဒဏ် ခံစားခဲ့ရကြောင်း MARD က ဆိုသည်။ ထို့ပြင် နိုင်ငံအတွင်းရှိ လျှပ်စစ်မီးတိုင် ၃၁,ဝဝဝ ကျော်လဲပြိုခဲ့ပြီး ဓာတ်အားပျက်တောက်မှု ပြဿနာဖြင့် ကြုံတွေ့ခဲ့ရသည်။ယင်းမုန်တိုင်းကြောင့် လျှပ်စစ်ဓာတ်အားပေးကဏ္ဍတွင် ပျက်စီးဆုံးရှုံးမှုတန်ဖိုး ဗီယက်နမ်ဒေါင် ၃၈၄ ဘီလီယံ( အမေရိကန်ဒေါ်လာ ၁၇ သန်း ) ရှိကြောင်း MARD က သတင်းထုတ်ပြန်သည်။
ဗီယက်နမ်နိုင်ငံ ဒုတိယဝန်ကြီးချုပ် ထရီဒင်ဒွန်(Trinh Dinh Dung) က ပျက်စီးဆုံးရှုံးမှုတန်ဖိုးမြင့်မားခဲ့ရခြင်းမှာ မိုးလေဝါသအခြေအနေ ကြိုတင်ခန့်မှန်းချက် အားနည်းခဲ့ခြင်းကြောင့် ဟုဆိုသည်။
ဗီယက်နမ်နိုင်ငံ မြောက်ပိုင်း Ninh Binh ပြည်နယ်သည် မီရီနေ မုန်တိုင်းဒဏ်ကို အဆိုးဝါးဆုံး ခံစားခဲ့ရကြောင်း သိရသည်။သို့သော် အရေးပေါ် အစည်းအဝေးပွဲတွင် ကမ်းရိုးတန်းတစ်လျှောက်ရှိ မြို့ငယ် ၁၂ မြို့သည် မုန်တိုင်းအန္တရာယ်ကြုံတွေ့ဖွယ်မရှိကြောင်း မိုးလေဝါသဌာနက ခန့်မှန်းချက်ထုတ်ခဲ့ကြောင်း ဗီယက်နမ်သဘာဝဘေးအန္တရာယ်ကြိုတင်ကာကွယ်ရေးကော်မတီရုံးက ထုတ်ပြန်ပြောကြားသည်။
MARD ဝန်ကြီးဌာန ဝန်ကြီး Nguyen Xuan Cuong က မိုးလေဝသခန့်မှန်းချက် တိုးတက်လာအောင် လုပ်ဆောင်ရန် လိုအပ်နေပြီဖြစ်ကြောင်း ပြောသည်။ ပစ္စည်းကိရိယာ အဆင့်မြှင့်တင်ရေး နှင့် ဝန်ထမ်းများ၏ စွမ်းဆောင်ရည်တိုးတက်အောင် သင်တန်းပေးရေး များကို လုပ်ဆောင်သွားရန် လိုအပ်ကြောင်း ၎င်းက ဖြည့်စွက်ပြောကြားသည်။ ထို့ပြင် မိုးလေဝသခန့်မှန်းချက်မှာ ပိုမိုယုံကြည် ကိုးစားမှု ရရှိနိုင်ရန်အတွက် နိုင်ငံတကာ နှင့် ပူးပေါင်းဆောင်ရွက်မှုများလည်း တိုးမြှင့်လုပ်ဆောင် သင့်ကြောင်း ပြောကြားခဲ့သည်။ (Xinhua)