ကမ္ဘောဒီးယားနိုင်ငံ၏ ခြောက်ကြိမ်မြောက် ရွေးကောက်ပွဲ ကျင်းပ

ကန်ဒဲလ်၊ ကမ္ဘောဒီးယား၊ ဇူလိုင် ၂၉ ရက် (ဆင်ဟွာ)

ကမ္ဘောဒီးယားနိုင်ငံတွင် ခြောက်ကြိမ်မြောက် အထွေထွေရွေးကောက်ပွဲကို ဇူလိုင်လ ၂၉ ရက်က စတင်ကျင်းပရာ နိုင်ငံရေးပါတီ ၂၀ ခု ဝင်ရောက်ယှဉ်ပြိုင်လျက်ရှိကြောင်း အမျိုးသား ရွေးကောက်ပွဲကော်မတီ (NEC) ၏ ပြောခွင့်ရပုဂ္ဂိုလ်က ပြောကြားခဲ့သည်။

“မဲပေးတာက ဒေသစံတော်ချိန် နံနက် ရး၀၀ နာရီ (မဲရုံ ၂၂,၉၆၇ ရုံ) မှာ စတင်ပြီး မွန်းလွဲ ၃း၀၀ နာရီမှာ ပိတ်ဖို့ စီစဉ်ထားပါတယ်” ဟု NEC အဖွဲ့ဝင်နှင့် ပြောခွင့်ရပုဂ္ဂိုလ် Dim Sovannarom က ဆင်ဟွာသို့ ပြောကြားခဲ့သည်။

ရွေးကောက်ပွဲတွင် မဲပေးပိုင်ခွင့်ရှိသူ ၈.၃၈ သန်းက မဲပေးနိုင်ရန် မျှော်လင့်ထားကြောင်း၊ ရွေးကောက်ပွဲ၌ လွှတ်တော်အမတ်နေရာ ၁၂၅ နေရာအတွက် ယှဉ်ကြမည် ဖြစ်သည်။

မဲပေးပိုင်ခွင့်ရှိသူ “၆၀ ရာခိုင်နှုန်းကျော်” လာရောက်မဲပေးကြမည်ဟု မျှော်လင့်ထားကြောင်း Sovannarom က ပြောကြားခဲ့သည်။ ၂၀၁၃ ခုနှစ် ရွေးကောက်ပွဲတွင် မဲဆန္ဒရှင် ၆၉.၆ ရာခိုင်နှုန်း လာရောက်မဲပေးခဲ့ကြကြောင်း သိရသည်။

ရွေးကောက်ပွဲ၌ လက်ရှိ အာဏာရ ဝန်ကြီးချုပ် Samdech Techo Hun Sen ၏ Cambodian People’s Party ၊ မင်းသား Norodom Ranariddh ၏ Funcinpec Party ၊ အတိုက်အခံ လွှတ်တော်အမတ်ဟောင်း Khem Veasna ၏ Democracy Party ၊ စိုက်ပျိုးရေးပညာရှင် Yang Saing Koma ၏ Grassroots Democracy Party နှင့် အတိုက်အခံအဖွဲ့ဝင်ဟောင်း Khmer Will Party ၏ Kong Monika တို့ ဝင်ရောက်ယှဉ်ပြိုင်ကြောင်း သိရသည်။

ရွေးကောက်ပွဲ ရလဒ်များအား ဇူလိုင်လ ၂၉ ရက် ညနေပိုင်း၌ ကြေညာနိုင်မည်ဟု မျှော်လင့်ထားသည်။

ကမ္ဘောဒီးယားနိုင်ငံတွင် အထွေထွေရွေးကောက်ပွဲကို ငါးနှစ်လျှင် တစ်ကြိမ်ကျင်းပလေ့ရှိကြောင်း သိရသည်။ (Xinhua)