နီပေါနိုင်ငံရှိ လျှိုမြောင်အတွင်း ဂျစ်ကား ပြုတ်ကျမှုကြောင့် လူ ၇ ဦးသေဆုံး၊ ၁၈ ဦး ဒဏ်ရာရ

ခတ္တမန္ဒူ၊ နိုဝင်ဘာ ၂၇ ရက် (ဆင်ဟွာ)

ခရီးသည် အလွန်အကျွံ တင်ဆောင်လာသည့် ဂျစ်ကား တစ်စီးသည် နီပေါနိုင်ငံ အလယ်ပိုင်း နာဝယ်ပါရာစီခရိုင်ရှိ ၁၀၀ မီတာနက်သော လျှိုမြောင် တစ်ခုအတွင်းသို့ နိုဝင်ဘာလ ၂၇ ရက်က ပြုတ်ကျသွားခဲ့ရာ လူ ၇ ဦး သေဆုံးကာ ၁၈ ဦး ဒဏ်ရာရရှိခဲ့ကြောင်း သိရသည်။

အဆိုပါ ဂျစ်ကားသည် Kadabheri ကျေးရွာမှ Bulingtar ကျေးရွာသို့ သွားရောက်စဉ်တွင် တောင်တက် အဝေးပြေးလမ်း တစ်နေရာ၌ လမ်းချော်သွားခဲ့ပြီး မြို့တော် ခတ္တမန္ဒူမှ အနောက်ဘက် ကီလိုမီတာ ၁၇၀ အကွာတွင် လျှိုထဲ ပြုတ်ကျခဲ့ခြင်း ဖြစ်သည်။

ယာဉ်မောင်းသူ အပါအဝင် ဒဏ်ရာရရှိသူ ၃ ဦးသည် စိုးရိမ်ဖွယ် အခြေအနေဖြစ်ပြီး ဒေသခံ ဆေးရုံသို့ ပို့ဆောင်ထားကြောင်း ခရိုင်ရဲတပ်ဖွဲ့ဝင် Kismat Balal Magar က ဆင်ဟွာသို့ ပြောသည်။

ခရီးသည် အလွန်အကျွံတင်ဆောင်ခြင်းနှင့် အရှိန်မထိန်းနိုင်ခြင်းများကြောင့် အလားတူ မတော်တဆမှုမျိုး မကြာခဏ ဖြစ်ပွားလေ့ရှိကြောင်း နီပေါနိုင်ငံ ပြည်ထဲရေး ဝန်ကြီးဋ္ဌာန တာဝန်ရှိသူများက ပြောသည်။

ထိုသို့ စည်းကမ်းမဲ့ လုပ်ဆောင်မှုများအား တင်းကျပ်စွာ အရေးယူ ထိန်းချုပ်ရန် ဒေသဆိုင်ရာ အစိုးရနှင့် ရဲတပ်ဖွဲ့အား ညွှန်ကြားထားပြီး ဖြစ်ကြောင်း ဝန်ကြီးဋ္ဌာန၏ ထုတ်ပြန်ချက်၌ ဖော်ပြထားသည်။ (Xinhua)