ပါကစ္စတန်နိုင်ငံ အနောက်တောင်ပိုင်းတွင် ဘတ်စ်ကားနှင့် ထရပ်ကားတိုက်မှုကြောင့် လူ ၆ ဦးသေဆုံး၊ ၂၁ ဦး ဒဏ်ရာရ

အစ္စလာမ်မာဘတ်၊ ဧပြီ ၆ ရက် (ဆင်ဟွာ)

ပါကစ္စတန်နိုင်ငံ အနောက်တောင်ပိုင်း ဘလူးချီစတန်ပြည်နယ် ခုဇ်ဒါခရိုင်တွင် ဧပြီလ ၅ ရက်က ထရပ်ကားတစ်စီးနှင့် ဘတ်စ်ကားတစ်စီး ခေါင်းချင်းဆိုင်တိုက်မိရာ အမျိုးသမီးတစ်ဦး အပါအဝင် အနည်းဆုံး လူ ၆ ဦး သေဆုံးကာ ၂၁ ဦး ဒဏ်ရာရရှိခဲ့ကြောင်း တာဝန်ရှိသူတစ်ဦးက ပြောကြားခဲ့သည်။

ခုဇ်ဒါခရိုင် ခါအာနယ်မြေရှိ အဝေးပြေးလမ်းတွင် အရှိန်လွန်မောင်းနှင်လာသော ထရပ်ကားတစ်စီးက မျက်နှာချင်းဆိုင်ယာဉ်ကြောမှ မောင်းနှင်လာသည့် ခရီးသည်တင်ဘတ်စ်ကားနှင့် တိုက်မိခဲ့ခြင်းဖြစ်ကြောင်း ခုဇ်ဒါခရိုင် လက်ထောက် ရဲမင်းကြီး မူဟာမက် အီယတ်စ် ကစ်ဘ်ဇိုင် (Muhammad Ilyas Kibzai) က မီဒီယာသို့ ပြောခဲ့သည်။

အခင်းဖြစ်ပွားရာနေရာသို့ ရဲတပ်ဖွဲ့ဝင်များနှင့် ကယ်ဆယ်ရေးအဖွဲ့များ ချက်ချင်းရောက်လာကာ သေဆုံးသူများနှင့် ဒဏ်ရာရသူများအား ခုဇ်ဒါရှိ ဆေးရုံသို့ ပို့ဆောင်ခဲ့ကြောင်း သိရသည်။

ဒဏ်ရာရသူများမှာ အထူးကြပ်မတ်ဆောင်တွင် ရှိနေသည့် စိုးရိမ်ဖွယ် အခြေအနေတွင်ရှိနေသည့်အတွက် သေဆုံးသည့်အရေအတွက် မြင့်တက်နိုင်ကြောင်း အဆိုပါ တာဝန်ရှိသူက ပြောကြားခဲ့သည်။

ယာဉ်တိုက်မှုတွင် ပါဝင်သည့် ခရီးသည်တင်ဘတ်စ်ကားမှာ အနောက်တောင်ပိုင်း ပြည်နယ်မြို့တော် ကွက်တာမှ နိုင်ငံတောင်ပိုင်း ကရာချိမြို့သို့ ဦးတည်သွားနေခြင်း ဖြစ်သည်။ (Xinhua)