ဗီယက်နမ်နိုင်ငံတွင် ပြုလုပ်မည့် အမေရိကန်-မြောက်ကိုရီးယား ထိပ်သီးအစည်းအဝေး တက်ရောက်ရန် ပြည်ပသတင်းသမား ၂,၆၀၀ စာရင်းပေး

ဟနွိုင်း၊ ဖေဖော်ဝါရီ ၂၂ ရက် (ဆင်ဟွာ)

ဗီယက်နမ်နိုင်ငံ၌ ဖေဖော်ဝါရီ ၂၇ ရက်နှင့် ၂၈ ရက်တွင် တွေ့ဆုံရန် စီစဉ်ထားသော အမေရိကန်-မြောက်ကိုရီးယား ဒုတိယအကြိမ်မြောက် ထိပ်သီးအစည်းအဝေးသို့ တက်ရောက်သတင်းယူရန်အတွက် ပြည်ပသတင်းသမား ၂,၆၀၀ ခန့် စာရင်းပေးထားကြောင်း ဗီယက်နမ် ဒုတိယနိုင်ငံခြားရေးဝန်ကြီး လီဟွိုင်းထရန် (Le Honai Trung) က ဖေဖော်ဝါရီလ ၂၁ ရက်တွင် ပြုလုပ်သည့် သတင်းစာရှင်းလင်းပွဲ၌ ပြောကြားခဲ့သည်။

အမေရိကန်နိုင်ငံ သမ္မတ ဒေါ်နယ်ထရမ့် (Donald Trump) က ၎င်းတို့၏ တွေ့ဆုံပွဲနေရာအဖြစ် ဗီယက်နမ်နိုင်ငံ ဟနွိုင်းမြို့အား ရွေးချယ်လိုက်ကြောင်း ကြေညာပြီးနောက် ယင်းအတွက် ပြင်ဆင်ရန် ရက် ၂၀ သာ ရရှိကြောင်း၊ ပထမအကြိမ် အမေရိကန်-မြောက်ကိုရီးယား ထိပ်သီးအစည်းအဝေးအား ပြီးခဲ့သည့်နှစ် စင်ကာပူနိုင်ငံတွင် ကျင်းပခဲ့စဉ်က ပြင်ဆင်ချိန် နှစ်လနီးပါး ရရှိခဲ့ကြောင်း ထရန် (Trung) က ပြောကြားခဲ့သည်။

အဆိုပါ ထိပ်သီးအစည်းအဝေးအား အောင်မြင်စွာ ကျင်းပနိုင်ရန် အတတ်နိုင်ဆုံး လုံခြုံရေးနှင့် ဘေးကင်းရေးအား သေချာစွာ လုပ်ဆောင်ရန် ဝန်ကြီးဌာနများနှင့် သက်ဆိုင်ရာ တာဝန်ရှိသူများအား ဗီယက်နမ်နိုင်ငံ ဝန်ကြီးချုပ် ငုယင်ကျန်းဖက် (Nguyen Xuan Phuc) က မကြာသေးမီက ညွှန်ကြားခဲ့သည်။ဝန်ကြီးချုပ်က လက်ခံကြိုဆိုရေးလုပ်ငန်းအား အထူးအာရုံစိုက်လုပ်ဆောင်ရန်နှင့် အစည်းအဝေးသို့ သတင်းလာယူကြမည့် နိုင်ငံတကာ သတင်းထောက်များအတွက် နေရာအများဆုံး စီစဉ်ပေးရန် လိုအပ်ကြောင်းလည်း အလေးထားပြောကြားခဲ့သည်။ (Xinhua)