ဂျပန်နိုင်ငံ Niigata စီရင်စုတွင် အဆောက်အအုံ ၁၀ လုံးကျော် မီးလောင်မှုဖြစ်ပွား၊ လူ ၃ ဦးသေဆုံး

တိုကျို ၊ ဇန်နဝါရီ ၃ ရက်(ဆင်ဟွာ)

ဂျပန်နိုင်ငံ Niigata စီရင်စု Sadoမြို့ လူနေအဆောက်အအုံတစ်ခုတွင် ဇန်နဝါရီ ၂ ရက် နံနက်ပိုင်းက မီးလောင်မှုဖြစ်ပွားရာ အနီးရှိ လူနေအိမ်ခြေများနှင့်ဆိုင်ခန်းများအပါအဝင် အဆောက်အအုံ ၁၀ ခု ကျော်ကို မီးကူးဆက်ခဲ့ကြောင်း၊ မီးလောင်မှုကြောင့် သေဆုံးသူ ၃ ဦး ရှိပြီဖြစ်ကြောင်း ဂျပန်မီဒီယာများ ၏သတင်းများအရ သိရသည်။

မီးလောင်မှုဖြစ်ပွားချိန်မှာ ဇန်နဝါရီ ၂ ရက် နံနက် ၃ နာရီ ၄၅ မိနစ်ခန့်က ဖြစ်ကြောင်း ၊ သေဆုံးသူ ၃ ဦးမှာ မီးစတင်လောင်ကျွမ်းခဲ့သည့်အိမ်ရှိ လင်မယားနှစ်ဦးနှင့်သားဖြစ်သူတို့ဖြစ်ကြောင်း ဒေသခံရဲဘက် ဆိုင်ရာက ဆိုသည်။

အချင်းဖြစ်ပွားစဉ် သေဆုံးသူ သားဖြစ်သူက အခြားမိသားစုဝင်များနှင့်အတူဘေးလွတ်ရာသို့ ထွက်ပြေးလွတ်မြောက် သွားပြီဖြစ်သော်လည်း ၊ မိဘကို ကယ်ဆယ်ရန် ပြန်လာရာတွင် ယခုလို သေဆုံးခဲ့ခြင်းဖြစ်ကြောင်း သတင်းများအရသိရသည်။

ယခု မီးလောင်မှုတွင် မီးစတင်လောင်ကျွမ်းသည့်နေအိမ်အပါအဝင် အဆောက်အအုံ ၁၅ ခု မီးဒဏ်သင့်ခဲ့ ကြောင်း၊ အရန်မီးသတ်တပ်ဖွဲ့ဝင်များက ၇ နာရီကြာ မီးငြိမ်းသတ်ခဲ့ရကြောင်း ဒေသခံမီးသတ်ဌာနက ပြောကြားခဲ့သည်။

လက်ရှိတွင် အချင်းဖြစ်ပွားသည့် အကြောင်းရင်းကို စုံစမ်းစစ်ဆေးလျက်ရှိကြောင်း သိရသည်။ အချင်းဖြစ်ပွားသည့်နေရာမှာ Sadoမြို့Ryotsu ဆိပ်ကမ်းအနီးတွင်ဖြစ်ရာ သစ်သားအဆောက်အအုံ များ စုစည်းနေသည့်နေရာဖြစ်ကြောင်းသိရသည်။ ၎င်းနေရာအနီးတွင် လွန်ခဲ့သောနှစ် ဖေဖော်ဝါရီလ ကလည်း အဆောက်အအုံ ၁၀ ခုထက်မနည်း မီးလောင်မှုဖြစ်ပွားခဲ့ ကြောင်း သိရသည်။ (Xinhua)