Education & Health
ရာသီတုပ်ကွေး H1N1 ရောဂါကြောင့် သေဆုံးသူ ၁၀၅ ဦးထိ မြင့်တက်
ရန်ကုန် ၊ သြဂုတ် ၂၇ ရက် (ဆင်ဟွာ)
နိုင်ငံတစ်ဝန်းတွင် ရာသီတုပ်ကွေး H1N1 ရောဂါဖြစ်ပွားသူနှင့် သေဆုံးသူ နေ့စဉ်တိုးလာပြီး ၂၀၁၉ ခုနှစ် သြဂုတ် ၂၆ရက်အထိ သေဆုံးသူ ၁၀၅ဦးရှိလာကြောင်း ပြည်သူ့ကျန်းမာရေး ဦးစီးဌာန၏ ထုတ်ပြန်မှု အရ သိရသည်။
တိုင်းဒေသကြီး/ပြည်နယ် အလိုက် ရာသီတုပ်ကွေးရောဂါကြောင့် ဇန်နဝါရီ ၁ ရက်မှ သြဂုတ် ၂၆ ရက် အထိ ရာသီတုပ်ကွေးဖြစ်ပွားသူ ဦးရေမှာ ၅၉၃ဦး ရှိရာ သေဆုံးသူ ၁၀၅ ဦးထိ ရှိလာပြီး ရာသီတုပ်ကွေးရောဂါဖြင့် တိုင်းဒေသကြီး/ပြည်နယ် အလိုက် ဓာတ်ခွဲ စစ်ဆေးသူ စုစုပေါင်း ၁,၄၂၀ဦး ရှိကြောင်း သိရသည်။
သေဆုံးသူများမှာ ရန်ကုန်တိုင်းဒေသကြီးတွင် ၆၈ဦး ၊ ဧရာဝတီ တိုင်းဒေသကြီးတွင် ၁၃ ဦး ၊ စစ်ကိုင်းတိုင်းဒေသကြီးတွင် ၃ ဦး၊ ပဲခူးတိုင်းဒေသကြီးတွင် ၁၀ ဦး၊မွန်ပြည်နယ်တွင် ၃ ဦး၊ မကွေးတိုင်းဒေသကြီးတွင် ၃ ဦး၊ရှမ်းပြည်နယ်(တောင်ပိုင်း) ၁ ဦး၊ကချင်ပြည်နယ်တွင် ၁ဦး၊ တနင်္လာရီတိုင်းဒေသကြီး ၁ ဦးနှင့် ရခိုင်ပြည်နယ်တွင် ၂ဦးတို့ဖြစ်ကြောင်း သိရသည်။
ရာသီတုပ်ကွေး H1N1 ရောဂါကြောင့် သြဂုတ် ၂၆ ရက်ထိ ရန်ကုန်တိုင်းဒေသကြီးတွင် နှစ်ဦးနှင့် ပဲခူးတိုင်းဒေသကြီးတွင် တစ်ဦး ထပ်မံတိုးလာသဖြင့် သေဆုံးသူ ၁၀၅ ဦးထိဖြစ်လာကြောင်း သိရသည်။
လက်ရှိတွင် တိုင်းဒေသကြီး/ပြည်နယ် ၁၀ခုတွင် ရာသီတုပ်ကွေးရောဂါ (A(H1N1)pdm 09)ဖြစ်ပွားလျက်ရှိပြီး ရန်ကုန်တိုင်းဒေသကြီးတွင် ဖြစ်ပွားသူ ဦးရေအများဆုံးဖြစ်ပြီး ဒုတိယ အများဆုံးအဖြစ် ဧရာဝတီတိုင်းဒေသကြီးနှင့် တတိယအများဆုံး ပဲခူးတိုင်းဒေသကြီး တို့ဖြစ်ကြောင်း သိရသည်။(Xinhua)
