ချောက်မြို့နယ်ရှိ သဘာဝဓာတ်ငွေ့ ပိုက်လိုင်း ယိုစိမ့်မှုအား ပြုပြင်ဆောင်ရွက်

ရန်ကုန်၊ ဇွန် ၁၉ ရက် (ဆင်ဟွာ)

မကွေးတိုင်းဒေသကြီး ချောက်မြို့နယ်ရှိ သဘာဝဓာတ်ငွေ့ပိုက်လိုင်း ယိုစိမ့်မှုအား ပြုပြင်ဆောင်ရွက်နေကြောင်း ပြည်ထဲရေးဝန်ကြီးဌာနက ထုတ်ပြန်သော သတင်းအရ သိရသည်။

အဆိုပါ သဘာဝဓာတ်ငွေ့လိုင်းသည် ဇွန် ၁၈ရက်နေ့ ညပိုင်းတွင် အရာတော်ရေနံမြေမှ ချောက်ရေနံမြေသို့ ပို့လွှတ်သည့် အချင်း ၁၀ လက်မခန့် သဘာဝဓါတ်ငွေ့ပိုက်လိုင်းတွင် အရာတော် ရေနံမြေတောင်ဘက် ၅ မိုင်ခန့်အကွာ ခန့်မှန်းမြေပုံအညွှန်း အက်ဖ်ယူ-၈၆၉၃၆၄ ၌ သဘာဝဘေး ဒဏ်ကြောင့် ဆွေးမြေ့ပြီး လေဖိအားတွန်းကန်ကာ ဓါတ်ငွေ့များစိမ့်ထွက်လျက်ရှိကြောင်း သိရသည်။

ယင်း ဓာတ်ငွေ့များစိမ့်ထွက်နေသဖြင့် ဓါတ်ငွေ့ပို့လွှတ်မှုအား ယာယီရပ်ဆိုင်းထားကြောင်းနှင့် အရာတော်ရေနံမြေ အင်ဂျင်နီယာဌာနမှ ပြန်လည်ပြုပြင်ရန် စီစဉ် ဆောင်ရွက်လျက်ရှိကြောင်း သိရသည်။(Xinhua)