မြန်မာ့လက်ရွေးစင် အမျိုးသမီး ယူ၁၉ ဘောလုံးအသင်း၏ အာရှယူ၁၉ ဖိုင်နယ်ပွဲစဉ်များ ထွက်ရှိ

ရန်ကုန်၊ မေ ၂၄ ရက် (ဆင်ဟွာ)

ထိုင်းနိုင်ငံက အိမ်ရှင်အဖြစ် လက်ခံကျင်းပမည့် ၂၀၁၉ ခုနှစ် အာရှ အမျိုးသမီး ယူ၁၉ ချန်ပီယံရှစ် နောက်ဆုံးအဆင့် ဘောလုံးပွဲစဉ်များ AFC U19 Championship 2019 Thailand တွင်ပါဝင်ယှဉ်ပြိုင်မည့် အသင်းများ အုပ်စုနှင့် ပွဲစဉ်ဇယားထွက်ရှိလာပြီဖြစ်ကြောင်း မြန်မာနိုင်ငံဘောလုံးအဖွဲ့ချုပ် က သတင်းထုတ်ပြန်သည်။

အုပ်စုမဲခွဲမှုအရ မြန်မာ အမျိုးသမီး ယူ၁၉ အသင်းသည် အုပ်စု(ခ)တွင် အာရှအင်အားကြီး အသင်းများဖြစ်သည့် တရုတ်၊ ဂျပန်၊ တောင်ကိုရီးယား တို့နှင့်အတူကျရောက်နေပြီး အုပ်စုပွဲစဉ်များကို ၂၀၁၉ ခုနှစ် အောက်တိုဘာ ၂၈ ရက်နေ့မှ နိုဝင်ဘာလ ၃ ရက်နေ့အထိ ယှဉ်ပြိုင် ကစားရမည်ဖြစ်သည်။ မြန်မာအမျိုးသမီး အသင်းပွဲစဉ်များအား IPE Chonburi Stadium တွင်ကျင်းပမည် ဖြစ်ပြီး ပွဲချိန်များကိုမူ ထုတ်ပြန်ကြေညာ ထားခြင်း မရှိသေးကြောင်း သိရသည်။

မြန်မာ့လက်ရွေးစင် အမျိုးသမီး ယူ၁၉ အသင်းသည် ပြီးခဲ့သည့် ၂၀၁၉ ဧပြီလအတွင်းက မန္တလာသီရိကွင်းတွင် ကျင်းပခဲ့သည့် ခြေစစ်ပွဲစဉ်များတွင် ဥဇဘက်ကစ္စတန် အသင်းကို (၁-ဝ)ဂိုး၊ နီပေါအသင်းကို (၂-၁)ဂိုး တို့ဖြင့် အနိုင်ရခဲ့ပြီး သြစတြေးလျအသင်းကို (၁-၃)ဂိုးဖြင့် အရေးနိမ့်ခဲ့သည်။ အုပ်စု ပွဲစဉ် ၃ ပွဲတွင် နှစ်ပွဲနိုင် တစ်ပွဲရှုံး ရမှတ် ၆ မှတ်ဖြင့် အုပ်စု ဒုတိယ နေရာမှ ခြေစစ်ပွဲ အောင်မြင်ခဲ့ခြင်း ဖြစ်ကြောင်း မြန်မာနိုင်ငံဘောလုံးအဖွဲ့ချုပ် ၏ သတင်းထုတ်ပြန်ချက်တွင် ပါရှိသည်။ (Xinhua)