“တရုတ်-မြန်မာ ဆွေမျိုးပေါက်ဖော်သံယောဇဉ် ပေါင်းကူးတံတား ဖန်တီးသူများ”

ရန်ကုန် ၊ ဇွန် ၈ ရက် (ဆင်ဟွာ)

တရုတ်-မြန်မာ COVID-19 ပူးပေါင်းကာကွယ်တိုက်ဖျက်ရေးအတွက် ဧပြီလမှ မေလအတွင်း တရုတ် ပြည်သူ့သမ္မတနိုင်ငံမှ မြန်မာနိုင်ငံသို့  ဆေးဘက်ဆိုင်ရာအတတ်ပညာရှင် (၃) ဖွဲ့အား စေလွှတ်ခဲ့ပါသည်။ မထင်ရှားသော်လည်း အပူဒဏ်ကိုအံတုလျက်  ဆေးရုံဆေးခန်းနှင့် ဓာတ်ခွဲခန်းများတွင် အတတ်ပညာရှင်များ နှင့်အတူ အချိန်ပြည့် လုပ်ငန်းဆောင်ရွက်နေသော ဘာသာပြန်စေတနာ့ဝန်ထမ်းများ ရှိခဲ့ပါသည်။ 

ရန်ကုန်ယူနန်လူမှုကူညီရေးအသင်းမှ  ဒေါက်တာနော်ဂျာ သည် ကျန်းမာရေးနှင့်အားကစားဝန်ကြီးဌာန၏ ဖိတ်ကြားချက်အရ ယင်းစေတနာ့ဝန်ထမ်းဘာသာပြန်အဖွဲ့ကို ဦးဆောင်ဖွဲ့စည်းခဲ့သူ ဖြစ်ပါသည်။ ဧပြီ ၆ ရက်နေ့ ညွှန်ကြားချက်အရ ဒေါက်တာနော်ဂျာ သည် (၁)ရက်အတွင်း ဘာသာပြန်စေတနာ့ဝန်ထမ်းများ ရှာဖွေရန် လိုအပ်သဖြင့် လူမှုကွန်ယက်များမှတဆင့် ညတွင်းချင်း အရေးပေါ် ကြေညာပြီး ရှာဖွေခဲ့ပါ သည်။ 

ဧပြီလ ၁၀ ရက် တွင် မြောက်ဥက္ကလာပ ဆေးရုံ၌ တရုတ်နိုင်ငံ ဆေးဘက်ဆိုင်ရာ ပညာရှင်က ဘာသာပြန်မှ တစ်ဆင့် မြန်မာနိုင်ငံဘက်မှတာဝန်ရှိသူအား ကပ်ရောဂါ တိုက်ဖျက်ရေး အတွေ့အကြုံများ မျှဝေပေးနေစဉ် (ဆင်ဟွာ)

ကြေညာပြီး နာရီပိုင်းအတွင်း စေတနာ့ဝန်ထမ်း(၂၀)ကျော် လျှောက်ထားလာခဲ့ပြီး တစ်ရက်အတွင်း လျှောက်ထားသူ တစ်ရာကျော် ရရှိခဲ့ပါသည်။ ယင်းထဲမှ တရုတ်နိုင်ငံသား (၂)ဦးလဲ ပါဝင်ခဲ့ပါသည်။ သူတို့သည် မြန်မာစကားမတတ်သဖြင့် ဘာသာပြန်မှုမပြုလုပ်နိုင်သော်လည်း ကားမောင်း သို့မဟုတ် ထမင်းပို့စသော တောက်တိုမယ်ရ အလုပ်ကို လုပ်ပေးချင်ကြောင်းကိုလည်း ပြောကြားခဲ့ပါသည်။

သို့သော် လုပ်ငန်းလိုအပ်ချက်နှင့် စေတနာ့ဝန်ထမ်းများ၏ဘေးကင်းလုံခြုံရေးအရ ဒေါက်တာနော်ဂျာ သည် လျှောက်လွှာတင်ထားသော (၁၂၀) ကျော်မှ ဆေးဘက်ဆိုင်ရာနောက်ခံရှိသော စေတနာ့ဝန်ထမ်း (၂၅) ဦးကိုသာ ရွေးချယ်ခဲ့ပါသည်။ အသက် (၁၈) နှစ်သာ ရှိသော ဆေးကျောင်းသူမှာ အသက်အငယ်ဆုံးသူအဖြစ် ပါဝင်ကြောင်းလဲ သိရှိရသည်။ ထို့နောက် တရုတ်ဆေးပညာရှင်များ၏ လိုအပ်ချက်အရ ကုသရေးအဖွဲ့ ၊ ရောဂါကာကွယ်ထိန်းချုပ်ရေးအဖွဲ့ ၊ တိုင်းရင်းဆေးပညာအဖွဲ့နှင့် ဓာတ်ခွဲစစ်ဆေးရေးအဖွဲ့ဟူ၍ အဖွဲ့ (၄)ဖွဲ့ ခွဲကာ ရန်ကုန်နှင့် မန္တလေးတွင် အလှည့်ကျ တာဝန်ထမ်းဆောင် ခဲ့ပါသည်။

ဧပြီလ ၁၀ ရက် တွင် မြောက်ဥက္ကလာပ ဆေးရုံ ၌ တရုတ် နိုင်ငံဆေးပညာရှင် အဖွဲ့ က ဘာသာပြန် မှ တစ်ဆင့် မြန်မာ နိုင်ငံ ဆေးဘက်ဆိုင်ရာ ဝန်ထမ်း နှင့် သီးသန့်ခွဲခြားထားရှိရန်နေရာတွင် လုပ်ငန်းနှင့် ပတ်သက်၍ ဆွေးနွေးနေစဉ် (ဆင်ဟွာ)

ထိုအချိန်တွင် မြန်မာနိုင်ငံ၏ မြို့အများစုသည် အသွားအလာကန့်သတ်ချက်များ ထုတ်ပြန်ကာ စိုးရိမ်ဖွယ်အကောင်းဆုံးသော အချိန်အခါဖြစ်ပါသည်။ ယင်းစေတနာ့ ဝန်ထမ်းများသည်လည်း လူသားဖြစ်သည့်အလျောက် ကြောက်လန့်သော်လည်း နှင်းထဲမီးပေးသလို နိုင်ငံရပ်ခြားမှ လာရောက်ကူညီသော တရုတ်ဆေးပညာရှင်များနှင့် ရှေ့တန်းမှ စွမ်းစွမ်းတမံ COVID-19 နှင့် တိုက်ခိုက်နေသော မြန်မာ့ကျန်းမာရေးဝန်ထမ်းများကို လေးစားအားကျလျက်  ရဲရဲဝံ့ဝံ့ တာဝန်ကျေပွန်စွာ ထမ်းဆောင်ခဲ့ပါသည်။ 

စေတနာ့ဝန်ထမ်းများသည် ဘာသာပြန်သာ ဆိုသော်ငြားလည်း တရုတ်-မြန်မာ ကျန်းမာရေးလုပ်ငန်း ပူပေါင်းဆောင်ရွက်မှု အဆင်ပြေစေရန်အလို့ငှာ လိုအပ်သော ညှိနှိုင်းမှုများ၊ ဆက်သွယ်မှုများ၊ ခရီးစဉ် စီစဉ်မှုများနှင့် နောက်ဆက်တွဲဆောင်ရွက်မှုများကိုပါ တာဝန်ယူဆောင်ရွက် ခဲ့ရပါသည်။ ပင်ပန်းသော်လည်း စေတနာ့ဝန်ထမ်းများမှာ အမျိုးသားရေးတစ်ရပ်အနေဖြင့် ပါဝင်နိုင်ခဲ့မှုကြောင့် များစွာပီတိ ဖြစ်ခဲ့ ပါသည်။  မြန်မာ့ဆေးပညာရှင်များကလည်း ယင်းပူးပေါင်းဆောင်ရွက်ခြင်းမှ တရုတ်ဆေးပညာရှင်များ  မျှဝေခဲ့သော အတွေ့အကြုံများနှင့် နည်းစနစ်များမှာ လွယ်ကူပြီး အလွန်ထိရောက်ပါသည်ဟုလည်း ပြောကြားခဲ့ပါသည်။ 

လုပ်ငန်းဆောင်ရွက်မှု ပြီးစီးပြီး နောက် တွင် လုပ်အားပေးများ နှင့် ယူနန် ဆေးဘက်ဆိုင်ရာ ပညာရှင် များ အတူတကွ စုပေါင်းအမှတ်တရဓာတ်ပုံ ရိုက်ကူးစဉ် (ဓာတ်ပုံ – ဘာသာပြန်စေတနာ့ဝန်ထမ်းတစ်ဦး)

ဒေါက်တာနော်ဂျာ အနေဖြင့် မှတ်ရစရာတစ်ခုမှာ နှစ်ဖက်ကျန်းမာရေးပညာရှင်များက စေတနာ့ဝန်ထမ်းများကို အလေးထားစောင့်ရှောက်ခဲ့ခြင်းပင် ဖြစ်ပါသည်။ လိုအပ်သော ကာကွယ်ရေးဝတ်စုံများ ပေးအပ်ခြင်းနှင့် အသေးစိတ်သင်ကြားပေးခြင်းများ ပြုလုပ်ပေးခဲ့ပါသည်။ တရုတ်ဆေးပညာရှင်အဖွဲ့ခေါင်းဆောင် ရန်လိကျွမ်းက စေတနာ့ဝန်ထမ်းများ၏ ဘေးကင်းလုံခြုံရေးကို ရာနှုန်းပြည့် ကာကွယ်သွားမည်ဟုလည်း ပြောကြားခဲ့ပါသည်။ အန္တရာယ်များသည့်နေရာများကိုလည်း စေတနာ့ဝန်ထမ်းများ မဝင်ရောက်စေပဲ ၎င်းကိုယ်တိုင်သာ ဝင်ရောက်ခဲ့သော လုပ်ဆောင်ချက်များသည် စေတနာ့ဝန်ထမ်းများ၏ နှလုံသားကို လွန်စွာနွေးထွေးစေခဲ့ပါသည်။

လုပ်ငန်းဆောင်ရွက်မှု ပြီးစီးပြီး နောက် တွင် လုပ်အားပေးများ နှင့် တရုတ် နိုင်ငံ စစ်ဘက်ဆိုင်ရာ ဆေး ပညာရှင် များ အတူတကွ စုပေါင်းအမှတ်တရဓာတ်ပုံ ရိုက်ကူးစဉ်(ဓာတ်ပုံ – ဘာသာပြန်စေတနာ့ဝန်ထမ်းတစ်ဦး)

စေတနာ့ဝန်ထမ်းများသည် အတတ်ပညာရှင်များနှင့်အတူ နေ့စဉ် မနက် (၆) နာရီတွင် အိပ်ရာထပြီး  ည(၁၂)နာရီကျော်မှ အိပ်ရာဝင် အနားယူခဲ့ကြောင်း ပြောကြားခဲ့သည်။ ဒေါက်တာနော်ဂျာမှာ (၅) ရက်ကြာ စေတနာ့ဝန်ထမ်း တာဝန်ထမ်းဆောင်ခဲ့ပြီးနောက် လည်ချောင်းနာလာသဖြင့် မိမိကိုယ်ကို ကူးစက်ခံရပြီလားဟု သံသယဝင်ကာ လွန်စွာကြောက်လန့်ခဲ့ပါသည်။ စိတ်ဖိအားလည်း အတော်ခံစားခဲ့ရပါသည်။ သီးသန့်ခွဲခြားနေထိုင်ကာ ကံကောင်းစွာဖြင့် (၃)ရက်အကြာတွင် ပြန်လည်ပျောက်ကင်းခဲ့ကာ ဆေးပညာရှင်များ မန္တလေးမှ ရန်ကုန်သို့ ပြန်လည်ရောက်ရှိချိန်တွင် ဆက်လက်တာဝန်ထမ်းဆောင် ခဲ့ပါသည်။ 

လုပ်အားပေး ဘာသာပြန် အဖွဲ့ဝင် များအား မြင်တွေ့ရစဉ်(ဓာတ်ပုံ – ဘာသာပြန်စေတနာ့ဝန်ထမ်းတစ်ဦး)

စေတနာ့ဝန်ထမ်းဘာသာပြန်များ၏ ကူညီဆောင်ရွက်မှုဖြင့် COVID-19 ကပ်ရောဂါတိုက်ဖျက်ရေးအတွက် (၂) လအတွင်း တရုတ်နိုင်ငံမှ မြန်မာနိုင်ငံသို့ စေလွှတ်ခဲ့သည့် ယူနန်ဆေးပညာရှင်အဖွဲ့၊ ရှန်ဟိုင်းစစ်ဆေးပညာရှင်အဖွဲ့နှင့် ယူနန်ဓာတ်ခွဲကျွမ်းကျင်ပညာရှင်အဖွဲ့ တို့၏ နေပြည်တော်၊ ရန်ကုန်နှင့် မန္တလေးမြို့ များတွင် နည်းပညာဆွေးနွေးပွဲများ၊ ကွင်းဆင်းလေ့လာမှုများ၊ ဓာတ်ခွဲခန်းထူထောင်မှုများနှင့် ဓာတ်ခွဲနည်းပညာသင်တန်းများစသော ဆောင်ရွက်ချက်များတွင် ချောမွေ့အောင်မြင်စွာ ဆောင်ရွက်နိုင်ခဲ့ပါသည်။

တရုတ်-မြန်မာဆေးပညာရှင်များနှင့် စေတနာ့ဝန်ထမ်းများသည် လက်ရှိအချိန်ထိ လူမှုကွန်ယက် Group များမှ တဆင့် ဆက်သွယ်ကာ အချိန်အားလျော်စွာ မြန်မာနိုင်ငံ၏ ရောဂါတိုက်ဖျက်ရေးအခြေအနေများ မေးမြန်းခြင်း၊ ဆွေးနွေးခြင်းများ ဆက်လက်လုပ်ဆောင်လျက်ရှိပါသည်။ မိမိအနေဖြင့် COVID-19 ကာကွယ်တိုက်ဖျက်ရာတွင် ယင်းနှစ်နိုင်ငံပူးပေါင်းဆောင်ရွက်မှုသည် တရုတ်-မြန်မာဆွေမျိုးပေါက်ဖော် သံယောဇဉ်အား ပိုမိုပေါ်လွင်စေသော ဆောင်ရွက်မှု ဖြစ်ကြောင်းလည်း ပြောကြားခဲ့ပါသည်။ (Xinhua)