အိန္ဒိယမြောက်ပိုင်းတွင် အဆောက်အအုံပြိုကျရာ လူ၄ဦးသေဆုံးပြီး ၃၀ဦးပိတ်မိနေ

နယူးဒေလီ၊ ဖေဖော်ဝါရီ ၂ ရက် (ဆင်ဟွာ)

အိန္ဒိယနိုင်ငံ မြောက်ပိုင်း Uttar Pradesh ပြည်နယ်တွင် ဖေဖော်ဝါရီ ၁ရက်က ဆောက်လုပ်ဆဲ အဆောက်အဦတစ်လုံး ပြိုကျခဲ့ရာ လူ ၄ဦးထက်မနည်းသေဆုံးပြီး အခြားလူ ၁၇ဦးဒဏ်ရာရရှိခဲ့ကြောင်း တာဝန်ရှိသူများက ပြောကြားခဲ့သည်။

တာဝန်ရှိသူများ၏ ပြောကြားချက်အရ ခြောက်ထပ်တိုက်အဆောက်အဦ ၏ အပျက်အစီးများကြားတွင် ပိတ်မိနေသည့် လူအယောက် ၃၀ ကို ကယ်ဆယ်ရေးသမားများက ကြိုးစားရှာဖွေနေကြကြောင်း သိရသည်။

Uttar Pradesh ပြည်နယ် မြို့တော် Lucknowမြို့ အနောက်တောင်ဘက် ၈၃ကီလိုမီတာ ခန့်အကွာ Kanpur မြို့ရှိ Jajmau ဆင်ခြေဖုံးတွင် နေ့လည်ပိုင်းက ယင်းအဆောက်အဦပြိုကျခဲ့ခြင်းဖြစ်ကြောင်း သိရသည်။

ခရိုင်အုပ်ချုပ်ရေးမှူး Kaushal Raj Sharma က “ဒီနေ့ နေ့လည်ပိုင်းက ဆောက်လက်စ အဆောက်အဦ ပြိုကျခဲ့တဲ့အတွက် လူအယောက် ၅၀ ပိတ်မိနေပြီး အများစု က အလုပ်သမားတွေဖြစ်ပါတယ်” ဟု ဆင်ဟွာသို့ပြောကြားခဲ့သည်။

၎င်းက “ပြိုကျမှုဖြစ်ပြီးတာနဲ့ အပျက်အစီးတွေအောက်မှာ ပိတ်မိနေသူတွေကို ကယ်ဖို့အတွက် ရဲတပ်ဖွဲ့နဲ့ အခြားအဖွဲ့တွေကို စေလွှတ်ပေးခဲ့ပါတယ်။ ကယ်ဆယ်ရေးသမားတွေက လူ ၂၁ဦးကို ဒဏ်ရာရရှိနေတဲ့ အနေအထားနဲ့ ကယ်ထုတ်လာနိုင်ခဲ့ပေမယ့် လူ၄ဦးကတော့ သေဆုံးသွားခဲ့ပြီး ၁၇ဦးကိုတော့ ဆေးရုံသို့ ပို့ပေးထားပါတယ်” ဟုပြောကြားခဲ့သည်။

Sharma က ကယ်ဆယ်ရေးလုပ်ငန်းများဆောင်ရွက်နေဆဲဖြစ်ပြီး အပြီးသတ်ဆောင်ရွက်ဖို့အတွက် နာရီပေါင်းများစွာ ကြာမြင့်နိုင်မည်ဖြစ်ကြောင်း သိရသည်။

ပြည်တွင်းသတင်းဋ္ဌာနများ၏ ဖော်ပြချက်အရ ပြိုကျခဲ့သည့် အဆောက်အဦအား ပြည်နယ်အတွင်းရှိ အနိုင်ရပါတီ Samajwadi ပါတီနှင့် ဆက်စပ်နေသော နိုင်ငံရေးသမား Mehtab Alab ကပိုင်ဆိုင်ကြောင်း သိရသည်။

ရဲတပ်ဖွဲ့က အဆိုပါဖြစ်စဉ်အား အမှုဖွင့်ခဲ့ပြီး ပြိုကျမှုနှင့် ပတ်သက်၍ စုံစမ်းစစ်ဆေးရန် ညွှန်ကြားထားကြောင်း သိရသည်။ (Xinhua)