Asia
ရုရှားနိုင်ငံ ကမ်ချတ်တာကျွန်းဆွယ်တွင် ပြင်းအား ၆.၃ ပမာဏရှိသော ငလျင်လှုပ်
ဗလာဒီဗော့စတော့၊ ရုရှား၊ မတ် ၂၉ ရက် (ဆင်ဟွာ)
ရုရှားနိုင်ငံ အရှေ့ဖျား ကမ်ချတ်တာကျွန်းဆွယ် ကမ်းရိုးတန်းတွင် ပမာဏ ၆.၃ ရှိသော အင်အားပြင်း ငလျင်တစ်ခုလှုပ်ရှားသွားကြောင်း အာဏာပိုင်များက မတ်လ ၂၉ ရက်၌ ပြောကြားလိုက်သည်။
“ငလျင်လှုပ်တာကို မတ်လ ၂၉ ရက် နံနက်အစောပိုင်းမှာ တိုင်းတာရရှိခဲ့တာပါ။ ငလျင်ဗဟိုချက်ကတော့ ပတ်ထရိုပေ့ဗလိုဗက်-ကမ်ချတ်စကီ တောင်ဘက် ကီလိုမီတာ ၃၀၀ အကွာ၊ မြေအောက်အနက် ကီလိုမီတာ ၄၀ ဖြစ်တယ်” ဟု ရုရှား သိပ္ပံအကယ်ဒမီ ဘူမိဗေဒတိုင်းတာရေး ဒေသဆိုင်ရာရုံးခွဲ ပြောခွင့်ရပုဂ္ဂိုလ်၏ ပြောကြားချက်အား ကိုးကား၍ RIA Novosti သတင်းအေဂျင်စီက ဖော်ပြခဲ့သည်။
အင်အားပြင်းငလျင်လှုပ်ခတ်ပြီးနောက် ပတ်ထရိုပေ့ဗလိုဗက်-ကမ်ချတ်စကီတွင် အဆောက်အအုံများအား ကယ်ဆယ်ရေးနှင့် မီးသတ်သမားများက စစ်ဆေးနေကြောင်း ဒေသဆိုင်ရာ အရေးပေါ်အခြေအနေဆိုင်ရာ ဝန်ကြီးဌာနက ကြေညာချက်၌ ပြောကြားထားသည်။ကနဦး အချက်အလက်အရ ပျက်စီးမှုနှင့် သေဆုံးမှု မရှိကြောင်း အဆိုပါ ဝန်ကြီးဌာနက ပြောကြားခဲ့သည်။ (Xinhua)
