ကုလသမဂ္ဂဆိုင်ရာ အမေရိကန်သံအမတ်ကြီး နစ်ကီဟဲလီ၏ နုတ်ထွက်စာကို ထရမ့်လက်ခံ

ဝါရှင်တန် ၊ အောက်တိုဘာ ၁ဝ ရက်(ဆင်ဟွာ)

အမေရိကန်နိုင်ငံ သမ္မတဒေါ်နယ်ထရမ့်က ကုလသမဂ္ဂဆိုင်ရာအမေရိကန်နိုင်ငံသံအမတ်ကြီး နစ်ကီဟဲလီ(Nikki Haley) ၏ နုတ်ထွက်စာကို အောက်တိုဘာ ၉ ရက်တွင် လက်ခံခဲ့ကြောင်း သိရသည်။

သမ္မတအိမ်ဖြူတော် ဘဲဥပုံရုံးခန်း၌ သတင်းသမားများအားပြောကြားရာတွင် သမ္မတထရမ့်က ဟဲလီအနေဖြင့် ယခုနှစ်ကုန်တွင် တာဝန်မှ အနားယူမည်ဖြစ်ကြောင်း ဆိုသည်။ အဆိုပါ ရာထူးမှ နုတ်ထွက်ရန် ရည်ရွယ်ထားကြောင်းကို လွန်ခဲ့သော ၆ လက ဟဲလီမှ ၎င်းအား အသိပေးပြောကြားခဲ့ကြောင်း ထရမ့်က ဆိုသည်။

ထရမ့်၏ ယုံကြည်စိတ်ချရဆုံး အကြံပေးများအနက် တစ်ဦးဖြစ်သူ ဟဲလီသည် ပြီးခဲ့သော ရက်သတ္တပတ်က အိမ်ဖြူတော်သို့သွားရောက်ပြီး ထရမ့်နှင့်တွေ့ဆုံစဉ် ၎င်းနုတ်ထွက်မည့်အကြောင်းကို ဆွေးနွေးခဲ့ခြင်းဖြစ်သည်။

ဟဲလီသည် တောင်ကယ်ရိုလိုင်းနားပြည်နယ်အုပ်ချုပ်ရေးမှူးအဖြစ် တာဝန်ထမ်းဆောင်ခဲ့ပြီး ထရမ့်၏ သမ္မတရာထူး လက်ခံခဲ့သည့် ၂ဝ၁၇ ခုနှစ် ဇန်နဝါရီတွင် ကုလသမဂ္ဂဆိုင်ရာ အမေရိကန်သံအမတ်ကြီးအဖြစ် တာဝန်ထမ်းဆောင်ရန် အတည်ပြုခြင်း ခံရသည်။(Xinhua)