Politics, Law & Military
တာမွေ၊ ကျောက်တံတားနှင့် ဒလမြို့နယ်တို့၌ ငွေစက္ကူတချို့ သိမ်းဆည်းရမိ
ရန်ကုန်၊ ဇန်နဝါရီ ၂၀ ရက် (ဆင်ဟွာ)
ရန်ကုန်တိုင်းဒေသကြီး၊ တာမွေ၊ ကျောက်တံတားနှင့် ဒလမြို့နယ်တို့၌ ၁၀,၀၀၀ ကျပ်တန် ငွေစက္ကူအတု ၃၅ ရွက်နှင့် ၅,၀၀၀ ကျပ်တန် ငွေစက္ကူအတု ၁၀ ရွက် သိမ်းဆည်းရမိခဲ့ကြောင်း ပြည်ထဲရေးဝန်ကြီးဌာန မှ ယနေ့သတင်းထုတ်ပြန်သည်။
ဖြစ်စဉ်မှာ ၂၀၁၇ခုနှစ်၊ ဇူလိုင်လ ၃ ရက်နေ့ မှ ၂၀၁၈ခုနှစ်၊ ဇန်နဝါရီလ ၁၉ ရက်နေ့ထိ တာမွေမြို့နယ်၊ ကျားကွက်သစ်ရပ်ကွက်ရှိ ကမ္ဘောဇဘဏ်ခွဲ ကျောက်မြောင်းသို့ ဦးသန်းစိုး အပါအဝင်လူပေါင်း၂၉ ဦး လာရောက်အပ်နှံ သည့် ငွေများအနက်မှ ၁၀,၀၀၀ ကျပ်တန် ငွေစက္ကူအတု ၂၆ ရွက်နှင့် ၅,၀၀၀ ကျပ်တန် ငွေစက္ကူအတု ၉ ရွက်၊ ကျောက်တံတားမြို့နယ် (၁)ရပ်ကွက် မြန်မာ့စီးပွားရေးဘဏ်ခွဲ(၃)သို့ ဦးစိန်အောင်ဦးအပါအဝင် လူ၆ ဦး လာရောက်အပ်နှံသည့် ငွေများအနက်မှ ၁၀,၀၀၀ ကျပ်တန် ငွေစက္ကူအတု ၆ ရွက်၊ ဒလမြို့နယ်၊ ဗညားဒလရပ်ကွက်ရှိ ကမ္ဘောဇဘဏ်သို့ ဦးဇော်မျိုးအေး(၃၉)နှစ် အပါအဝင်လူ ၄ ဦး လာရောက်အပ်နှံသည့် ငွေများအနက်မှ ၁၀,၀၀၀ ကျပ်တန် ငွေစက္ကူအတု ၃ ရွက်နှင့် ၅,၀၀၀ ကျပ်တန်ငွေစက္ကူအတု ၁ ရွက် တွေ့ရှိသဖြင့် သက်ဆိုင်ရာ ရဲစခန်းများသို့ လာရောက်အပ်နှံခဲ့ကြောင်း သိရသည်။
မှုခင်းရဲတပ်ဖွဲ့မှ အဆိုပါငွေစက္ကူအတုများအား ပဏာမစိစစ်ခဲ့ရာ နိုင်ငံခြား စက္ကူအမျိုးအစားဖြစ်ပြီး စက္ကူသား ချောနေခြင်း၊ အတုသည် အစစ်ထက် အလျား၊ အနံ ၁ မီလီမီတာစီတိုခြင်း၊ အရောင်မှေးမှိန်ခြင်း၊ လုံခြုံရေးကြိုး အရောင်ပြောင်းလဲမှုမရှိဘဲ ခရမ်းရောင်သာပါရှိခြင်း၊ ကာလာပရင်တာနည်းဖြင့် တုပထားသော ငွေစက္ကူအတုများ ဖြစ်ကြောင်း သတင်းထုတ်ပြန်ချက်ထဲတွင်ပါရှိသည်။ (Xinhua)
