မဟာအောင်မြေမြို့နယ်၌ ၁၀,၀၀၀ ကျပ်တန်ငွေစက္ကူအတု ၃၀၀ ရွက် သိမ်းဆည်းရမိမှု

ရန်ကုန်၊ မေ ၁၆ ရက် (ဆင်ဟွာ)

မန္တလေးတိုင်းဒေသကြီး မဟာအောင်မြေမြို့နယ်၌ ၁၀,၀၀၀ ကျပ်တန်ငွေစက္ကူအတု ၃၀၀ ရွက် သိမ်းဆည်းရမိမှုဖြစ်ပွားခဲ့ကြောင်း ပြည်ထဲရေးဝန်ကြီးဌာန မှယနေ့သတင်းထုတ်ပြန်သည်။

ဖြစ်စဉ်မှာ ၂၀၁၈ခုနှစ်၊ မေလ ၁၅ ရက်နေ့ ၁၉၃၀ အချိန်တွင် မဟာအောင်မြေမြို့နယ် Mr.BBQ စားသောက်ဆိုင်၌ ငွေစက္ကူအတုများ လဲလှယ်နေကြောင်းသတင်းအရ မြန်မာနိုင်ငံရဲတပ်ဖွဲ့မှ တပ်ဖွဲ့ဝင် များ သွားရောက်စစ်ဆေးရာ စိုးလင်း(၄၀)နှစ်ပါ ၂ ဦးအား ၁၀,၀၀၀ ကျပ်တန်ငွေစက္ကူအတု ၃၀၀ ရွက်(ကျပ် ၃၀ သိန်း)နှင့်အတူ ဖမ်းဆီးရမိခဲ့ကြောင်း သိရသည်။

အဆိုပါစိုးလင်းပါ ၂ ဦးအား စစ်မေးရာ ၎င်းတို့၏ထွက်ဆိုချက်အရ ၂၀း၂၀နာရီ အချိန်တွင် ကွင်းဆက်တရားခံဖြစ်သော အောင်ဆန်းဝင်း(၄၀)နှစ် အား ၎င်းနေအိမ်၌ ဖမ်းဆီးရမိခဲ့သဖြင့် ၂၃၅၅ အချိန်တွင် စိုးလင်းပါ ၃ ဦး (ဖမ်းမိ)တို့အား မဟာအောင်မြေမြို့မရဲစခန်း (ပ)၃၁၄/၂၀၁၈၊ ဗဟိုဘဏ် ဥပဒေပုဒ်မ ၁၀၅/၁၀၆ ဖြင့် အမှုဖွင့်စစ်ဆေးစုံစမ်းလျက်ရှိကြောင်း သိရသည်။

အဆိုပါငွေစက္ကူအမျိုးအစားများအား မှုခင်းရဲတပ်ဖွဲ့၏ ပဏာမ စိစစ်ချက်အရ နိုင်ငံခြားစက္ကူ အမျိုးအစားဖြစ်ပြီး စက္ကူသားချောနေခြင်း၊ အတုသည်အစစ်ထက်အလျားနှင့်အနံ ၁ မီလီမီတာစီတို ခြင်း၊ အရောင်တောက်ပမှုမရှိခြင်း၊ တန်ဖိုးရေစာများပုံရိပ်သာပါရှိခြင်း၊ အရောင်ပြောင်းလဲမှုမရှိခြင်း၊ ကာလာပရင်တာနည်းဖြင့်တုပထားခြင်း၊ လျှို့ဝှက်ချက်များမပါရှိခြင်း၊ စသည့်ကွဲပြားမှုများရှိကြောင်း သတင်းထုတ်ပြန်ချက် ထဲတွင်ပါရှိသည်။ (Xinhua)